Bagong laro sa Gilas ang ipamamalas ni Pinoy Kouame

ni VA - @Sports | May 20, 2021

Maghihintay na lamang ng clearance mula sa International Basketball Federation (FIBA) ang Ateneo center na si Angelo Kouame upang tuluyang makapaglaro para sa Gilas Pilipinas.

Naging pinakabagong naturalized center ng Gilas Pilipinás si Kouame matapos na lagdaan ni Pangulong Rodrigo Duterte ang panukalang naturalization nito base sa ginawang anunsiyo ng Samahang Basketbol ng Pilipinas noong Martes ng hapon.

Kapag nabigyan ng clearance mula sa FIBA, puwede ng maglaro si Kouame para sa Gilas sa darating na Fiba Asia Cup qualifiers na gaganapin sa Clark sa susunod na buwan at sa Olympic Qualifying Tournament sa Serbia. “Kouame will now undergo the final steps required by FIBA before a naturalized player can suit up for a country and we are confident that he’ll be able to play during our hosting of the FIBA Asia Cup Qualifiers and the FIBA Olympic Qualifying Tournament in Serbia,” ayon sa statement na inilabas ng SBP. “Although Kouame’s presence is crucial for these two tournaments, having him as an official member of the squad in the upcoming games is an early investment as we build towards the 2023 FIBA Basketball World Cup.”

Kasamang nagsasanay ang 6-foot-10 Ivorian center ng Gilas, na muling pumasok sa bubble nila sa Laguna noong nakaraang buwan. Ang pagkakadagdag ni Kouame sa lineup ng Gilas Pilipinas ay makakatulong ng malaki para sa Philippine team.

Racer Coseteng, 8th Place sa British F4 Championship

ni VA - @Sports | May 13, 2021

Naramdaman kaagad ang presensiya ng batang Filipino race car driver na si Eduardo Coseteng sa kanyang unang salang sa Formula 4 nang tumapos syang pang-walo sa kanyang first race sa 2021 British F4 Championship.

Kumakatawan sa Phinsys ng Argenti motorsport team, ang 17-anyos na si Coseteng ang kauna-unahang Filipino na nakalahok sa Formula 4. Nakakuha si Coseteng ng kabuuang 14 puntos sa dalawang araw na karera na ginanap sa Thruxton Circuit sa Hampshire, England.

Sa unang araw (Mayo 8), agad nagparamdam si Coseteng matapos niyang pumang-apat mula sa naglabang 16 na drivers.Naging best-timed rookie din siya sa naturang karera na nagbigay sa kanya ng Rookie Cup citation.

Nang sumunod na araw, nagtapos lang siyang pang-15 at pang-11 sa huling dalawang karera ng event. Pero kahit na nagtapos na nasa bottom half, naitala naman ni Coseteng ang fastest lap sa nasabing dalawang races sa hanay ng 16 na mga kalahok.

Anak ng Filipino motorsports legend na si Jody, si Coseteng ay nasa ikatlong puwesto sa Rookie Cup standings sa naitala niyang 33 puntos.

Bago nakapasok sa prestihiyosong karéra, nagwagi si Coseteng ng Asian Karting Open Championship (AKOC) junior title noong 2017, AKOC's Formula 125 at Senior X30 classes noong 2018, at Macau International Kart Grand Prix noong 2019.

Nakabase sa United Kingdom, ang susunod na karerang sasabakan ni Coseteng ay sa Snetterton Circuit sa Norfolk, England sa susunod na buwan.

Gilas, makikibaka sa FIBA 3x3 para sa Olympic Berths

ni VA - @Sports | April 28, 2021

Dalawang araw lamang lalaro ang Gilas Pilipinas 3x3 squad sa group stage ngunit parehong back-to-back games ang kanilang schedule sa idaraos na FIBA 3x3 Olympic Qualifying Tournament sa Graz, Austria sa Mayo 26 - 30. Nasa Group C kasama ng France, Slovenia, Qatar, at Dominican Republic kinakailangan maipanalo ng Gilas ang kanilang mga laro para sa tsansang makakuha ng isa sa nakatayang tatlong Tokyo Olympics spots sa torneo.

Unang sasabak ang Gilas na may ranggong ika-20 sa world ranking sa Mayo 26 kontra sa world No. 26 Qatar at susunod ang world No. 3 Slovenia. Magpapahinga sila ng isang araw (Mayo 27) bago muling sumalang kontra sa world No.33 Dominican Republic at sa world No.10 France sa Mayo 28. Ang top two teams sa apat na grupo ang uusad sa knockout stage. Ang dalawang koponang magwawagi sa semifinals at sa third place game ang magkakamit ng Olympic berths. Pamumunuan ang ating koponan nina Joshua Munzon at Alvin Pasaol , ang kasalukuyang top two 3x3 players ng bansa kasama sina CJ Perez at Mo Tautuaa na nanguna naman sa Gilas 3x3 squad na nagwagi ng gold-medal sa 3x3 basketball noong 2019 Southeast Asian Games.