8 sa Perlas Spikers, positive; Senegal, 4 sa OQT may COVID-19

ni MC / VA - @Sports | June 30, 2021

Isiniwalat ng Perlas Spikers na 7 sa kanilang players kasama ang coach ang tinamaan ng COVID-19 habang nasa Baguio training camp para sa paghahanda sa Premier Volleyball League Open Conference.

Nilinaw nila na hindi sila lumabag sa health protocols, taliwas sa sinasabi ng news reports, na pumuga sila sa quarters kaya nahawahan ng COVID-19. Sinusunod umano nila ang home-venue-home set-up set ng binuo ng club at city government. Ayon kay Perlas captain Jem Ferrer, mali umano ang balitang pumuga sa quarters nila sa Teachers’ Camp ang mga nagpositibong manlalaro kaya nahawa ng virus dahil hindi umano sila nanatili roon.

• 

• 

“We are not billeted in Teacher’s Camp,” ani Ferrer. “The only places that we go to apart from our accommodation are our court training venue and our gym training.” “In our accommodation, there is a CCTV that monitors us 24/7 and that can prove that we do not go out of our gates except for court training and gym training as mentioned earlier," dagdag pa nito.

Ibinalita pa ng ace setter na ang ibang players at coaches ay nag-negatibo sa test at nasa maayos na kondisyon habang ang mga nagpositibo ay nagpapagaling sa quarantine facility. Sasailalim ang buong koponan sa RT-PCR tests sa July 6. Nagsimulang mag-ensayo ang Perlas Spikers sa Saint Vincent Gym noong May 30.

Samantala, tuluyan nang umatras ang Senegal sa paglahok sa FIBA Olympic Qualifying Tournament sa Belgrade, Serbia matapos magpositibo ang apat na miyembro ng kanilang delegasyon sa nakamamatay na COVID-19. Inanunsiyo ng Senegalese basketball federation ang mapait na balita nitong umaga ng Martes dahilan para ma-forfeit ang laban nila kontra sa Italy at Puerto Rico. Naging bronze medalist ang Senegal sa 2017 Afrobasket at nagtapos na 30th place sa 2019 FIBA World Cup sa China. Dahil sa pangyayari, kanselado na ang laro ng Senegal kontra sa Puerto Rico ngayong Miyerkules at Italy sa Huwebes.

SBU at AU, nagsalo sa 2 gold; Knott, naka-COVID-19 quarantine

ni VA - @Sports | June 26, 2021

Matapos makamit ng College of St. Benilde ang unang gold medal na nakataya sa seniors division ng NCAA Season 96 speed kicking event, naghati ang San Beda University at Arellano University sa sumunod na dalawang gold sa pagpapatuloy ng virtual competition.

Nasaklit ng taekwondo jin ng Chíefs na si Stanley Roy Laguio ang gold medal sa batamweight class matapos umiskor ng 6.583 puntos.

Sumunod sa kanya si Axl Zerrudo ng San Sebastian College-Recoletos na nagtala ng 6.442 at Michael Christian Macario ng San Beda na umiskor ng 6.383 para makamit ang silver at bronze medal ayon sa pagkakasunod. Nanalo naman ng gold medal para sa Red Lions si Jack Janggo Natividad na nakatipon ng 6.883 puntos sa flyweight division.

Samantala, nahaluan ng lungkot ang naunang kasiyahan ng kampo ng trackstar na si Kristina Knott sa kanyang pagkopo ng pangarap na Olympic slot sa pamamagitan ng "universality rule" kasama ng iba pang mga track athletes mula Iceland, Singapore at South Sudan. Hindi kasi inaasahang nagpositibo ang Fil-Am sprinter sa COVID-19 na siguradong makakaapekto sa kanyang paghahanda para sa pagsabak niya sa darating na Tokyo Olympics. Inihayag ng National Sports Association ni Knott-ang Philippine Athletics Track and Field Association ang negatibong balita noong Miyerkules ng hapon. Kahit ang coach ni Knott na si Roshan Griffin ay hindi makapaniwala sa pangyayari dahil kumpleto na sa bakuna ang Fil-Am sprinter matapos magpabakuna ng Pfizer noong Mayo at ngayong buwan sa Florida. “She has no symptoms as she is already fully vaccinated. There hasn’t been any lags in training or anything wrong that’s going on with her. None of us contracted it. I’m the only one that’s fully vaccinated,” pahayag ni Griffin matapos nilang malaman ang resulta ng test na ginawa kay Knott bago sumalang sa Karlstad Grand Prix. Dahil dito, kasalukuyan ngayong nasa 5-day quarantine si Knott sa Sweden.

Golfer Pagunsan, Swak sa Olympics; AU AT CSB, Gold sa Speed Kicking

ni VA / MC - @Sports | June 23, 2021

Juvic Pagunsan-golfer

Opisyal nang nakakuha ng slot sa Olympics si Golfer Juvic Pagunsan upang maging pang-13th na Filipino na lalaro sa Tokyo Olympics na nakatakda sa susunod na buwan.

Inaasahan na ring idedeklarang pasok sa Olympics sina Yuka Saso at Bianca Pagdanganan sa susunod na linggo. Nakuha ng 43-year-old na si Pagunsan ang kanyang Olympic tiket matapos malagay sa 50th spot ng 60 quota na lalahok sa men’s competition na nakatakda sa July 29 - Aug. 1 sa Kasumigaseki Country Club sa Japan.

Dahil dito, ang 2021 Japan Golf Tour’s Mizuno Cup champion ang naging unang Filipino golfer na nakapasok sa Olympic dahil ang women’s qualifiers ay iaanunsiyo pa sa susunod na linggo. Inaasahang sina Saso, ang reigning US Women’s Open champion at Pagdanganan, ay makukuha ang Olympic slots sa pag-anunsiyo ng final 60-player composition sa susunod na linggo.

Nakatakda ang women’s event sa August 4-7 sa parehong golf course. Makakasama ni Pagunsan sa Olympics sina pole-vaulter EJ Obiena, gymnast Caloy Yulo, boxers Eumir Marcial, Irish Magno, Nesthy Petecio and Carlo Paalam, weightlifters Hidilyn Diaz and Elreen Ando, rower Cris Nievarez, jin Kurt Barbosa, skateboarder Margie Didal at shooter Jayson Valdez.

Samantala, nagwagi na rin ng gold medal ang Arellano University habang kinopo ng College of Saint Benilde-La Salle Greenhills ang ikalawa nilang gold medal noong Lunes ng hapon sa pagpapatuloy ng NCAA Season 96 juniors virtual speed kicking event.

Si Raphael Ongkiko ang nagwagi ng ikalawang gold para sa Junior Blazers nang makakuha ito ng iskor na 7.067 puntos upang mangibabaw sa middleweight/light heavyweight division.

Inangkin ang silver at bronze medals ng dalawang jins mula Emilio Aguinaldo College (EAC) na sina John Keirth Beramo na nagtala ng 6.667 puntos at Bermel Dionela Jr. na nakatipon ng 6.458 puntos ayon sa pagkakasunod.

Samantala, nanggaling naman sa heavyweight division ang unang gold medal ng Arellano nang manalo si Joshua Lyndon Dionio matapos umiskor ng 6.592 puntos.