Finnegan, gold sa Gymnast, Yulo, ginto ulit, Farr, bronze

ni VA / MC - @Sports | May 16, 2022

Nakapagdeliber ang Filipino-American gymnast na si Aleah Finnegan ng isa pang gold medal sa 31st Southeast Asian Games.

Kumana ang 19-anyos na ginto sa women's vault sa Quần Ngựa Sports Palace sa Hanoi, Vietnam, ang ikatlo niyang medalya sa SEA Games. Unang naka-silver si Finnegan sa all-around at natulungan ang 'Pinas para sa gold ng team event.

Umiskor siya ng 13.133 sa vault, nanaig kay Vietnam's Thi Quynh Nhu Nguyen na umiskor ng 13.033. Nagkasya sa bronze si Indonesia's Rifda Irfanaluthfi sa iskor na 12.817.

Unang naka-gold medal si Carlos Edriel Yulo sa men's all around event ng gymnast at kahapon ay muling nakasungkit ng ginto sa floor exercise.

Samantala, nakasungkit ng bronze medals sina John Derick Farr at Naomi Gardoce sa cycling downhill events sa SEA Games kahapon habang nasilat si Lea Denise Belgira para sa gold medal dahil flat tire siya. Naorasan si Farr, ang gold medal winner noong 2019, ng 3 minuto at 13.138 segundo sa 2.0-km track na kurbadang paakyat sa burol ng Hao Dinh City’s na may 300 metro ang taas na hindi naman ganu'n kahirap sa courses sa nakaraang SEA Games downhill.

Gold medal si Thailand’s Methasit Boonsane sa 3:06.27 habang silver si Indonesia’s Andy Prenoga matapos maunahan sa 3 segundo na mas mabagal sa Thai.

Sumampa sa podium si Gardoce sa oras na 3:44.722. Bagamat dismayado si Belgira dahil sa flat tire, nagpasalamat siya sa muling pagtuntong sa SEAG. "I got the flat tire right in the first drop,” ani Belgira ng Guimaras. “I felt the thud and I knew it…I tried to ride flat but to no avail.”

Bronze kay Nievarez sa Sculls, Wong, Silver sa Wushu Taolu

ni VA / MC / Delle Primo - @Sports | May 15, 2022

Mag-uuwi si Filipino Olympian Cris Nievarez ng isa pang dagdag na medalya sa rowing medal mula sa 31st Southeast Asian Games sa Vietnam.

Bronze medal ang idinagdag niya kahapon sa men's lightweight single sculls event. Unang nakapagwagi siya ng silver medal sa men's lightweight double sculls event.

Bukod kay Nievarez, nakapagbulsa rin ng bronze medal sina Edgar Illas at Zuriel Sumintac para sa men's lightweight pair event. Ang Pilipinas ay mayroon nang kabuuang 8 medalya para sa rowing team.

Samantala, 2 pang medalya ang nakuha nina wushu athletes Agatha Wong at Jones Inso kahapon. Silver medal ang nasungkit ni Wong women's taolu taijiquan event, habang si Inso ay bronze sa men’s taolu taijijian event.

Ito ang ika-2 medal ni Inso kung saan naka-silver siya sa men's taijiquan noong Biyernes. “I’m still grateful for the silver kasi two months lang ang training namin. I wasn’t expecting anything. But I did my best so that’s enough na,” ani Wong, silver medalist noong 2015 World Championships sa Jakarta.

Samantala, naging malamlam ang tsansa ng bansa na muling maka-podium sa men's volleyball matapos mabigo ng ating national team sa una nitong laro kontra Cambodia kahapon sa 31st SEAG sa Hanoi,Vietnam.

Hindi nagawang isalba ng magandang performance na ipinakita ni Bryan Bagunas ang koponan na tumiklop sa loob ng apat na sets, 21-25, 26-24, 28-30, 27-29, sa Cambodian squad sa simula ng kanilang kampanya sa Dai Yen Arena sa Quang Ninh, Vietnam. Winalis ng mga Pinoy ang Cambodia noong 2019 SEAG tungo sa kanilang silver medal finish. Ngunit sa pagkakataong ito ay napaghandaan sila ng mga Cambodians na nagpamalas ng end game poise sa pamumuno ni Voeurn Veasna kaya di nakahirit ng decider ang mga Pinoy.

Matapos maitabla ni Marck Espejo ang 4th set sa 27-all, umiskor ng dalawang sunod ang mga Cambodians mula sa isang block at isang attack upang ganap na tapusin ang laro.

Kickboxers Saclag at Iniong, gold; Casares at Mangrobang, ginto rin

ni VA / MC - @Sports | May 15, 2022

Muling nakapaghatid ng karangalan sina kickboxers Gina Iniong-Araos at Jean Claude Saclag para sa kampanya ng Pilipinas sa 31st Vietnam Southeast Asian Games noong hatinggabi ng Biyernes at napanatili ang korona sa Bac Ninh Gymnasium sa Hanoi.

Nagpakita agad ng pagka-agresibo, umiskor ng 2-1 victory si Iniong-Araos, 32, ng Baguio City, kontra sa mas malaki at malapad na si Jaiteang Waraporn ng Thailand para sungkitin ang gold sa women’s low kick 60kg finals.

Natapatan din ni Saclag ang pagka-agresibo at tapang ng Thai na si Chaleamlap Santidongsakum para sa 2-1 win sa men’s 63.5kg low kick finals at tuluyang tapusin ng Pinoy kickboxers ang laban sa inaning 2 gold, 4 silver at 2 bronze medals.

Naghari ang Vietnam sa kickboxing na may kabuuang tally na 5-0-6, kasunod ng Thailand sa 2-4-6.

Ang 2 ginto ang naghatid sa tally ng Pilipinas sa 5-12-11 sa pagtatapos ng aksiyon noong Biyernes ng gabi.

Matamis na tagumpay ito para kay Iniong-Araos, na minsang nagduda sa lakas niya makaraang manganak noong nakalipas na 2 taon makaraang magreyna sa 55kg light kick event sa Philippine SEA Games noong 2019. “Naging challenge sa akin ang mga negative comment ng marami na kesyo sabi nila, ‘Ano ba ‘yan? Nanganak na lalaban pa, ba’t ‘di na lang alaagan ang anak?’” ayon kay Aniong-Araos, na kakasa pa sa vovinam, isang Vietnamese form na martial art.

Nasaksihan nina Philippine Olympic Committee President Abraham “Bambol” Tolentino at PSC Commissioner Ramon Fernandez, ang chief of mission ng national team here ang finals.

Nainspira si Saclag sa presensiya at suporta ng mga opisyal, “Masarap lagi ang first (gold). Pero masarap din ang pangalawa, para sa bayan!”

Ang iba pang Pinoy finalists ay sina Renalyn Daquel, Gretel De Paz, Zephania Ngaya at Claudine Veloso – na nagtapos sa silver.

Samantala, nakapagtala rin ang triathletes na sina Fernando Casares at Kim Remolino kahapon ng gold-silver finish.

Naorasan si Casares ng 01:56.570 sa men's individual triathlon upang makauna habang nakasunod ang kabayang si Remolino sa 01:59.160. Bronze medal kay Indonesia's Ronald Setiawan Bintang sa 02:01.350. As of 2 pm kahapon, may 6 na gold medals, 13 silver, at 11 bronze medals na ang 'Pinas ayon sa SEA Games website.

Gold medalist din si women's triathlete Kim Mangrobang para sa ikatlong diretsong first place. Bronze medal naman si Raven Alcoseba. Apat na ang medalya ng Pilipinas sa triathlon.