ni Thea Janica Teh | October 9, 2020
Ikinagulat ng mga pasahero ang nangyari sa isang lalaking biglang nahulog mula sa pagsabit sa sinasakyan nilang dyip sa Dasmariñas, Cavite ngayong Biyernes.
Nahulog umano ang lalaki dahil sa sobrang kaantukan.
Makikita sa isang CCTV footage na bigla na lamang nahulog ang pasahero sa may Pala-Pala intersection. Hindi agad nakatayo ang lalaki matapos mapahiga sa kalsada.
Agad na nilapitan ng mga nakakita ang lalaki at isinugod sa ospital.
ni Thea Janica Teh | October 7, 2020
Tinatayang aabot sa P50,000 halaga ng printed learning modules para sa 800 estudyante ang nasira dahil sa baha sa Mandaue City, Cebu, ayon sa Department of Education (DepEd) ngayong Miyerkules.
Ayon kay DepEd Region 7 Director Salustiano Jimenez, 500 pamilya ang lubos na naapektuhan ng pagbaha sa Barangay Paknaan kung saan naninirahan ang 32 estudyante na nawalan ng learning modules.
Ngunit, umabot sa 800 estudyante ang naapektuhan dahil umabot pa sa ilang kalapit-barangay ang bahang dinulot ng malakas na pag-ulan.
Sa isang panayam, sinabi ng Public Information officer ng DepEd Mandaue na si Edgar Espina, nabasa ang mga learning modules sa baha at nasira kaya agad nitong sinabihan ang division ng Mandaue na mag-print muli.
Dagdag ni Espina, ang mga naapektuhang estudyante ay mula sa grade school at high school. Sinabi rin nito na 80% sa kanilang lugar ang gumagamit ng modular system.
Napag-alamang flood prone area ang Bgy. Paknaan kaya naman ginagawan na ito ng paraan upang hindi na maulit ang insidente.
ni Thea Janica Teh | October 7, 2020
Posibleng magkaroon muli ng measles outbreak ang bansa sa taong 2021, ito ang inanunsiyo ng Department of Health (DOH) ngayong Miyerkules.
Ngayong 2020, bumaba umano ang bilang ng kaso ng tigdas sa bansa sa 4,624, ngunit lumagpas sa epidemic threshold ang mga rehiyon tulad ng Mimaropa (Mindoro, Marinduque, Romblon at Palawan) at Caraga.
Bukod sa COVID-19 at tigdas, hindi pa rin umano nakokontrol ng DOH ang pamamahagi ng polio vaccine.
Ayon kay Wilda Silva, program manager ng DOH national immunization program, magsasagawa ng Measles, Rubella and Oral Polio Vaccine supplemental immunization activity (MR-OPV SIA) ang DOH upang maiwasan ang outbreak.
"This supplemental immunization activity, in the true sense of the word, is going to prevent the future outbreak. We don't want to respond to an outbreak but we want to prevent an outbreak," sabi ni Silva.
Inaasahan na magsisimula ang unang phase ng programa sa katapusan ng buwan ng Oktubre hanggang Nobyembre sa ilang rehiyon sa Luzon at Mindanao. Habang ang ikalawang phase naman ay gagawin sa Pebrero, 2021.
Ito ay isasagawa sa isang modified site sa kani-kanilang barangay hall o gym para agad na makapunta ang mga residente kasama ang kanilang mga anak.
Matatandaang nagkaroon ng measles outbreak noong 2018 at umabot sa 21,000 ang bilang ng mga tinamaan nito. Bukod pa rito, kumalat din ito sa ibang bansa na napag-alamang nanggaling sa Pilipinas.
