Cayetano out, Velasco bagong House Speaker!

ni Thea Janica Teh | October 12, 2020

Itinalaga na bilang bagong Speaker of the House of Representatives si Marinduque Representative Lord Allan Velasco ngayong Lunes.

Nakuha ni Velasco ang boto ng 186 mula sa 299 kongresista. Ginanap ang eleksiyon sa Celebrity Sports Plaza sa Quezon City dahil sarado ang House Plenary Session hanggang Nobyembre 16.

Ilan sa mga bumoto kay Velasco ay sina dating Deputy Speaker Mikee Romero, Rizal Representative Michael John "Jack" Duavit, Oriental Mindoro Representative Salvador Leachon, Ilocos Sur Representative Kristine Singsong-Meehon, Negros Occidental Representative Kiko Benitez, Zamboanga Del Sur Representative Divina Grace Yu, Navotas City Representative John Reynald Tiangco, Albay Representative Joey Salceda, at Maguindanao Representative Esmael Mangudadatu.

Pinangunahan ni Deputy Speaker Conrado Estrella III ang session habang si Pampanga Representative Juan Pablo “Rimpy” Bondoc naman ang naging majority floor leader.

P10.8M na nakaw na yosi, nasabat sa Zamboanga

ni Thea Janica Teh | October 12, 2020

Nasabat nitong Biyernes ng Bureau of Customs-Port ng Zamboanga ang humigit-kumulang P10.8 milyong halaga ng nakaw na sigarilyo.

Sa inilabas na statement ngayong Lunes, nahuli ng isang maritime patrol sa Zamboanga del Sur ang isang motorized boat na may dalang 300 master cases ng assorted na nakaw na sigarilyo.

Papunta umano sa Pangdan, Kaluwa Sulu ang bangka at ide-deliver sana ang mga sigarilyo sa isang taong kinilala bilang “ASUL” sa Pagadian City.

Nakipagtulungan ang Customs Intelligence and Investigation Service and Enforcement and Security Service sa Philippine Navy, Philippine Coast Guard, Philippine National Police, Philippine Drug Enforcement Agency at representative mula sa Philip Morris Fortune Tobacco Inc. upang maisagawa ang operasyon.

Nag-isyu si Acting District Collector Segundo Sigmundfreud Barte Jr. ng warrant of seizure and detention laban sa shipment dahil sa kakulangan ng permit mula sa National Tobacco Administration at paglabag sa Executive Order No. 245 (Amended Rules and Regulations Governing the Exportation and Importation of Tobacco and Tobacco Product) at Section 117 ng Republic Act No. 10863 o Customs Modernization and Tariff Act.

P800 milyon sobra sa pondo, inihihirit na ibigay sa mga magsasaka

ni Thea Janica Teh | October 12, 2020

Dalawang senador ang sumang-ayon ngayong Lunes na gawing cash aid para sa mga magsasaka ang natirang pondo sa P10-billion Rice Competitiveness Enhancement Fund (RCEF) o nakolekta sa Rice Tariffication Law upang makatulong ngayong panahon ng pandemya.

Sa Senate panel deliberation ng proposed P56.8 bilyong budget sa 2021 ng Department of Agriculture ngayong Lunes, sinabi ni Senate Committee on Agriculture Chairperson Cynthia Villar na mayroon itong Senate resolution para rito.

Aniya, "Anything beyond the P10 billion will be given as cash assistance to the farmers in this time of pandemic, 'yung anything beyond the P10 billion collection in tariff.”

Dagdag pa ni Villar, umabot sa P800 milyon ang sumobra sa tax collection.

Sumang-ayon kay Villar si Senator Francis “Kiko” Pangilinan at nag-request na maging co-author ng resolution.

Sa ilalim ng Rice Tarrification Law na napirmahan noong Pebrero 2019, maglalaan ng P10 bilyon taon-taon ang pamahalaan para sa RCEF sa loob ng 6 na taon.

Sa pondong ito, mapupunta ang P5 bilyon sa rice farm machinery at equipment, P3 bilyon para sa rice seed at P1 bilyon para sa rice extension services tulad ng training para sa mga magsasaka.

Ayon naman kay Agriculture Secretary William Dar, tinatanggap umano nila ang suhestiyong ito. Aniya, titingnan nila ang taripa at kung posible muling makapagbigay ng cash assistance sa mga magsasaka.

Sinabi rin ni Dar na sa P24 bilyong inilaan ng pamahalaan sa ilalim ng Bayanihan to Recover as One Act o Bayanihan 2, P4 bilyon dito ay gagamitin para sa social amelioration.

Pinaalalahanan ng mga senador ang DA na magbigay na ng social amelioration para sa mga magsasaka at mangingisda dahil hanggang Disyembre 19 na lamang ang Bayanihan 2.