P4.506 T 2021 National Budget, ipinasa na sa Senado

ni Thea Janica Teh | October 27, 2020

Natanggap na ng Senado ngayong Martes ang General Appropriations Bill o ang panukalang budget para sa taong 2021, isang araw bago ang ipinangakong petsa ng bagong House Speaker na si Lord Allan Velasco.

Ayon kay Senator Sonny Angara na siya ring chairperson ng Senate Committee on Finance, natanggap na umano nila ang General Appropriations Bill ngayong Martes nang hapon na umaabot sa P4.506 trilyon. Pagkatapos nito ay ipapasa na nila sa Legislative Budget Research and Monitoring Office.

Nagpapasalamat naman si Senate President Vicente Sotto III sa House Speaker sa swift transmission at sinabing malaking tulong ang pagpasa ng budget bago mag-Pasko.

Aniya, “It’s even one day ahead of my original request that they send it on the 28th. This will somehow ease the burden on us to insure the passage and signing of PRRD before Christmas."

44 Immigrations officials sa Pastillas scam, sinuspinde ng Ombudsman

ni Thea Janica Teh | October 27, 2020

Naghain ng suspension order nitong Lunes si Ombudsman Samuel Martires sa 44 opisyal ng Bureau of Immigrations dahil sa mga alegasyon na sangkot ang mga ito sa Pastillas Scam o pagbibigay ng suhol ng mga Chinese kapalit ng pagpasok ng mga ito sa bansa.

Hindi pinangalanan ni Martires ang mga sinuspindeng opisyal.

Ayon naman kay Senator Risa Hontiveros na isa sa mga nangungunang sumisiyasat sa Pastillas Scam, tinatayang nasa P40 bilyong halaga ng suhol ang nakuha ng mga naturang opisyal sa visa upon arrival system (VUA) ng Immigration Bureau.

Base sa record ng Immigration Bureau, umabot sa 4 milyong Chinese citizens ang nakapasok sa Pilipinas simula pa noong 2017. Noong Enero, sinuspinde ang VUA policy dahil sa COVID-19 pandemic.

Paggamit ng saliva specimen sa RT-PCR, mas pinadali at pinamura – Concepcion

ni Thea Janica Teh - @Bulgarific | October 27, 2020

Hello, Bulgarians! Binanggit ni Presidential Adviser for Entrepreneurship at Go Negosyo Founder Joey Concepcion sa press conference ng Project ARK at Mandaluyong Pooled Testing na sponsored ng BDO Foundation na naghahanap ito ng susuporta sa pag-aaral ng paggamit ng saliva sa RT-PCR.

Aniya, “If that research shows that saliva is as sensitive or even more sensitive than swab testing, then that would be another game-changer, because we would not need an [RT-PCR] extraction machine.”

Malaki ang tiyansang mahawa ang mga health workers sa isinasagawang nasopharyngeal swab at maaari pa itong makasakit sa mga tao kaya naman, nagbigay ng suhestiyon si Concepcion na gumamit ng saliva para mas mapadali ang bawat test. Ito rin umano ay maaaring makabawas sa presyo ng RT-PCR test.

Sa ngayon ay may clinical studies na pinag-aaralan ang kakayahan ng saliva sample bilang alternatibong sample sa swab-based molecular test. Kung ito ay mapatunayan ay maaari na itong simulan at magamit sa mga lugar na limitado lamang ang test kits.

Dagdag pa ni Concepcion, ito umano ang paraan upang mas mapabilis, mas abot-kaya at mas convenient sa mga tao. Ito rin umano ang sign na sumusunod tayo sa inobasyon ng mundo na siyang paraan upang makaahon muli ang ating ekonomiya.

Samantala, sumunod na rin ang Mandaluyong sa yapak ng Makati nang magsawa ng pooled testing methodology sa ilang piling residente.

Ayon kay Mandaluyong Mayor Menchie Abalos, “The PCR pooled testing initiative is a private sector led effort that is anchored on the combined effort of the government and businesses to make massive testing possible at the community level...Malaking tulong po ito sa aming mga Metro Manila mayors.”

Bukod pa rito, sinabi rin ng President ng BDO Unibank na si Nestor Tan na sa inisyatibong ito ng Go Negosyo, malaki ang maitutulong nito sa lahat ng small and medium sized business partners.

Ilan sa mga kasama sa presscon sina Tessie Sy-Coson (Chairwoman of BDO Unibank), Mario Deriquito (President of BDO Foundation), Cong. Janette Garin (ARK-PCR Private Implementor), Dr. Robert Padua (President of the Philippine Society of Pathologists), Dr. Raymund Lo of the Philippine Children’s Medical Center at Josephine Romero (Project ARK Lead).