Kaya raw dyinowa si Kathryn… MAYOR MARK, TATAKBO RAW SA MAS MATAAS NA POSISYON SA NEXT ELECTION

ni Erlinda Rapadas @Teka Nga | April 11, 2026

Photo: Mayor Mark Alcala - FB

Hindi masaya ang mga mamamayan ng Lucena sa pagkaka-involve ni Kathryn Bernardo sa kanilang mayor na si Mark Alcala. Hindi na raw nagagampanan ni Mayor Mark ang kanyang tungkulin bilang halal na public servant. 

Madalas ay ‘missing in action’ si Mayor Mark sa mahahalagang events sa Lucena dahil sa kasasama sa mga lakad abroad ni Kathryn. Mas binibigyan daw nito ng panahon ang kanyang love life. 

At sa dami ng kanyang mga nakarelasyon ay naging chickboy ang kanyang image. Ilang celebrities na rin kasi ang naugnay kay Mayor Mark Alcala tulad nina Ashley Ortega, Mika Reyes, at Sanya Lopez. 

May tsika pa na kaya raw dyinowa nito ngayon si Kathryn Bernardo ay dahil may balak itong si Mayor Alcala na tumakbo sa mas mataas na posisyon sa 2028. 

Well, maipanalo kaya siya ni Kathryn Bernardo kung saka-sakali?

---

Parents at mga kaibigan, no show… 

KC, MAG-ISANG NAG-CELEBRATE NG B-DAY 

LAST April 7 ay nag-celebrate ng kanyang 41st birthday si KC Concepcion, pero tahimik ito at walang bonggang party. 

May post nga si KC sa social media kung saan binanggit niya na wala siyang kasamang sinuman sa kanyang pamilya sa araw ng kanyang kaarawan. 

Well, wala man lang bang nakaalala na bumati at samahan si KC Concepcion sa kanyang special day? Nasaan ang kanyang daddy na si Gabby Concepcion?

Nasaan ang kanyang Megastar mom na si Sharon Cuneta? Nasaan ang kanyang malalapit na kaibigan?

Anyway, dahil mature na si KC, hindi na ito madrama sa kanyang kaarawan. Nagpapasalamat na lang si KC sa Diyos na healthy siya at nae-enjoy ang kalayaan bilang single. 

Gayunpaman, umaasa ang mga fans ni KC Concepcion na isang araw ay darating din ang kanyang “the one”, ang kanyang prince charming. Pero wala siyang dapat ipag-alala dahil maraming opportunities na dumarating ngayon sa kanyang buhay. At 41 years old, financially stable na si KC Concepcion at may mga negosyo nang naipundar.

---

DAHIL napakabata pa nila noon, madalas ay nag-aaway sina John Prats at Heart Evangelista nu’ng magkarelasyon pa sila. 

Ani Heart, tinatawag pa siyang maarte ng aktor. Pareho pa silang immature noon kaya humantong sa paghihiwalay ang kanilang relasyon.

Pagkalipas ng mahabang panahon, muling nagkita sina Heart at John. Nai-guest ni Heart ang first BF sa kanyang show sa GMA-7, ang Heart’s World (HW). 

Masaya ang pagkikitang iyon nina Heart at John. Kuwentuhan at kumustahan lang ang nangyari at walang sumbatan sa kanilang nakaraan. 

Ngayon ay pareho na silang masaya sa piling ng kani-kanilang pamilya. 

Kuwento nga ni Heart, siya ang naging tulay upang magkakilala sina John Prats at Isabel Oli na ilang taon nang mag-asawa.

Samantala, naibahagi rin ni Heart kung paano niya pinaghahandaan ang bawat pagrampa niya sa Paris Fashion Week at sa New York Fashion Week. 

Bagama’t libre at may sponsors ang lahat ng isinusuot niyang wardrobe, may glam team naman siyang kanyang pinapasuweldo. Sila ang nag-aayos at nagme-make-up kay Heart sa tuwing rumarampa siya sa Paris at New York. 

Tanging ang kanyang sariling sapatos ang binibili ni Heart dahil small ang kanyang shoe size.

---

NAGTATANONG ang mga viewers ng Pepito Manaloto (PM) kung bakit pasulput-sulpot na lang ang character ni Jessa Zaragoza sa sitcom. Si Jessa ang gumaganap bilang Deedee na anak ni Nova Villa sa kuwento. Kaibigan nila ang pamilyang Manaloto. 

Si Ronnie Henares (as Tommy) ang love interest ni Deedee.

Busy kaya ngayon si Jessa kaya hindi niya maharap ang regular na taping sa PM? Maganda pa naman ang exposure niya at sayang naman kung iiwanan niya. 

Consistent pa naman ang mataas na ratings ng Pepito Manaloto at 15 years na itong napapanood sa GMA-7.

Samantala, marami ang natutuwa kay Clarissa (Angel Satsumi) na nagdalaga na sa set ng Pepito Manaloto. Marami na siyang manliligaw na siyempre ay sinasala at binabantayan nina Elsa (Manilyn Reynes) at Pepito (Michael V.).

30-anyos na, feeling-bagets pa rin… OOTD NI BARBIE, SABLAY, KAILANGAN NG STYLIST

ni Erlinda Rapadas @Teka Nga | April 10, 2026

Photo: IG _barbaraforteza

Bagama’t wala pang pormal na announcement ang GMA Network sa pagsasama nila ni Sharon Cuneta sa isang serye, flattered si Barbie Forteza sakaling matuloy ang proyekto niya with the Megastar. Malaking karangalan para kay Barbie ang makatrabaho ang isang Sharon Cuneta na iniidolo ng lahat at marami siyang puwedeng matutunan kay Mega.

Kakaibang experience para kay Barbie ang makasama ang Megastar ng showbiz. Hindi lahat ng artista ay nabibigyan ng pagkakataon na makasama sa isang proyekto ang icon na tulad ni Sharon. Ngayon pa lamang ay excited na si Barbie sa pagkikita nila.

Samantala, may advice naman ang mga fans kay Barbie. Sana raw ay i-request niya sa GMA-7 na bigyan siya ng isang magaling na stylist na mangangalaga sa kanyang outfit. Thirty years old na si Barbie pero minsan, pang-teeny bopper pa rin ang kanyang mga isinusuot na damit. Kailangan na babagay sa kanyang edad ang kanyang mga outfits upang lumutang ang natural niyang ganda.

---

Itinanggi ng kampo ng Primetime Queen na si Marian Rivera ang balitang lilipat siya sa ibang network at iiwanan na ang GMA-7. 

Ilang beses na rin itong naging blind item sa mga tabloids. Gusto raw ma-experience ng aktres na makatrabaho ang mga aktor sa ibang network, pero walang malinaw na senaryo at negosasyon.

Maaaring inakala lang ng marami na lilipat na si Marian dahil may movie sila ni Dingdong Dantes para sa Metro Manila Film Festival (MMFF) 2026 na ang mga producers ay Star Cinema, APT Productions at Agosto Dos Production. 

Ayon sa malalapit na kaibigan ni Marian ay hindi nito gagawin ang basta na lang iwan ang GMA Network na nagpasikat sa kanya nang husto. Binigyan siya ng magagandang proyekto tulad ng Marimar, Dyesebel, Darna, My Beloved (MB), atbp.. Sa GMA rin sila nagkakilala ng mister niyang si Dingdong Dantes.

Tinangkilik ng mga viewers ang mga shows na kanilang pinagtambalan. Sila ang binansagang Primetime Queen at King ng Kapuso Network.

Dagdag pa rito, walang plano si Marian Rivera na mag-full-time sa paggawa ng serye ngayon. Prayoridad pa rin niya ang pag-aalaga sa dalawa nilang anak ni Dingdong na sina Zia at Sixto.

---

IKINATUTUWA ng mga fans ni Dennis Trillo ang balitang may gagawin siyang movie na ipapasok sa Metro Manila Film Festival (MMFF) 2026. Ang direktor niya ay si Zig Dulay na siyang direktor din ng blockbuster at award-winning movie na Green Bones (GB).

Maganda ang tandem nina Dennis Trillo at Direk Zig Dulay sa pelikula. Tiyak na maganda ang istorya at panlaban na naman ito ng aktor sa MMFF 2026. 

Wala pang ibinibigay na detalye sa movie project at wala pa rin itong titulo at cast na bubuo sa pelikula, pero tiyak na paghahandaan ito nang husto ni Dennis.

Alam niyang mataas ang expectation ng publiko sa bawat pelikulang kanyang ginagawa. 

Malaki ang tiwala ng GMA Pictures sa kakayahan ni Dennis Trillo. Isa siya sa mga pambatong aktor ng Kapuso Network.

---

MAGANDANG balita para sa marami ang pagkakadagdag ni Mark Herras sa cast ng seryeng Firewall. At least, magkakaroon na siya ng regular na serye at kikita na nang maayos para buhayin ang kanyang pamilya.

Makakaiwas na si Mark na madawit sa mga isyu at iskandalo. Nabigyan na siya ng pagkakataon na maisalba ang kanyang showbiz career, thanks to GMA Network. Kaya maging ang mga kasabayan niya sa StarStruck 1 ay masaya sa magagandang oportunidad na dumating sa kanyang buhay ngayon. Wish nilang magtuluy-tuloy na ang blessings ni Mark.

May guest role rin si Mark Herras sa action series na Never Say Die (NSD) na pinagbibidahan nina David Licauco at Jillian Ward. 

Bukod sa seryosong pag-arte, magaling ding sumayaw si Mark Herras kaya binansagang “Bad Boy of the Dance Floor”.

Para iwas-issue raw… MAX, HUMINGI NG BASBAS KAY MARIAN SA PAGSASAMA NILA NI DINGDONG

ni Erlinda Rapadas @Teka Nga | April 9, 2026

Photo: Dingdong Dantes, Max Collins at Marian Rivera - Instagram

Kampante si Max Collins sa kanyang trabaho sa upcoming serye ng GMA-7 na The Mastercutter, kung saan kapareha niya ang Primetime King na si Dingdong Dantes. 

Bago sila nagsimulang magteyping, tinawagan ni Max si Marian Rivera, ang misis ni Dingdong. Ito ay pagbibigay-respeto at upang maiwasan ang anumang isyu sa social media.

Well, masaya si Max dahil may basbas ni Marian ang tambalan nila ni Dingdong. So far, wala namang dapat ipag-alala si Marian dahil ang kanilang proyekto ay trabaho lang, at walang love angle na maaaring mabuo sa promo ng The Master Cutter (TMC).

Samantala, sa guesting ni Max Collins sa Fast Talk with Boy Abunda (FTWBA), ibinahagi niya na napagod na siya at itinigil na ang paghahanap sa kanyang ama. 

Baby pa lang ang aktres nang maghiwalay ang kanyang mga magulang, kaya wala siyang gaanong memories na maalala sa kanyang daddy. 

Besides, hindi rin nag-effort ang kanyang ama na hanapin at kumustahin sila.

---

3 months pinagpapahinga ng doktor…

VICE, HIRAP IWAN ANG IT’S SHOWTIME PARA MAGKAANAK

Napakahirap para kay Vice Ganda ang magdesisyon at pumili kung ano ang kanyang magiging prayoridad — ang manatiling poste ng It’s Showtime (IS) o magbakasyon muna sa show ng tatlong buwan upang maihanda ang kanyang sarili na magkaroon ng anak. 

Handang sumailalim si Vice sa kinakailangang proseso upang ma-preserve ang kanyang sperm cell na gagamitin sa surrogacy procedure. Pero ang advice ng doktor ay kailangan niyang magpahinga sa trabaho nang hindi bababa sa tatlong buwan upang walang stress at tension. Kailangan na physically at mentally healthy siya.

At iyon ay magagawa lamang ni Vice Ganda kung iiwanan niya pansamantala ang IS, isang bagay na mahirap gawin dahil siya ang pinakaposte ng show at kasama sa pagbuo ng mga segments nito. 

Pati sa mga contestants ay si Vice ang nag-aasikaso. Kaya hindi niya afford na magpahinga at iwanan ang show, at hindi pa panahon na piliin niya ang pangarap niyang magkaroon ng anak na kukumpleto sa pamilya nila ni Ion Perez.

---

BIG TIME businesswoman na ngayon si Wilma Doesnt dahil successful ang kanyang Chicks ni Otit, isang 5-star carinderia. Dinarayo na ngayon ang dalawa niyang branches sa Tagaytay at Gen. Trias, Cavite. 

Hands-on si Wilma sa pag-aasikaso kasama ang kanyang hubby na isa ring chef, pati na rin ang kanilang mga anak.

Pasadung-pasado sa kanilang mga customers ang lasa ng mga pagkain. May mga foreigners na rin na nakatikim ng kanilang mga putahe.

Well, hindi makapaniwala si Wilma Doesnt nang ma-feature sa Netflix ang Chicks ni Otit, na malaking exposure para sa kanilang carinderia. Bukod sa masasarap na putahe at maaliwalas na ambiance, ipinagmamalaki niya ang malinis at mabangong restrooms ng kanilang 5-star carinderia.

---

Basta raw masaya sila…

ETHEL, TANGGAP NA ‘DI MAPAKASALAN NG LONG-TIME PARTNER

NINE years nang magkarelasyon sina Ethel Booba at Chef Jessie Salazar, pero hindi pa sila nagpapakasal. Hindi pa kasi annulled ang unang kasal ni Chef Jessie. 

Pero ayon kay Ethel, okey na sa kanya ang kanilang relasyon at masaya at maayos ang kanilang pagsasama.

May mga tampuhan at munting away na pinagdaanan, pero naka-adjust na si Chef Jessie sa kakaibang ugali at character ni Ethel. 

Nagustuhan niya ang pagiging totoo at down-to-earth ng aktres. Kahit na total contrast ang kanilang ugali, ang matagal nilang pinagsamahan ay hindi basta-basta mawawala. 

Sa puntong ito ng kanilang buhay, wala na silang balak na palitan o iwanan ang isa’t isa.