‘Pag nag-aaway sila ni Mariel… SEN. ROBIN, NAGKUKULONG SA KUWARTO AT AYAW KUMAIN

ni Erlinda Rapadas @Teka Nga | July 5, 20255

Photo File: Robin Padilla - IG

Sa isang interview, sinabi ni Sen. Robin Padilla na kapag may away sila ni Mariel Rodriguez at nagtatampo siya, ilang araw siyang nagkukulong sa kanyang kuwarto at hindi kumakain. Para na rin siyang nagpa-fasting.

Pero dinadalhan pa rin siya ng pagkain ni Mariel kahit may tampuhan sila. Iniiwan na lang ni Mariel ang pagkain sa labas ng kuwarto ni Sen. Robin. 

Hindi natitiis ni Mariel ang kanyang mister at patuloy sa pagdadala ng pagkain kahit hindi ito ginagalaw.

Ganunpaman, kapag malamig na ang ulo ni Sen. Padilla ay saka sila nag-uusap ni Mariel. Bilang padre de pamilya, hindi naman siya nagkukulang sa kanyang obligasyon sa mga anak. Sinisikap niyang bigyan ng quality time ang kanyang pamilya. 

Isa rin siyang mapagmahal na anak. Marami ang na-touch nang mapanood ang post ni Sen. Robin kung saan kinakantahan niya ang kanyang ina na si Eva Cariño na nakaupo sa wheelchair. 

Isang madamdaming version ng Anak ni Freddie Aguilar ang inialay ni Sen. Robin sa kanyang mahal na ina.

Malaki ang naging sakripisyo ni Mommy Eva sa kanyang mga anak na lalaki, kaya ngayon ay bumabawi si Sen. Robin Padilla.

---

Turned-off sa nanligaw na aktor noon…

BEA, AYAW SA LALAKING DUGYOT

Importante para kay Bea Alonzo ang personal hygiene ng mga lalaking nagpaparamdam sa kanya. Ayaw na ayaw niya sa dugyot at hindi ito papasa sa kanya kahit gaano pa ito kaguwapo. 

Kuwento ni Bea sa isang interview, may isa raw aktor ang nanligaw sa kanya noon pero na-turn-off agad siya dahil hindi ito malinis sa katawan.

Gusto naman ni Bea ay lalaking mabango na parang baby. Kahit daw hindi masyadong guwapo, basta maalaga sa katawan. 

Naiintriga tuloy ang mga netizens at gustong malaman kung sino ang aktor na tinutukoy niya na dugyot. Naging leading man kaya niya ito sa isa niyang pelikula?

Sayang na sayang si Dominic Roque dahil bukod sa guwapo na ay mukhang napakabango pa at ang linis-linis sa katawan. Hindi nga lang siya kasingyaman ni Bea Alonzo at ‘yun ang setback niya.

---

NAGSU-SHOOTING na ngayon ang cast ng Bar Boys (BB) sequel na After School. Kasama rito sina Carlo Aquino, Kean Cipriano, Enzo Pineda, Odette Khan, atbp.. 

Hindi na nakasama si Rocco Nacino dahil sa unang istorya ng BB ay nag-quit siya sa law school at hindi nagtuloy na maging abogado.

Ang BB ay ipinalabas noong 2017. Ito ay isinulat, idinirek, at co-produced ni Kip Oebanda. 

Well, nagmarka ang role ng veteran actress na si Odette Khan sa movie bilang terror na professor. Malaki ang naging bahagi niya sa buhay ng mga law students na magkakaibigan. 

Nanalong Best Supporting Actress si Odette Khan at kinilala ng iba’t ibang award-giving bodies. Marami sa mga nakapanood noon ng BB ang interesadong malaman kung ano ang naging kapalaran ng mga law students. Nagtagumpay kaya sila sa landas na tinahak? 

‘Yan ang malalaman sa sequel ng pelikula.

---

KAHIT mahigit dalawang dekada na si Michael V. bilang komedyante, hindi pa rin siya nakukuntento at patuloy na nag-iisip ng mga bagong skits para sa sitcom niyang Pepito Manaloto (PM) at Bubble Gang (BG). Gusto niya ay may bago silang ihahandog sa mga viewers upang hindi magsawa ang mga ito sa kanilang programa. 

Almost 30 years na ang BG at 15 years naman sa ere ang PM. Enjoy naman si Michael V. sa kanyang ginagawa.

Kung tutuusin, bibihira sa mga TV shows ang nagtatagal ngayon sa ere. Kaya nagpapasalamat ang PM na patuloy na tinatangkilik ng mga viewers ang kanilang show.

Si Michael V. ang nasa likod ng tagumpay ng PM. Hindi nauubusan ng magaganda at nakakatuwang ideya ang aktor-direktor. 

At maraming viewers ang nakaka-relate sa bawat episode dahil Pinoy na Pinoy ang concept nito at akma sa bagong henerasyon ng mga viewers.

Pinagbawalan na raw ni Atong Ang… SUNSHINE, OUT SA SHOWBIZ, 10 SHOWS ANG TINANGGIHAN

ni Erlinda Rapadas @Teka Nga | July 4, 20255

Photo File: Sunshine Cruz - IG

Magpapahinga muna sa showbiz si Sunshine Cruz at aasikasuhin ang tatlo niyang anak na dalaga na rin ngayon. 

Bibigyan din niya ng panahon na tutukan ang kanyang kalusugan at pagme-maintain ng kanyang sexy figure. 

Sampung projects ang tinanggihan ni Sunshine dahil pahinga muna ang kanyang acting career.

Sey naman ng mga netizens, tiyak na pinagbawalan na ni Atong Ang si Sunshine Cruz na mag-artista mula nang sila ay maging magkarelasyon. Tutal, kaya namang ibigay ng multi-millionaire businessman ang kikitain niya sa pag-aartista, kaya domesticated na si Sunshine ngayon.

Samantala, ayon kay Sunshine ay fake news ang nababalitang hiwalay na sila ni Atong. Okey na okey daw sila at hindi totoo ang kumakalat na tsismis. 

Itinanggi rin ni Sunshine ang mapanirang tsismis na buntis ang isa sa kanyang mga anak na dalaga. Huwag daw basta maniwala sa ganitong balita.

---

MARAMI ang natuwa kay Ivana Alawi nang ipag-shopping niya ang anak ni Katrina Halili na si Katie. 

May mild autism ang anak ni Katrina, pero matalino at malambing.  

Hanga si Ivana sa ginagawang pag-aalaga ni Katrina sa kanyang anak. Proud siya kay Katie at hindi ikinahihiya ni Katrina kapag kasama niya sa pamamasyal sa mall.

Naging magaan ang loob ni Ivana kay Katie, kaya niyaya niya itong mag-shopping. Bukod sa mga toys, nagpabili rin si Katie kay Ivana ng iPhone 15. 

Umabot ng P64,000 ang nagastos ni Ivana sa mga pinamili ng anak ni Katrina. 

Sobrang tuwang-tuwa at nagpasalamat si Katie sa mga regalong kanyang natanggap mula sa kanyang Tita Ivana. Napapa-“sana all” naman ang mga batang gusto rin ng mga laruan at iPhone.

---

MARAMING viewers ang naiintriga nang mag-guest si Barbie Forteza sa Fast Talk with Boy Abunda (FTWBA). May ilan kasing katanungan si Boy na hindi direktang masagot ni Barbie, tulad ng kung may nanliligaw ba sa kanya ngayon. Isang mahiwagang ngiti lang ang naging kasagutan o reaction dito ni Barbie. Kaya iniisip ng mga viewers na meron nga siyang suitors ngayon.

Bakit daw kailangan na ilihim o itago pa ni Barbie kung may mga manliligaw siya ngayon? Single naman siya after ng breakup nila ni Jak Roberto. 

Baka naman pinoprotektahan lang ni Barbie ang love team nila ni David Licauco? Baka mag-react kasi ang mga fans. 

Anyway, deserve naman ni Barbie na magkaroon ng love life at inspirasyon. Marami rin ang nagsasabing blooming ang aktres ngayon kaya tiyak na in love at may nagpapasaya sa kanya. 

Maraming netizens naman ang boto sa tandem nila ni David. Sana raw, si David na ang secret admirer ni Barbie na ayaw pa niyang aminin sa publiko.

---

MARAMI ang nagtatanong kung bakit biglang nanahimik ang mundo ni Andrea Brillantes ngayon. Dati-rati ay marami siyang ganap at pasabog. Hindi siya nauubusan ng issue, lagi siyang talk of the town. Kaya nagtaka ang lahat sa pananahimik ni Andrea.

Wala ba siyang love life ngayon? Dati-rati ay aktibo siya sa pagpo-post sa social media. 

Ano nga kaya ang dahilan at nawala sa eksena si Andrea? Nag-mature na ba siya o napagod na sa mga issues sa kanyang buhay noon?

Well, magaling namang umarte si Andrea at sisikat pa siya nang husto ‘pag nag-level-up ang kanyang pagiging aktres. Makakatagpo rin siya ng lalaking tunay na magmamahal sa kanya nang totoo. Darating sa tamang panahon ang kanyang "the one.”

Tumatayming lang sa ex-GF… JAK, TODO-EFFORT NA BALIKAN SI BARBIE

ni Erlinda Rapadas @Teka Nga | July 3, 20255

Photo File: Barbie Forteza at Jak Roberto - IG

Maraming JakBie (Jak Roberto at Barbie Forteza) fans ang kinilig sa eksenang nagkita at nagkausap si Jak Roberto at ang ex-GF na si Barbie Forteza sa ginanap na red carpet ng Beyond 75 anniversary event ng GMA Network. Hindi sila nag-iwasan at hindi nagdedmahan. 

Masaya rin ang maraming Kapuso stars na makita ang muling pagtatagpo ng JakBie, kaya naman kahit papaano ay nakasilip ng konting pag-asa ang kanilang mga tagahanga. Wish ng mga JakBie fans ay magkaroon ng second chance ang relasyong Barbie at Jak. At mukhang nag-e-effort naman ang aktor na magkaayos na sila ng aktres.

Naghihintay lang siya ng tamang panahon at hinahayaan muna niyang makapag-isip si Barbie ng tamang desisyon at maging malaya.

Well, pareho muna sila ni Barbie na magpo-focus sa kani-kanilang career. Marami pang pangarap si Jak na gustong matupad at ang tanging nagbibigay ng saya at inspirasyon sa kanya ngayon ay natapos na ang ipinagawa niyang dream house at nabili na nila ang kanyang dream car. 

Ang susunod na niyang pag-iipunan ay para sa kanyang investment at negosyo para paghandaan ang kanyang future.

---

MORENONG AKTOR, LAOS NA PERO FEELING-SIKAT ‘PAG KASAMA ANG GF NA AKTRES IN PUBLIC

BLIND ITEM: 

MARAMI na ang nakakapansin sa pagiging OA ng guwapong morenong aktor kapag kasama niya sa mga events ang GF niyang actress. Masyadong clingy at nakabantay o nakabakod si morenong aktor sa kanyang GF kaya turned-off at dismayado sa kanya ang mga fans, maging ang mga reporters at vloggers. 

Kaya sinasabihan tuloy siyang ‘user’ o manggagamit at gusto lang daw mapansin muli dahil lang sa relasyon nila ng GF na young actress. 

Sobrang excited si morenong actor kapag magkasama sila sa mga showbiz events, feeling bagets siya kung kumilos at umasta. Kaya sa halip na hangaan ay nilalait siya ng media at mga vloggers. 

Hindi na gaanong sikat at pinagkakaguluhan ang morenong aktor kaya panay ang dikit sa nobyang young actress, kaya naman nilalayuan o iniiwasan na siya ngayon ng mga vloggers at entertainment press. 

Todo-iwas kasi siya na ma-interview kapag nasa mga showbiz events. Mas matindi pa siya sa mga mas sikat at malalaking actor na hindi namimili ng mga fans.

---

ANG galing-galing ni Kyline Alcantara sa kanyang mga eksena sa seryeng Beauty Empire (BE) kung saan kasama niya sina Ruffa Gutierrez at Barbie Forteza. May pagka-kontrabida ang role ni Kyline bilang si Shai de Jesus na CEO ng isang cosmetic company. 

Mahigpit silang magkaribal ni Barbie sa posisyon, nilalait niya si Noreen Alonzo (Barbie). 

For sure, manggigigil sa galit ang mga fans ni Barbie at iba-bash si Kyline dahil sa kanyang role sa BE. Kaya pakiusap ng mga fans ni Kyline sa GMA Network ay huwag naman laging kontrabida ang ibigay na role sa kanilang idolo. Baka raw ma-typecast si Kyline at kainisan ng mga viewers. Dati rin namang nagbida si Kyline sa ilang serye ng GMA-7. 

Ganunpaman, gusto ni Kyline na maging isang versatile actress kaya tinatanggap niya kahit na kontrabida role. Nagmamarka sa mga viewers ang role na mataray at nang-aapi. Ang mahalaga naman off-camera ay hindi nega at kontrabida si Kyline. Naging magkaibigan nga sila ni Barbie at maging sa lahat ng mga co-stars ay maganda ang kanyang naging pakikisama.