May peace of mind na raw ngayon… GRETCHEN, NEVER NANG BABALIK SA SHOWBIZ

ni Erlinda Rapadas @Teka Nga | January 16, 2026

Photo: File / IG _gretchenbarretto

Matagal nang hindi nagpaparamdam sa lahat si Gretchen Barretto. Dumaan ang Pasko at Bagong Taon na hindi siya namataan sa kahit anong event sa showbiz. Tanging malalapit na kaibigan lamang ang nakakaalam ng mga kaganapan sa kanyang buhay. 

Maging sa social media ay nanahimik si La Greta, kaya walang balita kung ano ang kanyang pinagkakaabalahan ngayon.

Pero natiyempuhan si Gretchen Barretto ng ilang entertainment press sa isang sosyal na resto. At kahit papaano, natanong kung babalik pa ba siya sa showbiz. 

Wala na raw plano ang aktres na bumalik pa sa showbiz. Mas gusto na niya ang buhay niya ngayon na tahimik at walang intriga dahil may peace of mind na siya at iyon ang mahalaga sa kanya.

---

OPEN si Vice Ganda sa pagsasabing mahihirapan siya sa pagdadala ng It’s Showtime (IS) kapag si Anne Curtis ang matagal na mawawala. 

Bagama’t malalaking artista rin ang iba pang hosts ng show tulad nina Ogie Alcasid, Vhong Navarro, Amy Perez, Kim Chiu, Karylle, Jhong Hilario, Darren Espanto, atbp., iba raw ang appeal ni Anne kapag kasama nila sa IS.

Kahit madalas ay nabubulol sa kanyang spiels at sintunado kumanta, gustung-gusto ng mga viewers si Anne. Tinatanggap ng lahat ang kanyang kakulangan bilang host ng show kaya magaan para kay Vice Ganda kapag nasa IS si Anne. 

Pero dahil sa pagpanaw ng ama ng aktres, naka-leave ito ngayon sa show. Naiintindihan ito ng mga kapwa niya hosts ng show at nagparating sila ng pakikiramay kay Anne Curtis.

---

BUKOD sa pag-arte, passion din ni Judy Ann Santos ang pagluluto. Kaya nagsikap siyang itayo ang kanyang resto, ang Angry Adobo. 

Hands-on si Juday sa pagpapatakbo ng kanyang resto business, katulong ang kanyang mister na si Ryan Agoncillo. 

Noong panahon ng COVID pandemic ay sinubok ang kanilang tatag. Kulang sila noon ng staff at maraming restrictions. Tumulong si Ryan sa pagde-deliver ng mga orders. Kahit

paano ay nalampasan nila ang COVID pandemic at nag-survive ang kanilang resto. 

Naging priority ni Judy Ann ang kanyang resto business kaya nalimitahan ang pagtanggap niya ng movie at TV projects. Kinarir niya nang husto ang kanyang resto business at pinalawak pa ang kanyang kaalaman bilang chef.

Ngayon, pangarap ni Judy Ann na mapansin ng Michelin Guide ang Angry Adobo. Gusto niyang ilapit sa masa ang kanyang resto. 

Ang Angry Adobo ay dinarayo na at maging ang kapwa celebrities ay kumakain na rito. Thankful si Juday sa suporta ng mga taga-showbiz sa kanyang resto. Baka next year ay mapansin na ito ng Michelin Guide.

SEXBOMB, GAME MAKIPAG-COLLAB SA BINI

ni Erlinda Rapadas @Teka Nga | January 13, 2026

Photo: File / IG Sexbomb at BINI

Maraming fans ni Jopay Paguia ang nag-panic at labis na nag-alala nang makita ang post sa social media na nasa ER siya ng isang ospital. 

Nagkaroon ng freak accident nang pumasok siya sa isang CR kung saan nabagsakan siya ng tiles sa ulo at likod. 

Nawalan umano siya ng malay at nagtamo ng mga injuries. Namaga ang kanyang left eye at na-sprain ang kanyang left arm. Nagkaroon din siya ng injury sa iba pang bahagi ng katawan.

Agad siyang sumailalim sa CT scan at MRI at hinihintay na lamang ang resulta ng kanyang mga check-up. 

Pinayuhan din si Jopay ng doktor na magpahinga muna sa ospital. Sobrang na-touched siya sa pagbuhos ng mga mensahe at dasal para sa kanyang paggaling.

Overwhelmed din si Jopay sa balitang sold-out agad ang round 5 ng kanilang pre-Valentine concert sa February 7 na gaganapin muli sa SM Mall of Asia (MOA). Kaya nangako siya na magpapagaling agad upang makasama ang mga Sexbomb fanatics na nag-effort pumila para makabili ng tickets.

Samantala, open naman ang Sexbomb Girls sa posibilidad na magkaroon ng collaboration sa BINI. Malaking karangalan umano para sa kanila na makasama sa concert ang sikat na Pop girl group na BINI. Tiyak na magiging umaatikabong dance showdown ito at mas bagay umano kung gagawin sa Philippine Arena.

---

MARAMI ang nagtataka kung bakit bigla na lamang lumutang ang paninira sa pagkatao ng Kapuso actress na si Jennylyn Mercado. 

May mga lihim kayang naiinggit sa kanya dahil happily married siya kay Dennis Trillo at maganda ang takbo ng kanyang career?

Pilit umanong pinalalabas na masama ang ugali ni Jen kaya hindi raw siya makasundo ng pamilya ni Dennis. May paratang pa na apat na taon na raw siyang hindi dumadalaw sa kanyang mga in-laws at hindi raw siya nag-e-effort na mapalapit sa mga magulang ng kanyang mister.

Agad namang dinepensahan ni Dennis ang kanyang pretty wifey at nilinaw na wala raw problema ang relasyon ni Jen sa kanyang pamilya. 

Nakiusap din ang aktor sa mga bashers na tigilan na ang paninira sa kanila. Maging ang kanilang manager na si Becky Aguila ay ipinagtanggol din si Jen laban sa mga maling akusasyon.

Simula nang sumikat si Jennylyn Mercado ay hindi siya nakitaan ng maangas na ugali o attitude. Hindi rin siya feeling big star at marunong siyang makisama sa kanyang mga co-stars. 

Tiyak din na hindi papayag si Dennis Trillo na balewalain ng aktres ang kanyang mga magulang. May mga naiinggit lang talaga na gustong manira.

---

WALANG inggit na nararamdaman ang Kapuso star na si Althea Ablan kahit mabilis na sumikat sina Jillian Ward at Sofia Pablo. 

Magkakasama silang tatlo na nagbida noon sa top-rated afternoon soap na Prima Donnas (PD) na umere mula 2019 hanggang 2022.

Wala rin sa isip ni Althea na mahigpit niyang kakumpitensiya sina Jillian at Sofia. Alam niyang hindi siya pababayaan ng GMA Network at bibigyan siya ng mga proyektong babagay sa kanya.

Sa mga drama series nais luminya ni Althea. Magkakaibigan sina Althea, Jillian, at Sofia at wish niya na makatrabaho muli ang dalawa. 

Open din ang aktres sa status ng kanyang love life. Karelasyon niya ang Kapuso actor na si Prince Clemente. Una silang nagkatrabaho sa My Fantastic Pag-ibig (MFP) ng GMA-7 noong 16 years old pa lamang si Althea.

Nang tumungtong siya sa edad na 18, saka naging seryoso si Prince sa panliligaw at nagpaalam pa ito sa mga magulang ni Althea. 

Pitong taon ang tanda ng aktor kay Althea Ablan, pero swak sila sa maraming bagay kaya hindi naging hadlang ang kanilang age gap.

Pinauso ng bagong dyowa ni Daniel… HALF BANGS NI KAILA, GINAGAYA NA NG NETIZENS

ni Erlinda Rapadas @Teka Nga | January 12, 2026

Photo: File / IG Kaila Estrada

May pinausong hairstyle ngayon si Kaila Estrada na ginagaya ng mga Gen Z. Naaliw sila sa napakataas na bangs ng aktres. 

Bumagay naman sa kanya ang hairstyle dahil medyo malapad ang kanyang noo. 

Para naman sa iba, sophisticated at pang-fashion model ang kakaibang hairstyle ni Kaila kaya kahit bina-bash siya dahil sa malapad na noo, hindi niya ito pinapansin.

May ilang supporters naman ang aktres  na nagsasabing galing umano sa kampo ni Kathryn Bernardo ang mga bashers na naninira sa kanya. 

Gayunpaman, ang importante ay kalmado at hindi nagpapaapekto si Kaila Estrada sa mga nanlalait sa kanya.

---

Ibang naging BF, inamin…

AIKO, ‘DI SINERYOSO SI BISTEK 

Nang mag-guest si Aiko Melendez sa Fast Talk with Boy Abunda (FTWBA), isa sa mga naitanong sa kanya ng King of Talk ay tungkol sa kanyang love life. 

Apat ang kanyang naging seryosong karelasyon. Ito ay sina Jomari Yllana, Martin Jickain, Patrick Meneses at Jay Khonghun.

Nagpakasal sila noon ni Jomari at may isa silang anak. Na-annul ang kanilang kasal nang sila ay maghiwalay. 

Nagpakasal din si Aiko kay Martin, pero nauwi rin sa annulment ang kanilang kasal. 

Marami naman ang tumutol nang maging karelasyon niya si Patrick.

Pinakamatagal niyang naging boyfriend si Jay na 8 years niyang nakarelasyon. Last year (2025) sila naghiwalay.

Ayon kay Aiko, sa kanyang mga naging boyfriends, si Jomari ang pinakapasaway at sutil. Si Patrick naman ang pinakamayaman. 

Pero teka, ang alam namin ay naging boyfriend din ni Aiko Melendez si Herbert Bautista noong mayor pa ang huli ng Quezon City. Hindi ba iyon seryosong relasyon? 

Just asking…

---

ALAM ng buong showbiz ang love story nina Snooky Serna at Albert Martinez during their Regal days. Sila ang may pinakaswak na chemistry on and off camera. 

Marami ang kinilig sa kanilang tambalan at umasa ang mga fans na sila ang magkakatuluyan.

Pero aminado si Snooky na marami silang pinagdaanang problema ni Albert sa kanilang relasyon. Para silang aso’t pusa na laging nag-aaway. Muntik na silang magtanan noon matapos ang matinding away habang nasa shooting ng isa nilang movie sa Regal Films.

Naawa rin noon si Mother Lily Monteverde sa kanilang sitwasyon kaya pina-packup niya ang shooting upang makapag-heart-to-heart talk sina Snooky at Albert, pero hindi rin sila nagkatuluyan. 

Nakilala ni Albert si Liezl Muhlach, anak ni Amalia Fuentes. Sila ang nagkatuluyan at matagal na nanirahan sa USA. 

Sa kabila ng matinding pagtutol ni Amalia, ipinaglaban nina Liezl at Albert ang kanilang pagmamahalan. 

Ngunit nagkasakit si Liezl at maagang nabiyudo si Albert Martinez.