Idol daw niya… SHUVEE, SOBRANG PROUD NA IKINUKUMPARA KAY MELAI

ni Erlinda Rapadas @Teka Nga | August 14, 2025

Photo: Shuvee at Melai sa Kuan On One - YT / ABS CBN

Sobrang proud ang Pinoy Big Brother (PBB) Celebrity Collab Edition housemate na si Shuvee Etrata nang ikumpara siya ni Direk Johnny Manahan kay Melai Cantiveros. Malaking privilege raw para sa kanya ang ihalintulad kay Melai na kanyang iniidolo. 

Well, nasubaybayan ni Shuvee ang pagsikat ni Melai mula nang maging Big Winner sa PBB. Pareho silang Bisaya at mahilig magpatawa kaya marami ang naaaliw kina Melai at Shuvee. 

Sey naman ni Melai, napakaganda ni Shuvee at matalino pa. Pero para kay Shuvee, si Melai ang patunay na ang mga babaeng Bisaya na napadpad sa Maynila ay hindi lang pagiging yaya ang kayang gawin. Puwede rin silang sumikat at kayang pumantay sa iba. 

Hindi sila papayag na api-apihin at tapak-tapakan ng sinuman tulad ni Shuvee Etrata na palaban sa buhay at hindi agad sumusuko sa hirap at mga pagsubok na kanyang pinagdaanan bago nakamit ang tagumpay.

---

EXCITED at masayang-masaya ang StarStruck 4 Ultimate Female Survivor na si Kris Bernal sa kanyang pagbabalik sa Kapuso Network. 

Pumirma ng kontrata si Kris sa Sparkle GMA Artist Center at muling gagawa ng serye. Hindi niya akalain na muli pa siyang makakabalik sa GMA Network. 

Taong 2019 nang siya ay mag-lie-low sa kanyang showbiz career at nagpakasal sa businessman na si Perry Choi. Biniyayaan sila ng isang anak na babae. 

May sarili ring negosyo si Kris — ang SHE Cosmetics. Nauna rito ay may coffee shop siya at burger house. 

Well, buhay-prinsesa si Kris sa piling ng kanyang rich hubby na si Perry.

Ipinagpatayo siya ng mansion at panay ang travel nila abroad. 

Marami ang naiinggit sa kanyang magandang suwerte pero nami-miss ni Kris ang pag-arte. At very supportive naman ang kanyang mister at pinayagan siyang balikan ang kanyang acting career. 

Sayang nga lang at wala na sa GMA Network si Aljur Abrenica na dati niyang ka-love team. Puwede sana silang muling magtambal. Nag-click noon ang kanilang tambalan.

---

MALAKING hamon sa kakayahan ni Direk Johnny Manahan a.k.a. Mr. M ang kanyang pagpasok sa Kapatid Network, ang TV5. Muling masusubok ang pagkakaroon ni Mr. M ng Midas’ touch. Marami siyang pinasikat na artista noong bahagi siya ng ABS-CBN (Kapamilya Network). 

Si Direk Johnny ang humubog sa malalaking artists noon ng ABS-CBN tulad nina Bea Alonzo, John Lloyd Cruz, Piolo Pascual, Kim Chiu atbp.. 

May mata si Mr. M kung sinu-sinong baguhan ang may potensiyal na sumikat at may talent sa pag-arte. Kay Direk Johnny ipinagkatiwala ng ABS-CBN ang lahat ng kanilang malalaking artista at hindi nabigo si Mr. M na pasikatin ang mga ito. 

Magaling din siya sa strategy at mga gimmicks kung paano ilapit ang mga artista sa mga fans at kung paano i-promote ang mga pelikula ng Star Cinema. 

Nang magsara ang ABS-CBN, sa GMA Network naman napunta si Direk Johnny. Dito ay ginabayan niya ang mga baguhang artista at nabuo ang GMA Sparkle Artist Center. 

Nang matapos ang kanyang kontrata sa Kapuso Network, sa TV5 (Kapatid Network) napadpad si Mr. M. Ipinamahala sa kanya ang musical show na VIBE. 

May mga netizens ang nagpayo na dapat nang tumuklas ng kanilang sariling roster of talents ang TV5 na maaalagaan at pasisikatin ni Direk Johnny Manahan. 

Good idea ‘yan!

---

RIGHT decision para kay TJ Marquez ang kanyang pagpirma ng kontrata sa GMA Sparkle Artist Center. Matagal din naman siyang Kapuso artist, lumabas na siya sa ilang serye ng GMA-7. Naudlot lang ang pagsikat niya nang husto dahil mas pinili niya at naging prayoridad ang mga offer na shows abroad. Mas luminya si TJ sa kanyang pagiging singer/performer. 

Pero ngayon, na-realize ni TJ na puwede naman niyang pagsabayin ang kanyang acting at singing career. Pinayuhan din siya ng mga kaibigang Kapuso actors na balikan ang kanyang pag-arte at mag-concentrate rito. Maging ang mga fans ni TJ Marquez ay natutuwa sa desisyon niyang magbalik sa GMA Network. Kayang-kaya naman niya na makipagsabayan sa mga sikat na mga Kapuso stars.

Bukod sa namudmod ng groceries, laptop, cash, etc… IVANA, NAG-DONATE NG TIG-P50 K SA MGA MAYSAKIT

ni Erlinda Rapadas @Teka Nga | August 13, 2025

Photo: Ivana Alawi - YT

Patuloy ang pagiging good Samaritan ng top influencer-actress na si Ivana Alawi sa pagse-share ng kanyang mga blessings sa mga nangangailangan. 

Bukod sa pamimigay niya ng bigas, groceries, cellphones, tablets, laptop, at cash na ayuda, dumalaw din siya sa ilang government hospitals upang magbigay ng medical assistance sa mga pasyente. 

Nagbigay siya ng P50,000 sa bawat pasyente na nangangailangan ng gamot at pambayad sa operasyon. 

Ang ganitong charity work ay regular na ginagawa ni Ivana bilang bahagi ng kanyang pasasalamat sa mga natatanggap niyang biyaya. 

Kaya naman, napapa-“Sana all” na lang ang kanyang mga natutulungan. Bibihira sa mga celebrities ngayon ang tumutulong sa mga kapuspalad. Ang ilang mayayamang artista ay todo-display lang ng kanilang collection ng luxury bags, alahas, cars at panay ang travel abroad. 

Kahit sa panahon ng kalamidad ay iilan lang ang dumaramay sa mga nasalanta, pero si Ivana ay consistent sa kanyang pagtulong. 

Kaya naman, kahit na anong intriga at kontrobersiya ang ibinabato kay Ivana Alawi ay hindi naaapektuhan ang kanyang career. Ang natatandaan at nagmamarka sa lahat ay ang ginagawa niyang pagtulong sa mahihirap.

---

Maraming kasamahang artista ang nakikiramay at nakikisimpatya ngayon kay Rufa Mae Quinto sa pagpanaw ng kanyang mister na si Trevor Magallanes. 

Biyuda na ngayon ang sexy comedienne at ang tanging nagbibigay sa kanya ng lakas ng loob ay ang kanyang unica hija na si Athena.

Bagama’t naghiwalay sila ni Trevor, walang sinuman sa kanila ang nag-file ng annulment. Dito sa ‘Pinas sila nagpakasal ni Trevor.

Nasa bansa ang aktres nang ibinalita sa kanya ang pagpanaw ng kanyang mister kaya agad siyang bumalik sa USA kasama ang anak na si Athena. 

Well, hanggang ngayon ay naghihintay pa rin ang lahat sa official statement ni Rufa Mae at ng pamilya ni Trevor Magallanes sa tunay na dahilan ng pagkamatay nito. 

Una nang humiling si Rufa Mae ng privacy para sa kanilang pagluluksa sa pagpanaw ng kanyang mister, alang-alang na rin sa kanyang anak. 

Pero, marami pa ring lumulutang na kuwento sa tunay na istorya, ganoon din sa ilang isyu sa pera na naiwan ni Trevor Magallanes. 

May bali-balita rin na ang bahay at mga sasakyan na naiwan ni Trevor ay sa kanyang anak na si Athena mapupunta at may parte na ido-donate niya sa charity. 

Ganunpaman, walang reaksiyon dito ang kampo ni Rufa Mae. Sa panahon ng kanyang pag-aartista, kahit papaano ay nakaipon at nakapagpundar naman siya. In fact, napag-aral niya sa kolehiyo ang kanyang mga kapatid at mga pamangkin kaya maganda ang naging buhay ng mga ito. 

Karamihan sa kanila ay nasa USA na at nasa ibang bansa ang iba. ‘Yun ang malaking naitulong ni Rufa Mae Quinto sa kanyang pamilya. At no regrets siya sa buhay kahit hindi naging masaya ang kanyang married life.

---

NAPAKASUWERTE ni Shaira Diaz dahil sa maikling panahon na naging bahagi siya ng programang Unang Hirit (UH) ng GMA-7 ay agad siyang minahal ng lahat ng mga hosts ng show tulad nina Arnold Clavio, Susan Enriquez, Suzie Entrata-Abrera, Lyn Ching-Pascual, Connie Sison at Ivan Mayrina. 

Napaka-humble, simple at down-to-earth kasi ni Shaira at siya ang “Sunshine Girl” ng UH. 

Ang gaan-gaan ding katrabaho at game sa lahat ng assignments na ipinagagawa sa kanya. 

Kaya naman, lahat ng UH hosts ay natutuwa sa kanilang pagpapakasal ng kanyang longtime BF na si Edgar Allan Guzman. Binigyan pa sila ng UH ng napakabonggang pre-wedding celebration, ang despedida de soltera sa mismong show. 

May natanggap din silang regalo mula sa mga hosts ng UH. 

Ganoon kamahal ng UH si Shaira Diaz at hindi ito malilimutan ng bride-to-be. 

Ilang araw na lang at ganap nang Mrs. Guzman si Shaira Diaz. Tiyak na mami-miss siya ng mga viewers kapag pansamantalang nag-leave sa UH pagkatapos ng kanilang kasal ni EA.

---

‘Di lang wais kaya never yumaman…

JANICE, UMAMING NAGING KABIT NG PULITIKO, MILITAR, AKTOR AT BUSINESSMAN

MARAMI ang nagulat nang diretsahang aminin ng dating sexy star na si Janice Jurado na naging mistress siya ng ilang sikat na personalidad. May pulitiko, may military man, may popular na aktor, businessman atbp..

Kakaiba siyang klase ng mistress dahil hindi niya inaagaw ang mister ng iba, nakikihati lang siya sa panahon at pagmamahal ng mga lalaking naugnay sa kanyang buhay. 

Pero marami ang nagsasabing hindi wise at hindi materyosa (materialistic) si Janice. Kung ginusto lang niya ay mayaman na sana siya ngayon dahil puro rich ang mga lalaking kanyang nakarelasyon. 

Pero ni hindi nga siya nagkaroon ng sariling bahay at kotse, hindi umangat ang kanyang buhay dahil hindi siya nagsamantala. 

Nang magka-breast cancer siya ay kung kani-kaninong artista siya lumapit para humingi ng medical assistance. 

Isang malaking himala na naka-survive si Janice sa kanyang sakit. 

Well, madiskarte siya sa buhay at napakasipag kaya hanggang ngayon ay nakaka-survive siya sa mga hamon ng buhay kahit madalang ang projects. Maraming artista ang patuloy na tumutulong sa kanya dahil marunong siyang makisama.

Ex-P-Du30, binanatan sa concert… VICE, NAWALAN NG 1 M SUPPORTERS, ENDORSEMENTS IBOBOYKOT DIN NG DDS

ni Erlinda Rapadas @Teka Nga | August 12, 2025

Photo: Vice Ganda - IG

Bina-bash ngayon ng mga DDS supporters ang comedian/host na si Vice Ganda dahil sa ginawa nitong pagbanat sa dating Pangulong Rodrigo Duterte sa kanyang ginanap na concert sa Araneta Coliseum kasama si Regine Velasquez. 

Hindi raw katawa-tawa ang spiel ni Vice tungkol kay ex-PRRD. Maraming DDS supporters ang dismayado dahil sa ginawa nitong pagkutya at pambabastos sa dating pangulo na ngayon ay matanda na at may sakit. 

Wala raw sa lugar at hindi napapanahon ang pagpapatawa ni Vice. Dahil sa ginawa niyang ito, isang araw pagkatapos ng kanyang concert sa Big Dome, nabawasan agad ng 1M ang kanyang followers sa Facebook (FB). 

Nag-trending sa social media si Vice Ganda at tiyak na araw-araw ay mas marami pa ang bibitaw at hindi na hahanga sa kanya. 

Nangunguna sa pagbatikos ngayon kay Vice Ganda si Harry Roque at tiyak na malaki ang impluwensiya niya sa mga DDS. May ilang grupo ng mga supporters ni ex-PRRD ang nagsabing ibo-boycott nila at hindi tatangkilikin ang mga produktong ineendorso ngayon ni Vice Ganda.

---

MAY latest update ngayon sa status ng kalusugan ni Kris Aquino. Nadagdagan na naman daw ang kanyang autoimmune disease at bumaba ang kanyang blood pressure, kaya kailangan niya ng intensive isolation at dapat na ilipat sa ibang lugar. 

Iiwan na ni Kris ang private beach resort na kanyang tinirhan ng dalawang buwan. Ililipat siya sa kanilang family compound sa Tarlac. Doon siya ia-isolate for 6 months. 

Samantala, nagpaabot ng pasasalamat si Kris sa lahat ng doktor, nurses at staff ng Makati Medical Center at St. Luke’s BGC sa kanilang pag-aalaga at malasakit sa kanya. Sasailalim sa kanyang bagong treatment si Kris habang nasa isolation. 

Kasama pa rin niya ang kanyang mga anak na sina Bimby at Joshua pati na rin ang private nurse at doctors. 

Nagpapasalamat din si Kris sa lahat ng taong patuloy na nagdarasal para sa kanyang paggaling. Patuloy siyang lalaban at hindi susuko para sa kanyang mga anak at sa taong nagmamahal sa kanya.

---

MARAMI ang nagsasabing phenomenal ang pagsikat ng Pinoy Big Brother (PBB) housemate na si Shuvee Etrata dahil sa sobrang atensiyon na ibinibigay sa kanya ng lahat. Kung saan-saang TV shows na siya napapanood dahil sa kanyang kasikatan. 

Well, patuloy ang dating ng mga offers sa kanya upang maging endorser. Ang kanyang mga fans ang gumastos nang malaki para sa kanyang billboard sa New York, USA at maging sa NAIA Terminal 3 ay may malaking billboard din si Shuvee na ginastusan ng kanyang mga tagahanga. 

May gumawa rin ng Shuvee mascot at Shuvee dolls na mabenta sa mga fans. Ganunpaman, may ilang mga netizens naman ang nagsasabing overexposed na raw si Shuvee. Baka raw maumay na ang mga tao sa kanya at pagsawaan siya agad. Dapat ay hindi raw nakababad si Shuvee sa telebisyon. Okey na ‘yung mga mall shows to

promote her endorsements. 

Well, kung dati ay pinagtatawanan at tinatawag si Shuvee na ‘Starlet ng Kamuning Network’, ngayon ay marami na ang humahanga sa kanyang ganda, talino at pagiging palaban. Hindi na siya mabu-bully at dededmahin ng ibang artista. 

Samantala, may ilan naman ang nagpapayo na kailangan ni Shuvee na magabayan siya sa kanyang finances ngayong marami na siyang endorsements. Kailangan na may mag-manage ng kanyang kinikita upang matiyak na makakaipon siya para sa future ng kanyang pamilya. 

For sure, hindi naman pababayaan si Shuvee Etrata ng GMA Network. Sisikat pa ito nang husto kapag naalagaan ang kanyang career.

---

Todo-displey sa socmed… P10 M DIAMOND RING NI BEA, BIGAY DAW NI VINCENT

TRUE kaya na P10 million ang halaga ng engagement ring na bigay ni Vincent Co kay Bea Alonzo? 

Recently, may lumabas na post sa social media na idinispley ni Bea ang kanyang kamay na may suot na diamond ring at may caption na ito na raw ang pinakamahal na engagement ring na kanyang natanggap. 

Pero may ilang mga netizens ang nagdududa dahil wala pa namang formal na announcement sina Bea at Vincent na engaged na sila. Kaya abangers ang lahat kung totoo o fake news ang tungkol sa P10M engagement ring ni Bea. 

Pero ang totoong nakikita ng publiko ay madalas nang magkasama sina Bea at Vincent sa mga showbiz events. Sabay silang nanood noong concert nina Vice

Ganda at Regine Velasquez sa Araneta Coliseum. 

Well, for sure, hindi na magpapa-hard to get si Bea Alonzo kapag inalok na siya ng

kasal ni Vincent Co. Pareho na silang nasa tamang edad at gusto na rin niyang bigyan ng apo ang kanyang Mommy Mary Anne.