Kaya away-away na ang magkakapatid… PAULO, SINULSULAN DAW SI KIM SA NEGOSYO

ni Erlinda Rapadas @Teka Nga | August 19, 2025

Photo: Kim Chiu at Paulo Avelino - IG

Labis na ipinagtataka ng mga fans ni Paulo Avelino kung bakit nadadamay ang aktor sa nagaganap na away ni Kim Chiu at ng kanyang mga kapatid. 

Bakit daw ibinabagsak ang sisi sa aktor kung nagawa man ni Kim na magtanong sa kanyang Ate Lakam tungkol sa financial status ng kanilang mga negosyo? 

Kahit sabihin pang magkapatid sila ni Lakam, karapatan pa rin ni Kimmy na alamin ang kinikita ng kanilang negosyo na milyon ang kanyang ipinuhunan.

Pero ayon sa ilang malalapit sa pamilya nila, nagbago raw ang ugali ni Kim mula nang dumating sa buhay niya si Paulo. Malaki ang tiwala ng aktres sa kanyang Ate Lakam kaya ipinaubaya niya rito ang pamamahala sa kanilang negosyo. 

Ngunit naisipan nga ni Kim na alamin ang financial status ng kanilang negosyo at labis niyang ikinalungkot ang natuklasan niya.

May ilang nagsasabi na baka si Paulo ang nagsulsol kay Kim na alamin ang takbo ng kanilang negosyo. At ‘yun nga, nagkakagulo na ang kanyang mga kapatid at nag-unfollow na sa isa’t isa sa Instagram (IG). 

Gulung-gulo ngayon ang isip ng Chinita Princess kung ano ang gagawin sa sitwasyon. Mabuti na lamang at dinamayan siya ng BFF niyang si Bela Padilla at ni Direk Lauren Dyogi na pinuntahan pa siya sa Cebu para sa moral support.

---

MUKHANG naging malaking impluwensiya si Coco Martin kay Gerald Anderson kaya nakaisip na rin itong magdirek sa telebisyon. 

Pinag-aralan munang mabuti ni Gerald ang mga aspeto ng pagdidirek bago siya sumabak. Kinausap din niya ang ilang magagaling na direktor na kanyang nakatrabaho para makakuha ng tips kung paano magdirek sa telebisyon. Kaya naman sa seryeng Sins of The Father (SOTF), sinubukan na ni Gerald ang kanyang kaalaman at kakayahan sa pagdidirek. 

Para naman sa mga fans niya, maganda ang hakbang na ito ng kanilang idolo. Panahon na upang subukan ni Gerald na mag-excel sa ibang larangan na konektado sa showbiz. Matagal na rin siya sa movie industry at kaya na niyang magdirek sa telebisyon.

Tulad ni Coco Martin na direktor ngayon ng Batang Quiapo (BQ), walang pormal na edukasyon si Gerald sa larangan ng pagdidirek pero natuto siya. Maging ang ilang de-kalibreng veteran stars ay nagsasabing pasado ang aktor bilang direktor.

---

SA isang episode ng House of D (HOD) na napapanood sa YouTube (YT), nabanggit ni Kristine Hermosa na kapag nag-aaway o nagkakatampuhan sila ni Oyo Sotto ay hindi ito nagso-sorry kahit siya ang may kasalanan. 

Matigas daw ang loob ng mister kaya si Kristine na lang ang unang nakikipagbati. 

Ginagawa niya ito upang hindi na tumagal ang tampuhan nila ni Oyo, at ‘yun ang sikreto kung bakit tumagal ang kanilang pagsasama.

Kailangan daw na malawak ang pang-unawa at mahaba ang pasensiya ng isang misis. 

Samantala, napag-usapan din sa HOD ang tungkol sa prenup agreement, lalo na kung

parehong may properties na naipundar ang magkasintahan. 

Para kina Kristine Hermosa at Oyo Sotto, hindi sila pabor sa prenup agreement. Kung anuman ang kanilang naipundar bago nagpakasal ay pag-iisahin nila para sa future ng kanilang mga anak.

---

SA darating na Linggo, August 24, ay idaraos ang Philippine Movie Press Club (PMPC) 37th Star Awards sa VS Convention Center. 

Star-studded ang awards night at dadaluhan ng malalaking artista. Bibigyan din ng pagkilala ang ilang veteran TV personalities (Lifetime Achievement Awardees) tulad nina Caridad Sanchez, Ariel Ureta, Geleen Eugenio, Malou Choa Fagar at Angelique Lazo.

Magbibigay din ng cash incentive sa tatanghaling Best Actress at Best Actor ng 37th Star Awards for TV, sponsored by Bingo Plus. 

May premyo ring ibibigay ang online casino sa sinumang makakahula kung sino ang tatanghaling ‘Star of the Year’. 

Si Vivian Blancaflor ang magdidirek ng 37th Star Awards for TV.

Bagong gupit, goodbye-bigote na rin... SEN. ROBIN, KAGALANG-GALANG NA ANG HITSURA

ni Erlinda Rapadas @Teka Nga | August 21, 2025

Photo: Sen. Robin Padilla - FB

Maraming natuwa sa new look ngayon ni Sen. Robin Padilla. Mas pogi raw ito sa kanyang clean cut, pormal at kagalang-galang tingnan. 

Isa sa mga madalas pansinin noon kay Sen. Padilla ng kanyang mga bashers ang kanyang long hair at bigote na sinasabing hindi angkop sa isang senador na tulad niya.

Ngayon, lahat ay masaya at pinupuri ang hitsura niya. 

Pero ang susunod na babantayan sa kanya ay ang mga batas na kanyang ihahain sa Senado.

Simula’t sapul ay may mga senador na minamaliit ang kakayahan ni Sen. Robin dahil hindi siya nakatapos ng anumang kurso. Isa lang siyang sikat na artista na iniidolo ng milyun-milyong Pilipino na bumoto sa kanya, kaya siya ang nanalong No. 1 senator noong 2022 elections.

Pero sa gitna ng panlalait at paghamak sa kanyang katauhan, hindi nakaramdam ng insecurity si Sen. Robin. Nanaig ang kanyang pagmamalasakit upang damayan at ipaglaban ang mga mahihirap niyang kababayan.

---

SAYANG at hindi nakadalo si Phillip Salvador sa ginanap na Pandesal Forum sa Kamuning Bakery recently. Marami pa namang media people ang naghihintay kay Kuya Ipe dahil hindi na siya nagpakita sa publiko pagkatapos matalo sa midterm elections.

Napag-alaman namin na nasa Subic si Phillip at may mahalagang commitment kaya hindi siya nakarating kung saan tinalakay ang tungkol sa anomalya sa mga flood control projects at ang palpak na pagboto ng mga OFWs (Overseas Filipino Worker) abroad.

Mabuti na lang at naroon si Atty. Ferdie Topacio kaya buhay na buhay ang talakayan ng mga imbitadong panelists. 

Si Atty. Topacio ay appointed Deputy Speaker ng PDP (Partido ng Demokratikong Pilipino). Aktibo siya ngayon sa paglahok sa malalaking isyu sa pulitika at lipunan.

Si Atty. Topacio rin ang paboritong kunin ng mga celebrities na may kaso o gustong magsampa ng kaso. In the news palagi kapag siya ang may hawak ng kaso at pini-pick-up ng lahat ng TV network at diyaryo. 

Nakapag-produce na rin siya ng ilang pelikula kaya natanong namin kung may balak ba siyang gumawa ng movie para sa 2025 Metro Manila Film Festival (MMFF).

Well, ayaw daw at wala sa plano niya ang sumali sa MMFF this year. Kailangan daw kasi na bongga at gagastusan nang malaki ang entry upang may laban sa iba.

---

USO pa rin si Roderick Paulate at marami pa ring natutuwa sa brand ng kanyang comedy. Marami pa rin siyang tagahanga at hindi siya nalilimutan ng publiko kahit mahigit apat na dekada na siya sa showbiz. Nasa mainstream pa rin ang komedyante at ka-level ng malalaking artista.

Matagal siyang naging co-host noon ni Vilma Santos sa TV show, ganoon din kay Megastar Sharon Cuneta. 

Klik din ang tandem nila ni Carmi Martin. Masang-masa ang pagpapatawa ni Roderick at bentang-benta ang kanyang character bilang beki.

Kumita sa takilya ang mga pelikula niyang Kumander Gringa (KG), Zombadings, Dead na si Lolo (DNSL), atbp..

Nagpahinga man siya pansamantala sa paggawa ng pelikula nang pumasok siya sa pulitika, taglay pa rin ni Roderick ang karisma sa pagpapatawa.

At sa pelikulang Mudrasta: Ang Beking Ina (MABI), muli niyang pinatunayan ang husay niya sa comedy. 

Kinakabahan man, excited naman siya dahil tiyak na magugustuhan ito ng mga moviegoers.

May ilang nagkukumpara kina Roderick at Vice Ganda. Pero para kay Dick, magkaiba sila ni VG ng style sa pagpapatawa. 

Tanggap naman ni Roderick Paulate na sikat na sikat ngayon si Vice Ganda. Pero may kani-kanya silang grupo ng tagahanga na hindi bumibitaw kahit may mga bagong komedyante.

Ngayon pa lang daw sinisiraan na… SEN. ROBIN, ‘DI TATAKBO SA MAS MATAAS NA POSISYON

ni Erlinda Rapadas @Teka Nga | August 18, 2025

Photo: Sen. Robin Padilla - FB

Para sa aktres na si Nadia Montenegro, politically motivated at isang demolition job ang pag-aakusa sa kanya ngayon na diumano’y gumagamit ng marijuana sa loob ng restroom sa Senado. Pero sa ganitong isyu, dapat ay may matibay na ebidensiya at CCTV footage upang mapatunayan.

Dating may cancer si Nadia at kamakailan lang ay gumaling at naka-recover. Makakasama sa kanyang kalusugan ang paggamit ng droga. 

Ganunpaman, minabuti ng opisina ni Sen. Robin Padilla na bigyan ng leave sa trabaho si Nadia habang iniimbestigahan pa ang kaso. Hindi nag-resign si Nadia bilang staff ng senador.

Ayon sa mga supporters ni Sen. Robin, bahagi ng demolition job laban sa senador ang mga akusasyon kay Nadia. Nauna nang maraming alegasyon ang ibinabato kay Sen. Robin na wala raw naisusulong na batas sa Senado at ni hindi siya nagiging bahagi ng mga debate at pagtalakay sa mga isyu.

Samantala, sa isang interview ay sinabi ni Sen. Robin na wala siyang balak tumakbo sa mas mataas na posisyon sa 2026 elections. Tatapusin lang daw niya ang kanyang termino bilang senador at tutulong sa kandidatura nina Vice President Sara Duterte at Sen. Imee Marcos kung saan siya ang tatayong campaign manager.

Dagdag pa ni Sen. Robin, hindi dapat ma-insecure sa kanya ang ibang pulitiko dahil babalik na siya sa kanyang mundo, ang showbiz at hindi na muling sasabak sa pulitika. 

Marami ring taga-showbiz ang nagpapasalamat sa kanya dahil sa tulong na ibinigay niya sa mga maliliit na manggagawa sa industriya ng pelikula.

---

NAPAKA-CUTE, smart at bibung-bibo si Baby Peanut, anak nina Jessy Mendiola at Luis Manzano. Kuhang-kuha nito ang mga features ng kanyang Mommy Jessy, kaya naman tuwang-tuwa ang Star for All Seasons at Batangas governor na si Vilma Santos sa kanyang artistahing apo.

Pangarap daw ni Gov. Vi na magkasama sila ni Baby Peanut sa isang commercial, maaari ring kasama nila si Mommy Jessy. Kahit saang anggulo tingnan, maganda si Baby Peanut at namana pa nito ang kulut-kulot na buhok ni Gov. Vilma.

Ayon sa aming nalaman, noon pa ay may offers na kay Baby Peanut para gumawa ng commercial para sa ilang baby products. Pero ayaw pa nina Jessy at Luis na ma-expose nang husto ang kanilang anak. 

Gayunpaman, kung may mag-offer na pagsamahin sina Gov. Vilma at Baby Peanut sa isang commercial, tiyak na mahihirapang tumutol sina Jessy Mendiola at Luis Manzano.

---

Ikinukumpara kay Pia…

HEART, MAS NAGIGING IN DEMAND BILANG ENDORSER

EKIS na sa buhay ni Heart Evangelista ang kanyang dating glam team na lumipat kay Pia Wurtzbach. Hindi na ito pinag-aksayahan ng panahon ni Heart matapos siyang iwanan ng mga taong ilang taon din niyang itinuring na malapit sa kanya.

Para maalis ang bigat sa dibdib, tinanggal na ni Heart ang galit at tampo, ayaw na niya ng negativity sa kanyang buhay. 

Maging ang gap at kompetisyon nila ni Pia Wurtzbach ay tinuldukan na rin niya, hindi na niya papatulan ang pagkukumpara sa kanila ng 2015 Miss Universe.

Walang dahilan upang ma-insecure si Heart kapag pareho silang nasa fashion events ni Pia. Nararamdaman niya ang importansiyang ibinibigay sa kanya sa New York, Paris at Milan. 

Well, paalis na naman si Heart para dumalo sa Milan Fashion Week.

Napatunayan ni Heart Evangelista na sa pag-alis ng negative thoughts, pumapasok naman ang magagandang blessings. Malalaki ang bago niyang endorsements ngayon, mas tumataas ang premium ng kanyang career at lalo siyang nagiging in demand bilang endorser.