MRT-3, humirit uli ng dagdag-pasahe

ni Mai Ancheta | July 4, 2023

Humirit ng dagdag-singil sa pamasahe ang operators ng Metro Rail Transit-3 para sa mga commuters ng kanilang mga train.

Ayon kay Department of Transportation Assistant Secretary for Railways and MRT-3 Officer-in-Charge Jorjette Aquino, muling naghain ng petisyon ang operators ng MRT-3 para magtaas ng singil sa pamasahe.

Nauna nang naghain ng petisyon ang MRT-3 noong Enero subalit hindi inaksyonan dahil sa isyung teknikal.

Mula sa kasalukuyang P11 na boarding fee, nais ng MRT-3 na gawin itong P13.29, habang P1.21 naman sa distance fee kada kilometro mula sa pisong sinisingil sa kasalukuyan.

Huling nagtaas ng pamasahe ang MRT-3 noong 2015.

Matatandaang inaprubahan ang fare hike ng Light Rail Transits 1 at 2 na magsisimula sa Agosto 2, 2023.

Inaasahang ilalabas ng DOTr ang magiging desisyon sa petisyon ng MRT-3 sa loob ng dalawang buwan dahil isasailalim pa umano ito sa masusing konsultasyon at pag-aaral.

Taas-singil sa kuryente

ni Mai Ancheta | June 22, 2023

Humirit ng dagdag-singil sa kuryente sa Energy Regulatory Commission (ERC) ang 48 power distributors sa Luzon, kabilang na ang Meralco.

Nakapaloob ito sa hirit na rate adjustment o automatic cost adjustment ng 48 distribution utilities sa Luzon na regular adjustment ng mga utility kada tatlong taon.

Kapag natuloy, 22 centavos per kilowatt hour ang sisingilin sa mga power customer.

Ayon kay Joe Zalderiaga ng Meralco, mayroon silang mga dapat habulin na binayaran na nila gaya ng generation charge, transmission charge, system loss, subsidies, taxes at iba pa.

Sinabi naman ni ERC Chairperson Monalisa Dimalanta, dadaan sa masusing pag-aaral ang kahilingan na tatagal ng dalawa hanggang tatlong buwan.

Presyo ng gulay, tumaas na naman

ni Jeff Tumbado | May 9, 2023

Ilang mga produktong agrikultura gaya ng mga gulay at sibuyas ang tumaas ang presyo ng bentahan sa mga pampublikong pamilihan sa Quezon City.

Nabatid sa isang consumer group, nasa P160 hanggang P180 na ang presyo ng sibuyas kada kilo noong mga nakaraang buwan na nasa P120 lamang.

Hindi pa masabi ng ilang mga nagtitinda sa palengke ng Nepa QMart ang rason ng pagtaas sa presyo ng sibuyas, pero ang nakikita nilang rason ang kakulangan ng supply ng imported na sibuyas.

Mga lokal na sibuyas lamang ang nakikitang marami ang supply.

Problema naman ng ilan sa lokal na sibuyas, marami ang mga bulok sa deliveries. Kaya para makabawi, tinataas nila ang presyo.

Samantala, nasa P10 hanggang P20 kada kilo ang itinaas sa presyo ng ilang mga pangunahing gulay.

Sa mga gulay Tagalog naman may nasa P15 kada kilo ang itinaas.