BSKE postponement, hahamunin sa Supreme Court

by BRO @News | September 27, 2026

Photo: Bongbong Marcos / Facebook

Hahamunin sa Supreme Court ang bagong batas na nagpaliban sa barangay at Sangguniang Kabataan elections (BSKE) sa 2028 at nagpalawig sa termino ng mga kasalukuyang opisyal.

Ayon kay election lawyer Romulo Macalintal, maghahain siya ng petition para kuwestiyunin ang tatlong taong dagdag sa termino ng incumbent barangay at SK officials nang walang panibagong halalan.

Nilagdaan ni Pangulong Ferdinand Marcos Jr. ang Republic Act No. 12326 noong Setyembre 24, na naglipat sa BSKE mula Nobyembre 2, 2026 sa Nobyembre 13, 2028.

Kinuwestiyon din ng ilang election watchdog at civil society groups ang timing ng postponement dahil kasabay ito ng 2028 presidential at national elections.

Mark at Joel, ‘di kasama... Alan, 8 pang senador nagpasaklolo sa SC vs. Win

ni Mylene Alfonso @News | June 17, 2026

Photo: Alan Peter Cayetano - FB

Dumulog sa Korte Suprema si Senador Alan Peter Cayetano kasama ang walong iba pang senador upang hilingin na ideklarang walang bisa ang sesyon ng Senado noong Hunyo 3, 2026 kung saan nahalal si Senador Sherwin Gatchalian bilang Senate President Pro Tempore.

Sa kanilang 87-pahinang petisyon para sa certiorari, hiniling ni Cayetano at nina Senators Loren Legarda, Pia Cayetano, Jinggoy Estrada, Bong Go, Rodante Marcoleta, Imee Marcos, Robin Padilla, at Camille Villar na ipawalang-bisa ang naturang sesyon dahil sa umano’y mga paglabag sa proseso.

Hiniling din ng mga petitioner sa Korte Suprema na maglabas ng isang status quo ante order upang maibalik ang kalagayan at mga kondisyon bago ang mga kinukuwestiyong pangyayari na nagsimula noong Hunyo 3.

Kabilang din sa mga naghain ng petisyon si Atty. Jose Luis Montales, na nagsilbing Senate secretary sa ilalim ng pamumuno ni Cayetano.

Hindi naman kabilang sa mga naghain ng petisyon sina Senators Mark Villar at Joel Villanueva.

Ang paghahain ng petisyon ay naganap sa gitna ng nagpapatuloy na usapin sa pamunuan ng Senado, kung saan nananatiling sentro ng kontrobersiya ang mga pagbabago sa liderato ng Mataas na Kapulungan.

Abogadong si Falcis, sinuspinde ng SC

ni Jeff Tumbado @News | June 16, 2026

Photo: Atty. Jesus Falcis - Just The Truth

Sinuspinde ng Korte Suprema si Atty. Jesus Nicardo Falcis III dahil sa paggamit umano ng malaswang pananalita sa isang social media post na tumutukoy sa mga tagasuporta ng aktres at tinaguriang Queen of all media na si Kris Aquino.

Sa inilabas na pahayag ng Office of the Spokesperson ng Supreme Court, naglabas ng desisyon ang Second Division ng Korte Suprema, sa panulat ni Associate Justice Jhosep Y. Lopez, na nagtatakda kay Falcis na guilty sa kasong simple misconduct.

Pinatawan si Falcis ng isang taong suspensyon.

Nag-ugat ang kaso sa isang post ni Falcis sa Twitter (ngayon ay X), kung saan mariin niyang ipinagtanggol ang kanyang kapatid na si Nicko Falcis laban sa reklamong qualified theft na inihain ni Aquino.

Sa naturang post, gumamit umano si Falcis ng mga mapanlait na salita laban sa mga taong umano’y kumakampi kay Aquino.

Dahil dito, naghain ng reklamo si Jason Gene Baltao, dating business partner ni Aquino, sa Integrated Bar of the Philippines (IBP), na inakusahan si Falcis ng asal na hindi angkop sa isang abogado.

Sa kanyang depensa, iginiit ni Falcis ang kanyang karapatan sa malayang pananalita at binanggit ang ilang naunang desisyon ng Korte Suprema na kumikilala sa ilang pagmumura bilang karaniwang pagpapahayag ng galit o pagkadismaya at hindi paninirang-puri.

Gayunman, mariing ibinasura ng Korte Suprema ang naturang depensa.

Binigyang-diin nito na malinaw na saklaw ng Code of Professional Responsibility and Accountability (CPRA) ang asal ng mga abogado, kabilang ang kanilang mga kilos at pahayag sa social media.

Iginiit ng Mataas na Hukuman na bagama’t ginagarantiyahan ng Konstitusyon ang kalayaan sa pagpapahayag, may hangganan ito para sa mga abogado dahil sa kanilang sinumpaang tungkulin bilang mga opisyal ng hukuman.

Pinuna rin ng hukuman ang paggamit ni Falcis sa terminong “dilawan,” na ayon dito ay lalo lamang nagpapalalim sa hidwaang pampulitika sa halip na magtaguyod ng maayos na talakayan.

Dahil nakabinbin pa noon ang kaso, sinabi ng Korte na nagbigay ito ng maling impresyon na maaaring insultuhin ng mga abogado ang kabilang panig at ang kanilang mga tagasuporta.