100 pamilya, nasunugan

ni Gina Pleñago @News | April 30, 2026

Photo: Nasa 100 pamilya ang nasunugan sa Muntinlupa City. (Gina Pleñago) 

Nawalan ng tirahan ang nasa halos 100 pamilya sa naganap na sunog sa residential area sa Lungsod ng Muntinlupa kahapon ng umaga.

Base sa ulat ng tanggapan ni Muntinlupa City Mayor Ruffy Biazon, alas-6:45 ng umaga nang sumiklab ang sunog sa Hacienda Purok 2, Brgy. Sucat.

May hinala na ang sanhi umano ng sunog ay ilegal na koneksyon ng kuryente.

Umabot sa ikatlong alarma ang sunog, alas-8:05 na umabot hanggang sa Purok 3 dahil sa lakas ng hangin na sinabayan ng mga pagsabog na hinihinalang dulot ng mga tangke ng liquefied petroleum gas (LPG).

Nakontrol ang sunog alas-11 ng umaga na umabo sa mahigit 40 kabahayan at tuluyang naapula ang apoy alas-11:40 ng umaga.

Samantala, 2nd degree burn naman ang tinamo ng 50-anyos na si “Joseph” kung saan nalapnos ang likod nang tangkaing isalba ang mga gamit sa nasusunog na bahay.

Sabay sa araw ng eleksiyon... Sunog malapit sa public school sa Iloilo

ni Zel Fernandez | May 9, 2022

Kasagsagan ng eleksiyon nang magsimulang sumiklab ang sunog sa Iloilo City nitong umaga ng Mayo 9.

Pasado alas-5:00 ng umaga, naalarma sa sunog ang mga residente sa isang bahagi ng Brgy. Rizal La Paz, Iloilo City, hindi kalayuan sa La Paz Elementary School.

Sa nabanggit na paaralan nagsasagawa ng halalan kaya agad ding rumesponde ang mga miyembro ng Bureau of Fire Protection (BFP) upang maapula ang apoy.

Kasalukuyan nang inaalam ng mga awtoridad ang sanhi ng sunog at ang bilang ng mga apektadong residente.

4 todas, 2 missing sa sunog sa Caloocan City

ni Lolet Abania | May 5, 2022

Apat ang nasawi habang dalawa pa ang nawawala matapos ang sunog sa isang residential area sa Maypajo, Caloocan City ngayong Huwebes.

Ayon sa initial report ng Caloocan City Central Fire Station, sumiklab ang sunog sa C. Namie Street sa Barangay 37, na umabot sa unang alarma nang alas-12:51 ng tanghali.

Batay sa ulat, sa apat na namatay, dalawa sa kanila ay natagpuan sa labas ng kanilang bahay, kabilang ang isa na nadiskubre sa ilalim ng nasunog na L300 van.

Tatlo pang bahay ang naapektuhan ng sunog bago idineklarang under control nang ala-1:22 ng hapon habang fire out naman nang ala-1:40 ng hapon, ayon sa Bureau of Fire Protection (BFP).

Nabatid na nahirapan ang mga awtoridad na apulahin ang apoy dahil sa isang live wire ang nakaharang sa kanilang daraanan.

Agad ding nakipag-ugnayan ang BFP sa Manila Electric Company (Meralco) para putulin ang suplay ng kuryente sa lugar.

Patuloy ang mga awtoridad sa paghahanap sa mga nawawalang biktima, habang inaalam na rin ang naging dahilan ng sunog.