Salvino pasok sa swimming team na sasabak sa ASIAD

by MC @Sports News | June 30, 2026

Photo: Dagdag lakas para sa Pinay tankers ang pagkakabilang ni Filipino-American swimmer Teia Isabelle Salvino (gitna) sa paglarga sa international competition, kasama sa larawan ang kanyang coach at si Philippine Aquatics Inc. Sec-Gen Eric Buhain. (FBpix) 

Nadagdagan ng tibay ang kampanya ng Pilipinas para sa 2026 Asian Games matapos opisyal na makapasok sa pambansang koponan si Filipino-American swimmer Teia Isabelle Salvino nang malampasan ang qualifying standard sa women's 100-meter backstroke sa katatapos na Philippine Aquatics, Inc. (PAI) National Tryouts sa Rizal Memorial Sports Complex sa Maynila. 

Nagtala ang 20-anyos na student athlete ng University of Alabama ng oras na 1:02.34 upang dominahin ang paboritong event at malampasan ang itinakdang qualifying standard na 1:02.60. Tinalo niya sina Palarong Pambansa standout Quendy Fernandez (1:03.72) at SEA Games veteran Chloe Isleta (1:04.48). Malaking dagdag-lakas si Salvino sa national team na sasabak sa Asiad sa Set. 19-Okt. 4 sa Aichi-Nagoya, Japan. 

Bukod sa panalo sa 100m backstroke, naghari rin si Salvino sa 50m backstroke (29.35 segundo), 100m freestyle (57.34) at 100m butterfly (1:07.71). Muntik maabot ang qualifying standard sa butterfly event, na kinapos lang ng segundo. 

Ayon kay Philippine Aquatics Secretary General Eric Buhain, malaking tulong ang pagpasok ni Salvino sa national team. "Napakalaking dagdag si Teia sa Asian Games team. Ang kanyang exposure sa mataas na antas ng kompetisyon, lalo na sa US collegiate circuit, ay magiging mahalaga sa ating paghaharap sa pinakamahuhusay na manlalangoy sa Asya," ani Buhain. 

Idinagdag pa ni Buhain na optimistiko ang Philippine Aquatics sa lalim ng talento ng mga Pilipinong manlalangoy na bubuo sa pambansang koponan. Makakasama ni Salvino sa national team sina Sanchez, isang Filipino-Canadian Olympian; Chua, Isleta at White, na pawang naghatid ng mga gold medals sa 2025 SEA Games. 

Namukod-tangi rin sina Chloe Isleta sa 200m freestyle (2:04.59) at 200m backstroke (2:19.11), Xiandi Chua na namayani sa 50m freestyle (26.49) at 400m freestyle (4:31.95).

Bomer ng Kenya champ uli sa 10-Miler Series Manila

ni Anthony E. Servinio @Sports | June 29, 2026

Photo: PBA

Umulit si Evans Bomer ng Kenya bilang kampeon sa Manila Leg ng Rexona 10-Miler Series 2026 kahapon ng umaga sa Quirino Grandstand. Binuo ng kanyang kababayan Pamela Bundotich ang doble kampeonato sa pagwagi sa panig ng kababaihan.

Umoras si Bomer ng 52:45 at sundan ang kanyang tagumpay sa Pasay Leg noong Marso 29. Pumangalawa si Eduard Flores sa 54:09 at pangatlo si Ritchie Estampador sa 56:58.

Bumawi si Bundotich sa kanyang pagiging pangalawa lang sa Pasay at tinapos ang karera sa 1:03:10. Sumunod si Maricar Camacho sa 1:08:04 at higitan din ang pagiging pangatlo sa Pasay City habang pangatlo si Meljoy Gonzales sa 1:08:30.

Nasubukan ang mga kalahok sa rutang dumaan sa Roxas Boulevard at tumuloy sa Jones Bridge. Umikot sa Intramuros kasama ang bagong tulay sa Binondo bago bumalik sa Luneta.

Sa 10 kilometro dinaig ni Christian Pandili (42:40) sina Orly Sevilleno (43:13) at Shen Dandred Hernando (46:42). Panalo sa kababaihan ang beteranang si Jocelyn Elijiran (45:35) at iniwan ang mga kabataan Rika Hasebe (51:11) at Rovie Jay Angcona (56:51).

Pumaspas sa limang kilometro si Jaren Ganan (17:30) para mabigo si Daren Diestro (17:43) habang malayong pangatlo si Kristoffer Sison (19:15). Pinakamabilis sa kababaihan si Kaye Villanueva (20:58) at sinundan nina Jo Punay (22:28) at Jessica Wilczak (23:39).

Ang mga nalalabing yugto ng serye ay sa QC (Agosto 16), Makati (Setyembre 13) at Iloilo (Nobyembre 29). Puntirya ng mga mananakbo na magawaran ng malaking Conquerors Medal kung tatapusin ang 10 milya sa lahat ng pitong yugto at mas maliit na medalya para sa apat na karera sa Metro Manila.

Manila Klasiko Dragon Boat silver sa 800M Nanchang Fest

by MC @Sports News | June 26, 2026

Photo: Ang Manila Klasiko Dragon Boat team nang maka-silver medal sa Nanchang Dragon Boat Festival sa China. (fbpix) 

Sumungkit ng silver medal ang Manila Klasiko Dragon Boat team sa 800m International Club Group Dragon Boat small boat Category na idinaos sa Wuliangye Cup 2026 sa Nanchang International Dragon Boat Race sa China.  

Ang dalawang araw na sagwanan nitong Hunyo 13-14 sa Nanchang ay ikaapat nang pandaigdigang karera na nilahukan ng grupo kung saan ang unang international race ng koponan ay sa Italya kung saan sumabak sila sa Club Crew World Championship at nakapasok sa semifinals.

Halos anim na buwang preparasyon ang ginawa ng koponan, apat na beses sa isang linggo at tig-2 oras ang kanilang training.  Naging malaking challenge din sa grupo ang pinansiyal na kapasidad at mga iskedyul sa kani-kanilang trabaho. 

Anila, "Lahat naman ay deserve makasama sa international races pero kulang sa pondo. Kaya kapag International Races mas maganda if invitational race para hindi gaanong mabigat ang gastusin. Kaya naman ginagawa lahat ng MANILA KLASIKO na mapahusay ang performance ng bawat miyembro sa sport na Dragon Boat para makakuha ng mga sponsors."

Nanguna para sa gold ang Malaysia Kuching DBT — 03'50"089, pumangatlo ang USA RunDe DBT — 04'09"931 at pang-apat ang Italian Stallion DBT — 04'10"934 sa karera. 

"When we heard about Nanchang, we are excited, this is our first time, our expectation here in China are very high. We will do our best to get the no. 1. We are practicing more, because we are preparing for the next world championship, but this one is very great, " ayon sa panayam sa facebook kina head coach Rommel at team president Hepe bago ang karera.