Diaz-Naranjo ikinatuwa ang pangarap na w'lifting sa Palaro

ni Gerard Arce @Sports News | May 26, 2025

Photo: Masayang sumalampak sa stage matapos ang Opening Ceremony ng Palarong Pambansa sa Ilocos Norte si Tokyo Olympics gold medalist Hidilyn Diaz-Naranjo bago kapanayamin ng Bulgar Sports. (GA) 

Laoag City – Tuluyan na ngang naisakatuparan ang matagal na pangarap ni first-ever Olympic gold medalist winner Hidilyn Diaz-Naranjo na magisnan at ganapin ang weightlifting sa 65th edisyon ng Palarong Pambansa sa Ilocos Norte.

Sapul nang makamit ng bansa ang kauna-unahang gold medal sa Summer Olympic Games sa 2020+1 Tokyo Olympics, ninanais na ito na mailagay sa nangungunang grassroots sports development ng bansa upang madagdagan at masundan ang yapak ni Diaz-Naranjo sa pandaigdigang kompetisyon, higit na sa Olympiad.

Lubos ang pagpapasalamat ni Diaz-Naranjo at maging ni Samahang Weightlifting ng Pilipinas (SWP) President Monico Puentevella sa Department of Education (DepEd), sa pamumuno ni Sec. Juan Edgardo “Sonny” Angara, sa ibinigay na malaking pagkakataon upang maging demonstration event ang palakasan. Ang weightlifting ay may 70 atleta mula sa 10 dibisyon (tig-lima sa boys and girls) mula sa 9 na rehiyong kalahok na pinangunguhan ng   Zamboanga Region na pinagmulan ni Diaz.

“I should be thankful na ngayon andito na as a demo sports, kase I just realized na like this year na na-approved siya this February, na na-realize ko na hindi ganun s'ya kadali ma-approved, it’s not like that na you have to go down and spread the sports sa district mismo, so there’s a lot of district,” pahayag ni Diaz kahapon. “Hoping next year na ma-realize na maging regular sports sana mas maging marami pa na maging 10-15 regions na and then sana maging 150 athletes, sana maging goal tayo. And more technical officials and more knowledge and education for coaches.”

Nagpasalamat din si Puentevella sa DepEd upang makatagpo muli ng mga susunod sa yapak ni Diaz-Naranjo at Olympian weightlifters na sina Elreen Ando, Vanessa Sarno at John Ceniza na sumabak naman sa 2024 Paris Olympics.

“This is the first step of a thousand miles. For many years, I was promised the sun and the moon by DepEd. Finally, I’m grateful to my compadre and sportsman, Sec. Angara for making this essential step for our Olympic champ Diaz, for helping SWP in this long-awaited quest. We shall soon have more champions together with Batang Pinoy our Future,” pahayag ni Puentevella sa mensahe nito sa Bulgar Sports kahapon, na binigyang papuri si Diaz-Naranjo sa pagsisikap nito para sa local federation.

Palarong Pambansa pormal nang binuksan, w'lifting demo sports

ni Gerard Arce @Sports News | May 25, 2025

Photo: Palarong Pambansa - RTVM

Laoag City – Simbulo ng kadakilaan at pagkakaisa ang naging sentro ng atensyon sa Opening Ceremony ng 65th Palarong Pambansa na pinangunahan ni Pangulong Ferdinand “Bong Bong” Marcos, habang naging parte rin ng pagdiriwang ang kauna-unahang Pinay Olympic gold medalist Hidilyn Diaz-Naranjo kagabi sa Marcos Memorial Stadium (FEMMS) dito.

Nagpahayag ng kanyang makahulugang mensahe si PBBM bilang pormal na pagbubukas ng mga na naglalayong makabuo ng malawak na kahusayan sa sports ang mga kabataan. Pinamunuan ni Diaz-Naranjo ang Oath of Coaches at Technical Officials, bilang unang Technical Director ng demonstration sports na weightlifting. Ang baseball prodigy na si Gerick Jhon Flores, record-holder sa 11th BFA U12 Asian Baseball Championship ay maghahatid ng Athlete’s Oath.

Dumaan sa kahabaan ng Rizal Street at Sirib Mile sa Laoag City ang Parada ng may 15,000 atleta mula sa 17 rehiyon ng bansa  kasabay ang masaya at nagsisiglahang drum and lyre corps kasama ang mga student cheer squads.

Ang host na Region 1 kasama ang National Sports Academy (NAS), Philippine School Overseas, Bangsamoro, Region IV-B, Region II (Cagayan Valley), Cordillera Administrative Region, Region XIII (Caraga), Region IX (Zamboanga Peninsula), Region V (Bicol), Region X (Northern Mindanao), Region XII (Soccsksargen), Region VIII (Eastern Visayas), Region III (Central Luzon), Region VII (Central Visayas), Region XI (Davao Region), Region VI (Western Visayas), Region IV-A (Calabarzon) at ang dalawang dekada ng kampeon na National Capital Region.

 Binuksan din ang simbolikong sulo ng Palarong Pambansa nina dating Palaro athletes SEA Games, at Paralympians na sina Jemmuelle James Espiritu (Archery), Mark Anthony Domingo (Athletics), Jesson Cid (Decathlon), Roger Tapia (Para-athletics), at Eric Ang (Trap Shooting).

Feeling Superman daw… PACQUIAO, BABAWIIN ANG NATALO SA ELEKSIYON, BALIK-BOXING

ni Ambet Nabus @Let's See | May 24, 2025

Photo: Team Pacquiao

O, ayan na nga. Mayroon nang July 19 na playdate ang pagbabalik-boxing arena ni Manny Pacquiao.

Makakalaban ni Manny si WBC Welterweight Champion Mario Barrios sa MGM Grand sa Las Vegas, USA.

Mismong sa Facebook (FB) account ni Manny inilabas ang balita kaya naman samu’t sari na naman ang mga bashing na inabot ng itinuturing na Pambansang Kamao.

Siyempre pa, lahat ng mga nega opinion ay may kinalaman sa paghahangad muli ng ‘pera’ ni Manny na gaya nga ng mga balita ay tila raw nauubos na.

Sa pagkatalo ni Manny sa muling pagpalaot nito sa pulitika kamakailan, marami talaga ang nagsabi na magbabalik-boxing ito dahil ito ang ‘easiest way’ upang maibalik niya ang kanyang pagiging economically rich. 

Hindi na raw ito usapin ng fame or honor dahil once na ma-prove niyang keri pa niyang manalo, kusang lalapit daw ang mga economic opportunities mula sa mga endorsements hanggang sa iba pang pagkakakitaan.

Ang boxing world naman ay parang hindi na ganu’n ka-excited sa naturang match. May mga nagsasabing hindi madaling laban ang gagawin ni Manny at tila madaling makakalimutan ng kasaysayan ang mga previous victories niya.

Meron pa ngang nagpayo sa boxer na magpa-check-up na ito ng utak dahil mukhang sobra na raw itong naalog at naapektuhan para ipagpalagay niyang isa siyang ‘Superman’.

Balik-Freddie Roach at Buboy Fernandez training si Pacman na sinasabi rin ng mga new gen of boxing fans na dapat din ay nag-retire na.

Well…

---

PINAG-UUSAPAN ngayon ang naging matinding pagbuhos ng emosyon ni Alden Richards.

Matindi dahil first time na nagsalita ang aktor sa kondisyon ng kanyang mental health na noong 2024 nga raw sumadsad nang grabe. As in ‘rock bottom’, ayon pa sa deskripsiyon ni Alden.

Siyempre pa, marami ang naalarma sa ibinahagi ni Alden dahil isa nga naman siya sa mga kilalang personalities na may maituturing na most successful career sa showbiz.

Sa likod pala ng mga magagandang ngiti at tawa na ‘yan ay nakatago ang isang bahagi ng emosyon at pag-iisip ni Alden na konektado sa depresyon.

Isang napakahirap na sitwasyon na nangangailangan ng expert in the field para mai-address nang tama.

Grabe rin ang pagkagulat ng lahat nang kuwestiyunin ni Alden na bakit daw kasi dapat na i-equate sa pagkakaroon ng love life ang kaligayahan o kasiyahan ng isang tao?

Hmmm… marami na rin kaming mga nakitang personalidad o kahit mga ordinaryong tao na hindi agad-agad nako-contain ang mga ganyang isyu sa sarili. ‘Yun bang kapag nasa work ka o nasa harap ng mga tao, may naipapakita kang ibang parte ng pagkatao mo, and yet, kapag nag-solo ka na lang, doon na lahat naglalabasan ang mga tanong kung masaya ka ba talaga o may mga tanong na hindi mo masagot. 

‘Yung mga biglaang atake ng anxiety, ng kalungkutan, ng belongingness and the like, yes, mental issue nga ‘yun na hindi dapat balewalain.

---

KAYA hahangaan mo rin ang isang gaya ni Nadine Lustre.

Sure kaming matindi rin ang epekto sa kanya ng mga nega comments and bashing kaya naman minarapat na niyang sampahan ng kaso ang mga gumagawa nito sa socmed (social media).

Pormal na ngang nag-file si Nadine ng kasong paglabag sa Safe Spaces Act laban sa ilang indibidwal at grupong umaatake sa kanya.

Ayon pa sa aming napag-alaman, ang Safe Spaces Act o Republic Act No. 11313, na kilala rin bilang Bawal Bastos Law ay batas na naglalayong protektahan ang bawat indibidwal laban sa gender-based sexual harassment sa iba’t ibang lugar — kabilang ang mga pampublikong espasyo, paaralan, lugar ng trabaho, at online platforms — mula sa anumang uri ng pang-aabuso o pambabastos.

Wala kaming mga nakuhang pangalan o grupo ng mga tao na specifically sinampahan ng kaso ni Nadine, pero malalaman daw natin in the coming days ang mga update hinggil dito.

No less than si incoming Mamamayang Liberal (ML) Partylist representative Leila de Lima ang unang nagpahayag ng suporta sa aksiyon ni Nadine, pati na rin ang iba pang mga nag-iisip na ring ‘sampulan’ ang mga bullies sa socmed at iba pang sakop ng Bawal Bastos Law.