NCR overall champion sa 66th Palarong Pambansa, 91 golds

ni Elyssa Nichole @Sports | June 1, 2026

Photo: Circulated

PROSPERIDAD, Agusan del Sur - Wala pa ring makapigil sa tikas ng National Capital Region (NCR) kaya naman nanatiling overall champion ang mga ito sa 66th Palarong Pambansa na nagtapos kahapon dito.

Kumolekta ang NCR ng 91 golds, 71 silvers at 71 bronze medals sapat upang tiyakin ang pang-19 sunod na pangkalahatang kampeon sa event na inorganisa ng Department of Education at sa pakikipagtulungan ng Philippine Sports Commission, (PSC) sa pamumuno ni chairman Patrick "Pato" Gregorio.

Nakopo ng Region IV-A (CALABARZON) ang pangalawang puwesto matapos kumalawit ng 55 na ginto, 50 na pilak at 60 na tanso habang nasilo ng Region XI (Davao Region) ang third place (33G, 32S, 34B).

Malaking kontribusyon ang perfect seven gold medals para sa NCR ang nilangoy ni swimmer Patricia Mae Santor.

Nabingwit ng Region VII (Central Visayas) ang pang-apat na puwesto sa hinakot na 32 golds, 30 silvers at 44 bronze medals habang pang-lima ang Region VI (Western Visayas) na may 31,36,45 ginto, pilak at tanso.  

Samantala, bumilib si Quezon City Mayor Joy Belmonte sa laki at ganda ng pasilidad ng Media central ng bumisita ito kasama si Agusan del Sur Vice Governor Patricia Anne Plaza noong Sabado ng gabi.

Pinuri ng alkalde ng QC ang matagumpay na pagdaos ng nasabing event sa Agusan del Sur.

"Ang galing, congratulations this is really big achievements," nakangiting pahayag ni Belmonte.

Kaya asahang mas pabobonggahin ni Belmonte ang 67th Palarong Pambansa sa susunod na taon 2027 kung saan ay ang Quezon City ang magiging punong abala.    

POC general assembly sususpendihin ang PNVF

by Gerard Arce @Sports News | May 31, 2026

Photo: POC

Asahang papatawan ng suspensiyon ng Philippine Olympic Committee (POC) ang pamunuan ng Philippine National Volleyball Federation (PNVF) sa General Assembly sa Hunyo kasunod ng nakuhang parehong hatol mula sa International Volleyball Federation (FIVB) at napipintong pagtanggal ng suporta ng Philippine Sports Commission (PSC).

Inihayag ni national Olympic body head Atty. Abraham “Bambol” Tolentino na nakarating sa kanya mula sa liham ng FIVB ang suspensiyon ng PNVF, na pinabulaanan din ng Asian Volleyball Confederation dahil sa pag-alis nito ng suporta kay AVC president Ramon “Tats” Suzara, na siya namang dating pangulo ng federation.

Sinabi ni Tolentino na ang pagsususpinde ng POC sa PNVF ay naaayon sa nasasakupan nitong mga national sports association (NSA), dahil kinikilala ng POC ang mga pambansang pederasyon o mga hindi sumasalungat sa kanilang mga internasyonal na pederasyon. “The POC will abide by the decision of the IF,” pahayag ni Tolentino. “It’s their internal rules, but the POC will always be for the welfare of the athletes, their developmental program and the Olympic movement.”

Inilahad ng FIVB na agaran ang epekto ng umano’y suspensiyon sa PNVF, na pinamumunuan ni Tony Boy Liao, dulot umano ng; “decision follows serious governance concerns and multiple purported violations of the FIVB Code of Ethics which are currently under investigation by the independent FIVB Ethics Panel.”

Lumikha rin ang FIVB ng isang Ad Hoc Committee na; “ensure stability and proper governance during this suspension” and to “temporarily oversee the affairs of the PNVF in accordance with the FIVB General Regulations.”

Binubuo ang kumite ng limang FIVB officials na may sensitibong responsibilidad, maliban kay Alexa Dabao na siyang Legal Contractor sa Pilipinas ng FIVB. Nakatakdang humingi ng paglilinaw si Tolentino, pinuno rin ng cycling federation sa bansa mula sa FIVB sa konteksto ng pagkuha ng Ad Hoc Committee sa mga responsibilidad ng PNVF.

Tanker Santor most bemedalled ng NCR sa Palarong Pambansa

ni Elyssa Nichole @Sports | May 30, 2026

Photo: Circulated

PROSPERIDAD, Agusan del Sur - Kinulimbat ni tanker Patricia Mae Santor ng National Capital Region ang lahat ng 7 event na sinalihan upang maging most bemedalled sa 66th Palarong Pambansa na ginaganap dito.

Sinisid ni 18-year-old Santor ang gold medal sa 100 meter Butterfly ng Secondary Girls 13 and Over matapos ilista ang tiyempong 1:04.09 minuto kahapon sa event na suportado ng Department of Education sa tulong ng Philippine Sports Commission, (PSC) sa pamumuno ni chairman Patrick "Pato" Gregorio. "I really had high expectations. That’s my only goal for this season. It's my last year," sabi ni Santor. "Pinaghandaan ko ito I’m glad it all went well in the end."

Bagama't nanghinayang dahil hindi na break ang record sa 100 meter Butterfly, naging emosyunal si Santor pero magaan naman nitong tinanggap sapagkat naging maganda ang kampanya niya ngayong taon.

Dinomina rin ni Santor ay ang 400 m Individual medley, 4 by 50 m medley relay, 50 m butterfly, 200 m individual medley, 200 m butterfly at 4 by 100 m medley relay.

Samantala, malaking bagay ang 7 medalya na inambag ni Santor dahil lalong umalagwa sa medal standings ang NCR, nakalikom na ito ng 46 golds, 38 silvers at 35 bronzes.