Tanker truck nagliyab sa SLEX

ni Mai Ancheta @News | September 29, 2023

Nasunog ang isang tanker truck na may kargang coconut oil habang bumabaybay sa South Luzon Expressway (SLEX) nitong Miyerkules ng madaling-araw.

Naganap ang insidente sa boundary ng Sto. Tomas, Batangas at Calamba City, Laguna pasado alas-5 ng madaling-araw.

Ayon sa Sto. Tomas City Police, galing sa Calamba ang tanker patungo sa Sto.Tomas at habang nasa kalagitnaan ng biyahe ay nasunog ito.

Agad namang nakaresponde ang mga operatiba ng Calamba City Fire Station upang apulahin ang apoy.

Nakaligtas sa insidente ang driver at pahinante ng trak dahil mabilis na nakalabas ang mga ito sa sasakyan.

Pansamantalang natigil ang biyahe ng mga sasakyan sa southbound lane ng SLEX dahil sa insidente.

Inaalam pa ng mga awtoridad kung ano ang dahilan ng pagkasunog ng tanker truck.

Grabeng trapik, mga sasakyan tumirik.. SLEX, lubog sa baha

ni Mai Ancheta @News | July 14, 2023

Naperwisyo ang maraming motorista dahil sa naranasang matinding trapik malapit sa Bicutan exit ng South Luzon Expressway dahil sa hanggang binting taas ng baha.

Miyerkules pa lamang ng gabi ay nakaranas na ng matinding trapik ang mga motorista dahil sa sirang drainage na sinabayan ng walang tigil na pag-ulan hanggang nitong Huwebes.

May mga sasakyan na tumirik dahil sa mataas na baha at ang mabagal na pag-usad ng mga sasakyan ay umabot hanggang sa Southwoods Exit, Alabang Exit at Skyway exit.

Pasado ala-1 naman ng hapon nitong Huwebes ay bumper-to-bumper din ang trapik sa bahagi ng Magallanes at Osmeña highway kaya maraming motorista ang hindi nakarating sa kanilang destinasyon sa takdang oras.

Ayon sa Toll Regulatory Board (TRB), isang drainage outlet ang nasira sa bahagi ng Bicutan noon pang Pebrero habang nagsasagawa ng expansion ang isang mall at hanggang ngayon ay hindi pa ito nakukumpuni.

Dahil bumuhos ang malakas na ulan nitong Miyerkules at Huwebes, nagdulot ito ng matinding pagbaha na namerhuwisyo sa maraming motorista.

Nagtutulungan ang mga tauhan ng Metro Manila Development Authority (MMDA) at Skyway sa pag-pump ng tubig upang bumaba ang baha sa lugar.

Nakipag-ugnayan na ang Skyway Corporation sa Department of Public Works and Highways (DPWH) at iba pang stakeholders upang malutas ang problema sa pagbaha sa bahagi ng SLEX.

2 suspek sa pagkidnap sa Chinese national, patay

ni Ronalyn Seminiano Reonico | June 3, 2021

Dalawa ang patay sa engkuwentro ng awtoridad at dalawang hinihinalang miyembro ng notorious robbery/kidnapping group sa South Luzon Expressway (SLEX), Calamba, Laguna ngayong Huwebes nang hapon.

Nagsagawa umano ng operasyon ang Regional Intelligence Division-Anti-Carnapping Unit (RID-ANCAR) matapos makatanggap ng ulat na dinukot ng dalawang hindi pa nakikilalang suspek na sakay ng puting Toyota van patungong SLEX ang isang Chinese national sa Parañaque City.

Nang makita ng RID-ANCAR agents ang target, natunugan naman ng mga suspek ang mga ito at kaagad pinaputukan ang mga awtoridad.

Gumanti ng putok ng baril ang mga pulis at napatay ang mga suspek. Nagsasagawa na rin ng imbestigasyon sa insidente at hindi binanggit ng awtoridad ang nasabing Chinese kidnap victim.