‘Di alam na naka-video… VICE, NAGHUBAD HABANG NAGSASAYAW SINA VHONG AT DARREN

ni Reggee Bonoan @Sheet Matters | January 18, 2026

Photo: TikTok _vhongx44

Umabot na sa 24M views ang ipinost ni Vhong Navarro sa kanyang Facebook (FB) account kung saan nakuhanan ng video si Vice Ganda habang nagtatanggal ng pantalon at jacket at natira ang panloob na one-piece sexy outfit.

Nagpa-practice ng sayaw sina Darren Espanto at Vhong at hindi nila sinasadyang mahagip sa video si Vice. 

Natawa na lamang ang dalawa nang makita nila ito na hindi aware at tuluy-tuloy sa pagtatanggal ng damit.

Ipinost ni Vhong ang video kahapon nang hapon. 

“Practice pa lang sana namin ni Darren, pero i-post ko na rin, baka mag-trending,” sabay emoji ng laughing face with tears.

Habang isinusulat namin ang balitang ito, umabot na sa 24M views, 3,100 shares at 7,900 comments ang nasabing video.

Wala pang sagot si Vice tungkol sa post ni Vhong nang itsek namin sa kanyang social media, na kadalasan ay may witty post agad kapag nagte-trending ang Best Actor ng 51st Metro Manila Film Festival (MMFF).

Either dinedma na ito ni Vice o abala lang siya sa ngayon, pero hinihintay pa rin ng madlang pipol ang kanyang reaksiyon.

Samantala, palabas pa rin ang pelikulang Call Me Mother (CMM) sa mga sinehan at dahil ipapalabas din ito sa international market, siguradong lalampas sa P400M ang gross nito.

Sitsit sa amin habang isinusulat ang balitang ito, “Awa ng Diyos, kumikita na. ‘Di ko sure kung umabot na ng P400 million kasi ‘yung international, ngayon pa lang, pero malapit na sa kinikita ngayon sa local box office.”

---

ANIM na pelikula ang nagbukas ngayong ikalawang linggo ng Enero na binigyan ng Movie and Television Review and Classification Board (MTRCB) ng kaukulang ratings.

Ang anim na pelikula para sa linggong ito ay may mga temang komedya, pakikipagsapalaran, drama, pag-ibig, horror, at aksiyon. Nangunguna ang Pinoy thriller na A Werewolf Boy, isang remake ng 2012 South Korean film na may kaparehong pamagat.

Nakakuha ito ng PG (Patnubay at Gabay ng Magulang) para sa edad 12 pababa at kailangang may kasamang magulang o nakatatanda.

Tungkol ito sa isang dalagita na lumipat sa probinsiya kasama ang pamilya at nakatagpo ng isang misteryosong binata na naninirahan sa kanilang bakuran.

Nagbigay din ang MTRCB ng angkop na klasipikasyon sa limang international na pelikula, kabilang ang animated adventure-comedy na The SpongeBob Movie: Search for SquarePants (TSMSFS).

Pakikipagsapalaran ito ni SpongeBob upang patunayan ang kanyang tapang habang nilalakbay ang Underworld kasama ang multong pirata na si ‘The Flying Dutchman’.

PG din ang Indian comedy na Happy Patel: Khatarnak Jasoos (HPKJ) at ang American post-apocalyptic survival-disaster-thriller na Greenland 2: Migration (G2M).

Samantala, ang The History of Sound (THOS) na pinagbibidahan nina Paul Mescal at Josh O’Connor ay rated R-13 para sa mga edad 13 pataas. Kuwento ito ng dalawang lalaki na nagkakilala noong 1917 habang nag-aaral sa New England Conservatory of Music. Matapos ang Unang Digmaang Pandaigdig, naglakbay sila sa mga liblib na lugar ng Maine, USA, upang magtala ng mga awiting-bayan noong 1920.

Para naman sa mas nakatatandang manonood, ang post-apocalyptic horror film na 28 Years Later: The Bone Temple (28YLTBT) ay rated R-16 para sa mga edad 16 pataas.

Nagpaalala ang MTRCB na gabayan ng mga magulang ang kanilang mga anak sa mga pelikulang pinanonood.

“May ilang mga karakter na gumagawa ng mga katawa-tawang pag-arte o ‘di kaya’y mapanganib na kilos. Bagama’t malinaw na ‘di makatotohanan, mahalagang ipaalala sa mas batang manonood na ang mga eksenang ito ay hindi dapat tularan sa totoong buhay,” sabi ni MTRCB Chairperson at CEO Lala Sotto.

---

Sinasakyan lang ang trip para tumigil na…

SIKAT NA PERSONALIDAD, TODO-GIMIK MAPAG-USAPAN LANG

BLIND ITEM:

TSIKAHAN ng ilang kasamahan sa panulat ang iba’t ibang gimik ng isang kilalang personalidad para lamang mapag-usapan.

Ayaw na ayaw kasi ng kilalang personalidad na hindi siya napag-uusapan, lalo na kung maraming maiinit na tsika gaya ng isyu sa Department of Public Works and Highways (DPWH) na tila hindi natatapos, mga pelikulang kumita at hindi kumita sa 51st Metro Manila Film Festival (MMFF), at mga celebrity couples na naghiwalay, nagpakasal, o nag-away.

Ayaw niyang hindi masali sa mga isyu kaya gumagawa ng sariling gimik na sinasakyan na lang ng mga nakapaligid at nakakakilala sa kanya para tumigil na, dahil may pinagdaraanan umano ito. 

Pero ang tanong, hanggang kailan siya maggagaganyan?

Minsan ay napapahamak pa ang ilang tao dahil sa mga isyung gimik ng kilalang personalidad. Kaya hindi na lang siya pinapatulan para hindi humaba ang isyu, pero tila baligtad dahil habang hindi siya pinapansin ay lalo siyang nag-iingay.

“Ano nga ba ang dapat gawin? Mas mabuti na ring ‘wag patulan at hayaang magsawa s’ya sa kakagawa ng gimik,” kaswal na komento ng lahat.

Nag-post na ng piktyur nila ni Aiko… “HAPPY TOGETHER… AFTER 29 YEARS” — ONEMIG

ni Reggee Bonoan @Sheet Matters | January 13, 2026

Photo: Onemig Bondoc at Aiko Melendez - IG

‘Kaaliw itong si Onemig Bondoc sa ipinost niyang: “Happy Together.. after 29 years,” na kasama si Konsehala Aiko Melendez sa kanyang Instagram (IG) account nitong Linggo dahil nagmukhang magdyowa na sila.

Inakala ng lahat na sila na, lalo’t nagkomento pa ang kapatid ni Aiko na si Michico Castañeda Bibit ng, “Love it, happy for you, guys!” at saka itinag sina Onemig at Konsi Aiko.

Sinagot naman ito ng konsehala ng “Thank you,” na parang inayunan nito ang pagbati sa kanila ni Uno (palayaw ni Onemig).

Sinundan pa ito ng “Aww!” na komento ng anak ni Aiko na si Marthena Jickain, na kasalukuyang nasa Chicago, Illinois, USA kasama ang amang si Martin Jickain.

Bukod sa mga komentong ito mula mismo sa mga kapamilya ng konsehala ng 5th District ng Quezon City, iisipin talaga na couple na ang dalawa. 

Kaya naman halos iisa ang sinasabi ng mga netizens. 

“Yown! Congrats, nakabalik na, kilig naman hanggang dulo,” at marami pang iba.

Kaya nagpadala kami ng mensahe kay Aiko kung sila na ni Uno.

“Hindi pa, Ate. His post was a reference na after 29 years, sinipot ko na rin s’ya,” sagot ni Aiko sa amin.

Sabi namin na hindi kasi ito naipaliwanag nang malinaw kaya inakala ng marami na after 29 years ay natuloy na sila bilang lovers, lalo’t nag-like pa si Marthena at may mga bumati na.

“Nasa getting to know and catch up kami kasi ang tagal naudlot ng story namin,” paliwanag pa ni Aiko.

At dahil siguro maraming nag-assume na may relasyon na sina Uno at Aiko, nag-live sila sa TikTok (TT) para sagutin ang mga tanong ng mga netizens.

Sa tanong kung magdyowa na sila ni Uno, diretsahang sagot ng konsehala, “Hindi!”

Susog ng single dad, “I wish. Pero ‘di n’ya pa ako sinasagot.”

Dagdag pa ni Onemig na seryoso siya at totoo ang nararamdaman niya kay Aiko at hindi ito AI (artificial intelligence).

Bakit nga ba magkasama sina Onemig at Aiko at ang posisyon nila sa larawang ipinost ng una ay parang magdyowa na, o baka naman pareho lang silang content creator at for views ito?

Agarang sagot ng single mom, “Hindi po kami gagawa ng pelikula. Wala po kaming anumang project together. You know naman that Onemig is not active anymore in showbiz.

So it has nothing to do with tsismis or whatever.”

Sundot ni Uno, “We’re just friends. Real friends.”

Hayan, malinaw na getting to know each other pa lamang ang dalawa dahil marami na ring nabago sa kani-kanilang buhay pagkalipas ng 29 years na binata’t dalaga pa sila noon.

---

Sa away ni Dennis at mga anak…

GENE: ‘DI KAMI GUMAGAWA NG KUWENTO, LALO NA NG KASINUNGALINGAN

UNANG beses pa lang daw na-bash si Gene Padilla dahil sa issue ng kapatid na si Dennis Padilla at ng mga anak nito sa kasal ni Claudia Barretto last year, kaya dapat ang tanong sa kanya ay kung ano ang natutunan ng mga bashers sa kanya.

“Dapat, ano’ng natutunan nila, ‘di po ako. Dahil unang-una, ‘yung mga bashers, actually, that was the first time na nagkaroon ako ng ganu’n karaming bashers dahil hindi naman ako sanay sa ganu’n.

“Matagal na po ‘yung alitan, ‘yung mga salitaan, pero never po akong nakialam.

“Kung may pag-uusap man, it’s between the family. Sa side ko, with my brother, pero hindi naman kami sumagot pagkatapos ng interbyu ng kabila kasi ‘pag sumagot pa kami, ‘di po matatapos.

“At pareho kaming parte nila at parte namin. Pareho lang maaapektuhan, kaya ang pinili namin ay maging mabuting tao na lang,” paliwanag ng aktor.

Dagdag pa niya, “Sa tanda ko na po sa industriya at bilang tao, napakahirap para sa akin at sa aking kapatid na gumawa ng kuwento, lalo na ng kasinungalingan. Kaya dapat, mag-move on na lang tayo at ‘wag patulan ang mga trolls o bashers. Sila po ang tsismoso at tsismosa ng social media.”

Ang hindi raw malilimutan ng kapatid ni Dennis ay sinabihan siyang mawala na raw at idinamay pa ang kanilang ina.

“Mabibigat po ang binitawan sa akin na sana mamatay na ako, mamatay ang kapatid ko, at mamatay ang nanay ko. Wala po kayong narinig sa akin. Kaya ayoko pong magpainterbyu. Natsambahan n’yo lang ako,” ani Gene.

Kaya ang payo niya sa mga bashers, “Naniniwala po ako na habang tumatanda tayo, panahon na para mag-ipon ng kaibigan dahil sa edad namin, napakaiksi na po ng oras.”

At ang komento ng aktor para sa mga pamangkin niyang anak ni Dennis kay Marjorie Barretto, “Kung may mga pamangkin po na ayaw sa amin o sa akin, okay lang po. Basta gusto ko pa rin sila. Ganu’n po talaga ang buhay. God bless na lang to each and everyone.”

‘God bless’ din ang mensahe ni Gene kay Marjorie, at kapag nagkita raw sila ay babatiin niya ang dating hipag.

Sey niya, “Babatiin ko po kasi makatao naman kami.”

Well, pansinin kaya siya ni Marjorie Barretto? Abangan!

PINKY, UMAMING INAALMUSAL ANG BASHING

ni Reggee Bonoan @Sheet Matters | January 12, 2026

Photo: Pinky Amador / FB

Ang ganda ng mensahe ng pelikulang Breaking The Silence (BTS) na idinirek ni Errol Ropero dahil tinalakay dito ang mental health na nagkakaroon ang isang indibidwal dahil sa bullying, pagiging neglected ng pamilya, depression, atbp..

Sadyang ginawa pala ito ni Direk Errol para ipalabas sa mga eskuwelahan upang maging aware ang mga guro at estudyante sa parehong private at public schools.

Ang mga nagsiganap sa pelikula ay sina Ramon Christopher, Jeffrey Santos, Rob Sy, Pekto Nacua, Bugoy Cariño, Mark Herras, Shira Tweg, Potchi Angeles, Gray Weber, Gene Padilla, Ryrie Sophia, at Pinky Amador. Ito ay produced ng Gummy Entertainment.

Sa mga nabanggit ay nakatikim na ng bashing si Gene dahil sa nangyaring kasal ng pamangking si Claudia Barretto, anak ni Dennis Padilla, kay Basti Lorenzo noong Abril 8, 2025.

Sinundan ni Mark dahil sa umano’y panggagamit nito sa singer na si Jojo Mendrez.

Gayundin si Pinky dahil sa pagiging vocal nito tungkol sa pelikulang Quezon ni Jericho Rosales na kinuwestiyon ng tiyuhin niyang si Ricky Quezon Avanceña ang direktor nitong si Jerrold Tarog. Para sa aktres, wala namang masama.

Bukod dito ay nakaengkuwentro rin niya sa social media ang brodkaster na si Anthony Taberna sa sinabi nitong “Bibili sana ako ng fake news” na inalmahan ng una.

Pero nauna na sa mga nabanggit si Bugoy Cariño nang matanggal siya bilang isa sa miyembro ng Hashtags sa It’s Showtime (IS) dahil sa biglaan nitong pagiging ama pitong taon na ang nakararaan.

Sa mediacon matapos ang screening ng BTS ay natanong si Pinky kung ano ang reaksiyon niya nang makaranas din siya ng pambu-bully sa social media at ano ang kanyang natutunan.

Diretso ang sagot ng magaling na character actress, “I eat bashing for breakfast, ganu’n lang!”

Nagkatawanan ang mga nasa loob ng Trinoma Cinema 7 sa mariing sagot ni Pinky na madalas gumanap bilang kontrabida, ngunit nagpaliwanag naman siya.

“I think nakatulong din ‘yung role ko bilang kontrabida kasi ‘di maiiwasan na iba-bash ka talaga. So, matututo ka to take it with a grain of salt kasi karamihan, walang picture, karamihan hindi totoong pangalan, nagtatago sa alyas, o baka troll sila. O doon na lang sila nagkakaboses sa social media dahil wala silang boses sa totoong buhay.

“So for me, it comes with the job. S’yempre, ‘di maiiwasan na may time na masakit at may time na mapapaisip ka, pero overall, when you take a step back, you always have to think of the bigger picture. So ‘pag ganu’n, I just take it na siguro I’m doing my job well dahil nagre-react sila,” maayos na paliwanag ng aktres.

Ginampanan ni Pinky ang papel bilang asawa ni Jeffrey at ina ni Shira, na naging biktima ng pambu-bully ng kanilang kasambahay noong bata pa at maging sa eskuwelahan.