Super rich na raw, todo-promote pa ng sugal… IVANA, TINAWAG NA SAKIM

ni Reggee Bonoan @Sheet Matters | July 21, 2026

Photo: Kuya Jobert at Ivana Alawi - FB IG

Inokray ni Kuya Jobert Austria o mas kilala bilang Kuya Jobert, na isang TV host-comedian, si Ivana Alawi dahil sa pagpo-promote nito ng online gambling.

Pinuna ni Kuya Jobert ang content creator na mamimigay daw ng expensive cellphones tapos ay sabay magpo-promote ng online gambling na dapat i-follow para makakuha ng mamahaling phone.

Ipinost ng komedyante sa kanyang Facebook (FB) account ang saloobin niya kay Ivana.

“Namimigay ka nga, inengganyo mo naman sila magsugal. Kulang pa ba ‘yung blessing na meron kayo?”

May nagkomentong netizen na si April Cortes Titong, “Seeing the 100 iPhone giveaway used to promote online gambling was heartbreaking.

“All I could think about was the thousands of Filipinos who might be encouraged to gamble because someone they look up to made it seem exciting or rewarding.”

Ang iba pang komento ng mga netizens na sinang-ayunan si Kuya Jobert…

“Greedy mode.”

“Dapat ginamit na lang sa mga may cancer patients at senior citizens na hirap na maghanapbuhay. iPhone, kahit gaano kamahal, walang halaga. Kuya Jobert, da best ka.”

“Okay lang daw, sabi ni Ate Ivana. Next month, magpapamigay naman siya ng 1 million. Mamimili siya ng mga 10 families, ganu’n. Magaling naman s’ya gumawa ng vlogs. Buti daw mabilis naman makalimot mga tao. Hehehe!”

“The more, the merrier daw, P’re.”

Anyway, marami pa kaming nabasa na medyo off kaya hindi na lang namin isinulat.

Bukas ang BULGAR sa panig ni Ivana tungkol sa isyung ito.

---

UNPREDICTABLE ang kuwento ng Someone, Someday (SS) dahil akala namin ay dramedy at rom-com ito base sa trailer na halatang gusto nina James Reid at Kathryn Bernardo ang isa’t isa pero pigil dahil nga mag-best friend.

Kaya naman dramedy dahil papasok si Maja Salvador na diehard fan ni Kathryn at may sariling personal na problema na nai-share niya sa unang pagkikita nila sa foundation na pinamumunuan ni Dimples Romana.

Inakala rin naming si Maja ang third wheel kina Kath at James. Hindi pala, kundi si Daniella Stranner na effective naman, kaya lang OA ang pagkainis niya sa una lalo na noong hindi tinanggap ni Jordan (James) ang marriage proposal niya.

Hindi pa nai-reveal sa tatlong episodes na napanood namin kung sino ang stalker ni Kathryn na gagawa sa kanya ng hindi maganda dahil halatang may galit ito, lalo na nang pinturahan ng ‘bitch’ ang sasakyan ni Billy (Kathryn).

Kaya rito papasok ang thriller genre ng SS dahil sino ang taong laging nakasubaybay kay Kathryn? Naisip namin na si Maja ito lalo’t ipinakita na lahat ng nangyayari sa buhay ni Billy ay alam ni Abi (Maja). 

Mala-The Bodyguard ni Whitney Houston ang kuwento ng upcoming series na handog ng Dreamscape Entertainment at ABS-CBN Productions na isinulat ni Joel Mercado at idinirehe nina Chad Vidanes at Dolly Dulu.

Maraming layers ang Someone, Someday na aabangan sa Netflix simula July 24 at mapapanood naman sa July 27, sa ganap na 8:45 PM, sa ALLTV 2, TV5, A2Z, Kapamilya Channel, at Kapamilya Online Live (KOL) sa Facebook (FB) at YouTube (YT).

Imbes masaktan… MAJA, NASARAPAN SA SAMPAL NI KATHRYN

ni Reggee Bonoan @Sheet Matters | July 20, 2026

Photo: IG _majasalvador

Dahil sa closeness at pagiging ‘ate’ ni Maja Salvador kay Kathryn Bernardo ay nahirapan ang huli na sampalin ang una sa eksena nila sa upcoming series na Someone, Someday (SS).

Ito ang isa sa mga kuwento ni Maja sa nakaraang solo mediacon niya para sa serye na kasama sina Kathryn at James Reid, handog ng Dreamscape Entertainment mula sa direksiyon nina Chad Vidanes at Dolly Dulu.

Sey ni Maja, “Yes, ate talaga n’ya ako. But ‘pag may mga eksena kami, feeling ko, parang nahihiya s’ya. Kaya ako talaga ang nagsasabi sa kanya na ‘Hindi ako si Ate Maj, kalimutan mo ‘yun.’ May ganu’n ako sa kanya.

“Okay, nakita n’yo na naman po, nasa teaser naman ‘yung sampal, sapak. Ayaw n’yang gawin ‘yun, ayaw gawin ni Kathryn. Takot s’ya. Sabi ko, ‘No, kailangan mong gawin. Gawin mo na para tapos na. Isipin mo na lang na ‘di ako si Ate Maj.’

“Ang tawag ko sa kanya, ‘yung name ng character n’ya, si Billy, para magawa n’ya. Ginawa n’ya, nakita n’yo naman!”

At finally, nagawa na nga kaya ang tanong sa aktres ay kumusta ang sampal ni Kathryn sa kanya.

“Ang sharap (sarap)! Hahaha! Ang sarap kasing makita na game s’ya, at ibibigay talaga n’ya ang eksena!” tumawang sagot ni Maja.

Diehard fan ang karakter ni Maja bilang si Abi na talagang nakasubaybay kay Billy, ang karakter ni Kathryn, at gusto nitong mapasok ang mundo ng idolo, na nangyari naman, pero nagkaroon sila ng malaking problema.

Ilang taong nawala si Maja sa ABS-CBN kaya natanong kung paano siya napabalik bilang Kapamilya. 

Matatandaang napanood siya sa GMA-7 sitcom na Open 24/7 (2023) at sa TV5, sa Sunday Noontime Live! (2020-2021), seryeng Niña Niño (2021-2022), at Emojination (2023-2025).

“Kasi ABS-CBN show. ‘Pag gumawa ang ABS-CBN ng show, alam mong isang magandang show ‘to.

“Alam kong I’m home. There are many reasons why I accepted this project at isa na ru’n ang gusto kong makatrabaho sina Kathryn and James. Isa itong napakagandang role,” paliwanag ni Maja.

Hindi sinagot nang diretso ni Maja kung may next project siya sa Dreamscape Entertainment pagkatapos ng SS, pero ang ganda ng ngiti niya. 

Inamin din ng business unit head na si Erick Salud na may ipi-pitch pa sila sa aktres.

Kasama rin sa cast sina Dimples Romana, Rowell Santiago, McCoy De Leon, Daniela Stranner, at Migz Casimiro.

Mapapanood ang Someone, Someday sa Netflix sa Hulyo 24, sa iWant sa Hulyo 25, at simula Hulyo 27, ganap na 8:45 PM, sa ALLTV 2, TV5, A2Z, Kapamilya Channel, at Kapamilya Online Live (KOL) sa Facebook (FB) at YouTube (YT).

---

PATULOY na tinatangkilik ng mga manonood ang suspense thriller na The Loyalty Game (TLG) ng ABS-CBN Studios at Prime Video matapos nitong manguna sa listahan ng most-watched series sa Prime Video Philippines simula noong Sabado (Hulyo 12).

Kapit na kapit ang mga viewers ng serye sa Pilipinas maging sa ibang bansa dahil kabilang din ang serye sa listahan ng most-watched shows sa Prime Video UAE (United Arab Emirates). 

Labis din ang pagbuhos ng reaksiyon ng mga viewers online tungkol sa bawat episode nito, lalo pa at unti-unting nabubunyag ang mga sikreto ng bawat karakter.

Sa nakaraang episode, muling ipinatigil ni Ana (Janine Gutierrez) si Beth (Sofia Andres) sa pagsasagawa ng loyalty test kay Ben (Jericho Rosales) dahil naniniwala siyang hindi siya niloloko ng kanyang asawa sa kabila ng mga kahina-hinalang kilos nito.

Mas itinuon na lang ni Ana ang kanyang sarili sa pagsuporta sa asawang si Ben matapos itong mapagbintangan na pumatay kay Antonio (Bernard Palanca). Kalaunan ay lumabas na si Nathalie ang nasa likod ng pagpatay. Nakatulong din ang pangyayari kay Ben lalo pa at naibunyag ni Antonio ang lihim na pagkikita nila ni Mara (Yassi Pressman).

Lalo namang nagdulot ng mga tanong ang ginawa ni Ben matapos mapanood ng mga viewers kung paano niya pinatay ang private investigator ni Antonio. 

Dahil dito, patuloy na hinahanap ng mga manonood ang sagot kung ano pa ang itinatago ni Ben at kung nananatili ba talaga siyang tapat kay Ana.

Samantala, ibinahagi nina Janine at Jericho na hindi naging madali sa kanilang isabuhay ang kanilang mga karakter sa serye.

Ani Janine, “Throughout the script, nare-reveal sa akin ‘yung important things about her. Grateful talaga ako kay Direk Mae because she really helped me find Ana.”

“The character scared me. I think gray characters are the most interesting characters to play,” ayon kay Jericho.

Habang patuloy na lumalabas ang mga bagong sikreto sa likod ng kanilang mga karakter, asahan pa ang mas marami pang rebelasyon at pasabog sa mga susunod na episodes.

Abangan ang bagong episodes ng The Loyalty Game tuwing Biyernes, eksklusibo sa Prime Video.

Next na kina Bea at Vincent? DOMINIC AT SUE, KASAMA ANG WEDDING SUPPLIER, PIKTYUR KUMALAT

ni Reggee Bonoan @Sheet Matters | July 17, 2026

Photo: IG _dominicroque

Sina Dominic Roque at Sue Ramirez kaya ang susunod na ikakasal? 

Ito ang topic sa Showbiz Update (SU) vlog nina Ogie Diaz, Ate Mrena, Tita Cora, Tamerlane Mopia at Mama Loi kagabi.

May nakitang post sina Ogie sa social media na kasama nina Dominic at Sue ang team ng wedding and events supplier na tila katatapos lang ng meeting.

Ang ganda ng ngiti ng celebrity couple kaya napaisip ang mga hosts na baka may mahalagang pinag-usapan.

Sabi ni Ogie, “Tinanong kasi ng mga tao, since nandu’n na ‘yung mga wedding, events planner, and supplier, ano ‘to? Ikakasal na ba sina Dominic at Sue?”

At bilang isang event planner din si Mama Loi ay sinang-ayunan niya ang komento ng co-host niya, pero baka hindi raw ito tungkol sa kasal kundi para sa nalalapit na kaarawan nina Dom at Sue sa darating na Hulyo 20.

“Meron ngang event na magaganap, pero ‘di wedding. Eh, kasi nga, magse-celebrate ng birthday itong si Dominic Roque at si Sue Ramirez nang sabay kasi sabay ‘yung birthday nila,” paliwanag ni Mama Loi.

Oo nga naman, kasi kung tungkol ito sa kasal ay parang nauna pa itong planuhin kaysa sa marriage proposal. 

And for sure, surprise ito ni Dom kay Sue if ever maisip na niya ito.

At muling balikan ang sinabi ng aktres na gusto na niyang magkaanak at siyempre, si Dominic ang ama, na naniniwala si Sue na magiging good at ideal dad ang kanyang boyfriend.

“Nakikita ko how he is with his family. Mahal na mahal n’ya ang mga pamangkin niya. Even with my dogs, ang laki ng puso n’ya at napakabuti n’ya,” paglalarawan ni Sue kay Dominic.

Kaya ang aabangan ay kung kailan magpo-propose ang aktor.

---

KINLARO ng Metropolitan Manila Development Authority (MMDA) chairman na si Atty. Don Artes na hindi suspendido si Gabriel Go, ang MMDA Special Operations Group-Strike Force head na sumita sa isang guro na hindi nakasuot ng helmet habang sakay ng kanyang motorsiklo.

Napanood namin ang post ni Gabriel Go sa kanyang Facebook account kung paano niya hinuli ang guro.

Tinanong nito kung ano ang trabaho nito at sinagot siya ng lalaki na teacher.

“Teacher ka, tapos wala kang helmet? Paano naman natin tuturuan ang ating mga estudyante kung ganu’n?” katwiran ni Gabriel Go.

In fairness, humingi ng paumanhin ang guro at nakiusap na huwag siyang kunan ng video dahil kilala siya sa lugar na iyon.

Sabi naman ni Go na ibe-blur naman ang mukha at huwag na lang banggitin ang pangalan.

Nagulat na lang daw ang guro nang makita niyang ipinost ito ni Gab Go sa kanyang Facebook (FB) account na blurred naman ang mukha.

Nag-react ang ACT Teachers Representative na si Antonio Tinio at tinawag na abusado ang ginawang pagsita sa guro gayung nakiusap na itong huwag siyang kunan ng video.

Ayon kay MMDA Chair Artes ay iimbestigahan ang pangyayari kaya hindi muna sasama si Gabriel Go sa operations at nilinaw na hindi siya suspendido.

Samantala, may komento naman si Go sa mga bumatikos sa kanyang netizens.

Aniya, “Ang problema natin sa kalsada transcends beyond mga motorista or mga naglalakad, whatever your profession, you are never ENTITLED FOR EXEMPTION.

“This goes to show that the problem of disorder on our streets is not just about the implementation of the law. It also raises questions about the role of our schools in shaping discipline, responsibility, and respect for rules. Schools are meant to be a second home, and teachers are expected to serve as guardians and role models for the youth.

“In fact, educators are expected to uphold a higher standard because their actions influence the next generation.

“Ang mas nakakalungkot, nahuli na nga dahil sa paglabag, nag-attempt pa umanong tumakbo. Kung ganito ang ipinapakitang halimbawa ng ilan sa mga inaasahan nating humuhubog sa kabataan, marahil panahon na ring pagnilayan kung paano natin mas mapapalakas ang kultura ng accountability, disiplina, at pagiging huwaran sa loob ng ating educational system.”