P10.6M shabu sa kahon ng wedding dress, buking

ni Mervin Reyes @News | September 11, 2026

Photo: Ang 10.6M milyong halaga ng hinihinalang shabu na itinago sa kahon na may wedding dress - BOC PH

Nasabat ng Bureau of Customs-Port of Clark at Philippine Drug Enforcement Agency ang P10.6 milyong halaga ng hinihinalang shabu na itinago sa karton ng wedding dress.

Umabot sa 1.573 kilo ang nakumpiskang droga mula sa shipment na nagmula sa Mexico City, Mexico at nakatakdang ipadala sa Mandaluyong City.

Nadiskubre ang kontrabando matapos makitaan ng kahina-hinalang imahe sa X-ray ang shipment na idineklarang wedding dress. 

Walang nakitang droga sa damit, ngunit nang baklasin ang karton, natagpuan ang apat na plastic pouch na nakatago sa cardboard sidewalls.

Ayon kay Customs Commissioner Ariel Nepomuceno, kailangang manatiling masusi ang mga tauhan ng BOC dahil patuloy na nagbabago ang paraan ng mga smuggler sa pagtatago ng kontrabando.

Isinailalim na sa laboratory analysis at confirmatory testing ng PDEA Clark ang substance, habang naglabas na rin ng Warrant of Seizure and Detention laban sa shipment.

Tambay, huli sa aktong nagdodroga

ni Maeng Santos @News | September 6, 2026

Photo: File / PNP Valenzuela City Police Station

Tiklo ang 29-anyos na kelot nang maaktuhang sumisinghot ng shabu sa Valenzuela City.

Nagsasagawa ng Oplan Galugad ang mga operatiba ng Valenzuela Police Sub-Station 3 nang maaktuhan si "Rence," 29, na gumagamit umano ng shabu sa sa gilid ng pumping station sa Brgy. Marulas alas-8:27 ng gabi.

Agad siyang nilapitan nina PCpl. Ledrick Bacuran at Pat. Robert Regalado sabay nagpakilala bilang mga pulis saka inaresto.

Nasamsam sa kanya ang isang nakabukas na plastic sachet na naglalaman ng bahid ng umano'y shabu at ilang drug paraphernalias.

Babaeng vendor, timbog sa P1M shabu

ni Gina Pleñago @News | August 30, 2026

Photo: PNP National Capital Region Police Office

Kulong ang 52-anyos na babaeng vendor at isang lalaki matapos mahulihan ng P1.02 milyong halaga ng umano'y shabu sa buy-bust operation ng Southern Police District at Taguig City Police, Biyernes ng gabi.

Sinasabing ang dalawang bagong tukoy na high-value individuals ay magkasabwat sa pagpapakalat ng droga.

Hinuli ng mga tauhan ng District Drug Enforcement Unit at Taguig City Police Station ang mga suspek alas-10 ng gabi ng Agosto 28, sa kahabaan ng MLQ C6 Extension Road sa Brgy. New Lower Bicutan, Taguig City.

Nakuha ang 150 gramo ng umano'y shabu.