Palit-liderato sa Senado, pinagdudahan

ni Mylene Alfonso @News | May 13, 2026

Photo: Sens. Alan Peter Cayetano at Tito Sotto III - Senate PH

Nagpahayag si Dr. Jose Antonio Goitia na may kaugnayan umano sa impeachment trial laban kay Vice President Sara Duterte ang naging pagpapalit ng liderato sa Senado nitong Lunes.

Ayon kay Goitia, hindi lamang simpleng pagbabago ng Senate leadership ang nangyari matapos mapalitan si Senate President Vicente Sotto III ni Alan Peter Cayetano sa pamamagitan ng 13 boto.

Sinabi niya na kapansin-pansin ang paglipat ng apat na senador mula sa mayorya at ang muling paglitaw ni Senator Ronald “Bato” dela Rosa bago ang botohan.

Nauna nang sinabi ni Sotto na handa niyang buksan ang impeachment court oras na matanggap ng Senado ang articles of impeachment laban kay Duterte.

“Hindi ito simpleng usapin ng liderato. Layunin nitong pigilan ang impeachment trial,” ani Goitia.

Pinuna rin niya ang panawagan ng bagong mayorya para sa “unity,” at sinabing mahalaga pa rin ang transparency at pananagutan sa gobyerno.

Nagbabala rin si Goitia sa umano’y lumalaking impluwensya ng dayuhang interes sa pulitika ng bansa.

Kasabay nito, nagpahayag siya ng suporta kay Pangulong Ferdinand Marcos Jr. sa pagsusulong ng soberanya ng Pilipinas.

Ayon kay Goitia, mahalagang bantayan ng publiko ang direksyon ng mga institusyon ng pamahalaan at tiyaking nananatili ang pananagutan sa gobyerno.

Sotto, pinatalsik ng 13 senador... Cayetano, bagong Senate President

ni Mylene Alfonso @News | May 12, 2026

Photo: Senate of the Philippines - Wendell AlineaSenate Social Media Unit

Pormal nang inihalal bilang bagong pangulo ng Senado si Senador Alan Peter Cayetano bilang kapalit ni Sen. Vicente “Tito” Sotto III.

Sina Senators Imee Marcos at Joel Villanueba ang nag-nominate kay Cayetano bilang bagong SP.

Nabatid na 13 senador ang sumuporta kay Cayetano, kabilang si Sen. Ronald “Bato” dela Rosa at siyam naman ang bumoto pabor kay Sotto habang dalawa ang nag-abstain.

Ang mga bumoto para palitan si Sotto ni Cayetano ay sina Senators Loren Legarda, Camille Villar, Mark Villar, Joel Villanueva, Imee Marcos, Chiz Escudero, Robin Padilla, Bong Go, Rodante Marcoleta, Bato dela Rosa, Pia Cayetano, Jinggoy Estrada at Tito Sotto.

Pumabor naman kay Sotto sina Senators Bam Aquino, Ping Lacson, Risa Hontiveros, Alan Cayetano, Erwin Tulfo, Raffy Tulfo, Lito Lapid, Win Gatchalian at Kiko Pangilinan.

Nag-abstain naman sina  Senators JV Ejercito at Migz Zubiri.

Si Cayetano na ang ikaapat na lider ng Senado sa ilalim ng administrasyong Marcos. 

Naganap ang balasahan sa gitna ng mainit na usapin hinggil sa Articles of Impeachment laban kay Vice President Sara Duterte. 

Inaasahang aakyat ang reklamo sa Senado para sa isang ganap na impeachment trial.

Bilang Senate President... Sotto out, Legarda in

by Mylene Alfonso @News | February 5, 2026

File Photo: Vicente Tito Sotto III / FB

Lumutang ang posibilidad na term-sharing agreement sa pagitan nina Senate President Vicente "Tito" Sotto III at Sen. Loren Legarda sa gitna ng ugong na kudeta sa Senado. 

Napag-usapan ang term-sharing agreement sa isang lounge talk sa Senado na dinaluhan ng siyam na miyembro ng Majority bloc, kabilang sina Sotto at Legarda. 

Sa larawang ipinost sa Meta (dating Facebook) ni Senador Francis "Kiko" Pangilinan, makikita siya kasama si Sen. Legarda na nakaupo sa tabi ni SP Sotto, gayundin sina Senate President Pro Tempore Panfilo Lacson, Majority Leader Juan Miguel Zubiri, at sina Senators JV Ejercito, Sherwin Gatchalian, Risa Hontiveros, at Bam Aquino. 

Ang nasabing larawan ay may hashtag na #PowerSharing. 

“May usapan ng term-sharing between [Sen. Pres. Tito] Sotto and [Senator) Loren [Legarda]...” wika ni Ejercito sa mga mamamahayag hinggil sa pulong. 

“Parang 'yun ang usapan kanina eh. Ganun lang, lounge talk. Para daw all’s well that ends well na at least maganda,  walang away, term-sharing kung sakali. Lounge talk naman 'yun. Nothing formal,” ayon pa kay Ejercito. 

Para naman kay Sotto, “Nagbibiro lang siya. Ibig sabihin niya siguro ‘yung group ng majority.” “Hindi. Wala, katuwaan lang namin”. 

Bagama't kinumpirma naman ni Sotto ang term sharing sa pagitan nila ni Legarda. "We plan to make her SP before 20th Congress ends," ayon kay Sotto sa isang Viber message.

Samantala, tinawag ni Zubiri si Legarda na “Madam President” nang siya ang manguna sa sesyon bago mag-adjourn ang Senado kahapon. Sinabi ni Legarda na siya lamang ang nagsilbing presiding officer. 

Binanggit din ni Zubiri na maaaring maging “future president” ng Senado si Legarda. 

“All’s well that ends well. The group is more solid than ever,” saad ni Zubiri.

Nang tanungin tungkol sa umano’y power sharing, tugon ni Zubiri, “in the near future.” 

Dagdag ni Zubiri na sila ay “all one big and happy family” nang tanungin kung may pagtatangkang baguhin ang liderato.