Senate website, na-hack

ni Mylene Alfonso @News | June 12, 2026

Photo: Senate web / SS

Kinumpirma ng Senate’s Electronic Data Processing and Management Information Systems (EDP-MIS) na na-hack o nabago ang laman ng kanilang official website, habang isang grupo ng mga hinihinalang hacker ang umako ng pananagutan sa insidente.

Bunsod nito, pansamantalang isinailalim sa maintenance ang website ng Senado makaraang akuin ng grupong Nullsec Philippines na nabago nila ang laman o hitsura ng isang pahina ng opisyal na website ng institusyon.

Ang mga screenshot na kumalat sa social media ay nagpapakita ng isang mensahe na kumokondena sa korupsiyon at nananawagan ng transparency at accountability sa pamahalaan.

Sa isang pahayag, sinabi ng Senado na nagsagawa na ito ng imbestigasyon upang alamin ang buong detalye at pinagmulan ng insidente.

Wala namang umanong confidential o sensitibong impormasyon ang nakompromiso o nakuha.

Nabatid na ang defacement ay isang uri ng cyberattack kung saan binabago ng mga hacker o hacktivist ang hitsura o nilalaman ng isang website, ayon sa Canadian Centre for Cyber Security.

Win: Work-from-home dahil may banta sa Senado... 'Di kami sinabihan — Alan

ni Mylene Alfonso @News | June 10, 2026

Photo: Win Gatchalian at Alan Peter Cayetano - Senate PH

Duda si Senate President Alan Cayetano kaugnay sa umano’y security threat na iniulat ng National Bureau of Investigation (NBI) sa Senado.

“If the threat is credible, then every senator, every member of the secretariat, and every individual who works within these walls deserves to be informed and protected. Security is not the concern of one bloc. It is the concern of the entire Senate,” wika ni Cayetano.

Giit din niya na hindi lamang isang grupo o bloc sa Senado ang dapat mabahala sa usapin ng seguridad kundi ang buong institusyon.

Kinuwestiyon din niya kung bakit ilang senador lamang umano ang nakatanggap ng impormasyon mula sa NBI habang ang iba ay hindi.

Kasabay nito, binigyang-diin ni Cayetano na hindi mula sa Office of the Sergeant-at-Arms ng Senado nanggaling ang impormasyon kundi mula sa NBI.

“And we must be candid about the source of this 'threat'. It did not come from the Senate’s own Office of the Sergeant-at-Arms, the office constitutionally charged with protecting this institution. It came from the NBI—and any honest accounting requires us to weigh that source carefully,” punto ni Cayetano.

Samantala, nagpalabas ng magkahiwalay na kautusan sina Cayetano at Gatchalian hinggil sa pagbabago sa work arrangement sa Senado ngayong linggo.

Nag-atas si Cayetano ng pinaikling oras ng pagtatrabaho bilang paghahanda sa paggunita ng Araw ng Kalayaan sa June 12.

Samantala, nag-utos naman si Gatchalian ng dalawang araw na work-from-home setup simula bukas, June 10 hanggang June 11, bunsod ng natanggap na ulat ukol sa potensyal na banta sa seguridad ng institusyon.

Win, acting Senate Pres... Balik-trabaho na tayo

ni Mylene Alfonso @News | June 4, 2026

Photo: Win Gatchalian - Senate of the Philippines

Nahalal si Senador Sherwin “Win” Gatchalian bilang Senate President Pro Tempore matapos muling magbukas ng sesyon ang Senado, na nagbigay-daan upang ideklara siya ng mga senador mula sa minority bloc na dumalo bilang acting Senate President.

Samantala, nag-post naman ng isang video sa kanyang Facebook account si Gatchalian ng ilang kaganapan sa Senado na may caption na “Balik-trabaho na tayo sa Senado.”  

Naluklok si Gatchalian matapos makabuo ng quorum ang mataas na kapulungan kasunod ng pagdalo ni Senator Francis "Chiz" Escudero. 

Bilang bagong Senate President Pro Tempore, pinalitan ni Gatchalian si Sen. Loren Legarda.

Si Escudero lamang ang miyembro ng majority bloc na dumalo sa plenary session, na siyang nagtapos sa dalawang magkasunod na araw na walang sesyon ang Senado dahil sa patuloy na pagliban ng majority bloc.