Ayaw daw marumihan ang pagkatao… SIGAW NI JAMES: 'DI KO KAYANG MAGING PULITIKO

ni Rohn Romulo - @Run Wild | December 16, 2022

Happy naman kami kay James Blanco (na teen-ager pa lang ay nakakasama at nakakatsikahan na namin dahil sa youth-oriented show ng GMA na Click), dahil hindi lang siya aktor sa Family Matters, isa rin siya sa supervising producers.

Siya raw ang nag-asikaso sa pagkuha kay Direk Nuel, pati sa productions at technical ng movie.

May isa pa siyang kasama at malay daw natin, na baka sa next movies ng CineKo ay maging co-producer na rin si James.

At dahil nasa office siya ni Mayor Enrico Roque (para sa investments and properties), naitanong kung may plano rin ba siyang pasukin ang pulitika?

"Hindi, hindi ko kasi kayang maging pulitiko," may diin niyang sagot.

"Hanggang sa likod lang ako or maging adviser ng pulitiko. Actually, nasa Office of the Mayor ako ngayon, hanggang doon lang ang kaya ko.

"Pero 'yung maglingkod, ayoko kasing mabahiran, alam n'yo naman ang pulitika, parang sa industriya rin natin, gumawa ka ng mabuti, may masasabi pa rin silang masama."

More than two decades na siya sa showbiz at patuloy pa rin sa paggawa ng movies at mga teleserye, samantalang 'yung mga kasabayan niya ay halos waley nang career. Ano kaya ang sikreto niya?

"Pakikisama lang naman ang sikreto d'yan," sagot ng aktor na flawless pa rin at alagang-alaga ang katawan.

"Wala namang iba, habang buhay mong gagawin 'yun dito sa industriya natin, ang walang tigil na pakikisama."

Dagdag-payo pa niya lalo na sa mga young stars, "Siyempre, 'wag lalaki ang ulo mo, ano man ang narating mo at gaano ka man katagal sa industriya."

Madir ng aktor, napiga ni Korina… KARLA, NAGSALITA NA SA KASAL NINA DANIEL AT KATHRYN

ni Rohn Romulo - @Run Wild | December 11, 2022

Sa latest episode ng Korina Interviews ng NET25 na mapapanood ngayong Linggo, may inamin si Karla Estrada kay Korina Sanchez-Roxas.

Masayang-masaya ngayon si Queen Mother dahil in love siya.

“Lahat ng babae, nangangarap magsuot ng traje de boda…Puwede pa rin naman akong humabol doon,” pahayag ng actress-turned politician.

Bukod dito, tunghayan ang kuwento ng pag-angat ni Karla mula sa kahirapan sa Tacloban after niyang mag-stow away sa barko pa-Maynila upang habulin ang kanyang pangarap.

Wala mang suwerte sa pag-ibig, biniyayaan naman siya bilang single parent ng mga mabubuti at matatagumpay na mga anak, at isa na sa mga ito ay ang superstar actor/singer na si Daniel Padilla.

Sasagutin din niya ang mga katanungan kung ikakasal na ba si Daniel kay Kathryn Bernardo?

Tatakbo ba si Karla sa Kongreso o Senado sa susunod na eleksiyon?

At ano ang masasabi niya na mas importante — magandang mukha o magandang katawan?

Usapang magkaibigan sa umaatikabong chikahan na ito sa pagitan nina Karla at Korina sa Korina Interviews ngayong Disyembre 11, Linggo (5:00 PM) sa NET25.

Wa' elibs sa mister ng aktres… HIRIT NG NETIZENS: RYAN, NAGING AKTOR LANG DAHIL KAY JUDAY

ni Rohn Romulo - @Run Wild | December 4, 2022

Nakatakdang gawin ng Best Director ng The 5th EDDYS na si Erik Matti ang prequel ng award-winning na On The Job: The Missing 8 na itinanghal din na Best Film ng Editors' Choice Award ng SPEEd.

Ang critically-acclaimed political crime thriller franchise ay muling pagsasamahan ni Direk Matti at ng award-winning screenwriter na si Michiko Yamamoto.

Mamarkahan ang ikatlong pelikula sa On The Job trilogy na nagsimula sa Cannes' Directors' Fortnight noong 2013 at nakapaglakbay sa buong mundo.

Ang On The Job ay inspirasyon ng isang iskandalo sa totoong buhay kung saan ang mga preso ay pansamantalang inilalabas mula sa bilangguan upang magtrabaho bilang mga contract killer sa ngalan ng mga pulitiko at matataas na opisyal ng militar.

Ang prequel ay ginagawa nina Matti at Ronald Monteverde sa ilalim ng Reality MM Studios na nakabase sa Maynila.

Kukunan ito sa isla ng Mindanao kung saan si Pedring Eusebio na gagampanan ni Jericho Rosales, ang tiwaling alkalde ng isang kathang-isip na lungsod na La Paz, ay umangat sa kapangyarihan.

Makakasama ni Echo si Ryan Agoncillo bilang si Rene Pacheco, isang mataas na opisyal ng militar na pumapasok sa pulitika. Ang iba pang kasama sa cast ay iaanunsiyo pa sa susunod na buwan.

Kaabang-abang din kung makakasama pa ang award-winning actor na si John Arcilla at award-winning supporting actress na si Lotlot de Leon.

Nakatakdang magsimula ang paggiling ng kamera sa third quarter ng 2023 kaya mahaba-haba pang panahon ang magiging paghahanda nina Jericho at Ryan para sa kanilang mapaghamong characters.

Reaction naman ng mga netizens na gulat na gulat sa pagkakasama ng asawa ni Judy Ann Santos sa OTJ….

"Mas maganda siguro kung sequel kaysa prequel. Okay si Jericho, no doubt na marunong umarte. Nahasa na ng panahon. Pero Ryan Agoncillo, haller? Host, puwede, pero actor? Eh, sa Krystala ko lang siya naaalala, eh, at 'yung Kasal, Kasali, Kasalo. Thanks to Juday pa 'yun."

Pagtatanggol ng ilang netizens:

"Nasa Pieta siya as Rigor, may ibubuga! He acted opposite the great Cherie Gil."

"May hapon-serye siya noon with Ms. Cherie Gil and I could say na kaya niyang makipagsabayan kay the Miss Cherie Gil."

Opinyon pa nila:

"Nice. Ang ganda kasi talaga nito, one of the locals na talagang nagandahan ako. Good luck, guys, sana mas maganda pa 'yan."

"Mas nagandahan ako ru'n sa 1st film (Gerald Anderson, Joel Torre, Piolo Pascual, etc.). 'Di ba, gusto pang gawan ng Hollywood version 'yun? Sinubmit sana nila 'yun dati sa Oscars."

"Kung na-appreciate n'yo 'yung kina Piolo, sa akin, itong kina Dennis at John ang pinaka-the best.

Hindi naman sobrang garbo ng production compared sa Star Cinema produced na nauna, pero may angat ang story at acting ng mga characters ng The Missing 8. Ang galing din ni Vandolph.

Nalimutan ko na si Vandolph 'yung pinapanood ko."

"I'm another commenter and I share same thoughts. Wala nang bagong material na maisip si Matti kaya he's really milking this one narrative. Parang The Fast and The Furious lang.

Walang bitter o nasasaktan 'te, 'wag kang OA."

"I've never seen On The Job but medyo biased 'yung critique ng mga tao about this being milked.

That's basically what Marvel/Disney, Fast and Furious, Cathy M./Vice-Ganda movies are, and patok na patok sa 'Pinas 'yung mga 'yun."

"Bago n'yo sana i-judge na milking the hype, sana panoorin n'yo muna at napapanahon sa takbo ng lipunan ngayon."

Tanong naman ng isa pang netizen, "Kailan naman uumpisahan 'yung project ni Matti with Ms. Vilma Santos at 'yung project niya with Angel Locsin and Edu Manzano?"