Pag-iimbetiga sa EJK, binuksan na

ni Angela Fernando @News | May 17, 2024

Binuksan ng komite ng karapatang pantao ng House of Representatives ang isang pagdinig hinggil sa extrajudicial killings (EJK) sa panahon ng war on drugs sa ilalim ng administrasyong Duterte na nasa pamumuno ng dating Presidente Rodrigo Roa Duterte.

Ini-schedule ang pagsisiyasat dalawang araw bago magtapos ang ikalawang regular na sesyon ng 19th Congress sa Mayo 24.

Sinabi ni Manila Rep. Bienvenido Abante Jr., na siyang nangunguna sa komite sa karapatang pantao ng Kamara, na itinakda ang pagsisiyasat sa Mayo 22 at ang mga opisyal ng nakaraang administrasyon ay imbitado.

Samantala, nilinaw din ni Abente Jr. na hindi nila nakikita ang rason upang bigyan ng subpoena ang dating Presidente at si Senador Ronald dela Rosa.

Ayon sa Manila Rep., hindi nila inaasahan ang pagdalo ng dalawa sa imbestigasyon para sa EJK.

Iginiit din nitong magiging patas ang pagsusuri at kinakailangan ito dahil marami sa biktima ng EJK ay puro alegadong user at dealer ng ipinagbabawal na gamot.

Bumigay sa pangalawang alok ni Duterte... Willie Revillame, handa nang tumakbong senador

ni Eli San Miguel - Trainee @Entertainment | January 29, 2024

Idineklara ni Willie Revillame na handa siyang tumakbo bilang senador sa 2025 midterm elections sa isang prayer rally sa Davao City noong Linggo, Enero 28.

Inalala niya na dati nang inaalok nina Pangulong Rodrigo Duterte at Senador Bong Go ang isang puwesto sa kanilang partido para sa pagka- senador, ngunit kinailangan niyang tanggihan ito dahil sa mga kontraktuwal na obligasyon sa programa na "Wowowin."

“Last March, two years ago after ng COVID-19 [pandemic], ipinatawag po ako ni Sen. Bong Go at ng mahal na pangulo [Rodrigo Duterte] at ako ay kinausap nila sa Malacañang. ‘Yun po yung pinapatakbo niya ako bilang senator. During that time, meron akong programa sa GMA, ‘yung Wowowin,” aniya.

“Sabi ko, ‘Mahal na pangulo, meron pa po akong kontrata at hindi ko pa po kaya. 'Pag handa na po ako, pag-iisipan ko.’ Sabi nila, ‘Kung ano ang nasa puso mo, sundin mo. Kung ano ang nasa isip mo, ‘yan ang sundan mo.’ Hindi po nila ako pinilit,” dagdag niya.

Ang desisyon ng TV host ay bunga ng ilang araw na pagdarasal, introspeksiyon, at maingat na pagsasaalang-alang sa tiwala nina Duterte at Go.

“Nagdasal ako at hindi ako nakatulog, at naluluha ako dahil isang karangalan sa katulad kong TV host, na alukin ng isang presidente ng Pilipinas na magsilbi sa bayan. Ang sabi sa ’kin, ‘Mahal ka ng tao, pareho tayong mahal natin ang mga kababayan natin, kailangan ka namin sa Senado,’” pagpapatuloy niya. “Noong sinabi n'yo ‘yun sa ’kin, sinabi n'yo, kailangan hindi ko kayo mapahiya kaya ako tumanggi sa inyo… Sabi mo sa akin, ‘Saludo ako sa ’yo, Willie, dahil sinunod mo ang puso mo.’”

Ipinahayag ng host ng "Wowowin" na handa siyang gumawa ng mabuti para sa kanyang mga kababayan at nagpasalamat kay Duterte sa tiwala.

“Handa akong gumawa ng kabutihan, handa akong magsilbi, hindi lang sa bayan, handa akong magsilbi sa mga nangangailangan ng tulong. Again, mahal na Pangulo, maraming salamat sa tiwala,” pahayag ni Willie.

Muling pagpasok ng ICC sa ‘Pinas, nakadepende kay P-BBM — SolGen Guevarra

ni Angela Fernando - Trainee @News | November 29, 2023

Nagpahayag si Solicitor General Menardo Guevarra nitong Miyerkules na si Pangulo Ferdinand "Bongbong" Marcos Jr. ang may huling pasya kung makikipagtulungan ang 'Pinas sa imbestigasyon ng International Criminal Court (ICC) ukol sa kampanya laban sa droga sa panahon ng administrasyong Duterte.

Saad ni Guevarra sa deliberasyon, ang magiging pasya ay nakadepende pa rin sa presidente kahit na may mga resolusyong nanghihimok na makipagtulungan ang bansa sa ICC.

Aniya, "We have no legal duty to cooperate."

Sa kabilang banda, nilinaw niya na ang salita ng Pangulo hinggil sa kooperasyon sa ICC ay pulitikal.

Matatandaang tinanggihan ng ICC Appeals Chamber nu'ng Hulyo ang apela ng pamahalaan ng bansa na itigil ang imbestigasyon sa kampanya kontra droga.