Ilalagay sa mga pampublikong lugar — Robin... Prayer room para sa lahat ng relihiyon

ni Mylene Alfonso @News | June 7, 2026

Photo: Robin Padilla - FB

Sa gitna ng pagod, pangamba, at mga personal na pagsubok na kinakaharap ng maraming Pilipino araw-araw, madalas ay wala man lamang maayos na espasyo sa mga pampublikong lugar kung saan maaaring magdasal, magnilay, o sandaling manahimik.

Naniniwala si Sen. Robinhood “Robin” Padilla na ang tunay na inklusibong lipunan ay hindi lamang nagbibigay ng serbisyo kundi nagbibigay din ng paggalang sa dignidad, pananampalataya, at konsensya ng bawat tao.

Dahil dito, isinulong niya ang Senate Bill No. 1629 o ang Multi-Faith Prayer and Quiet Rooms Act of the Philippines, na layuning magtatag ng mga multi-faith prayer at quiet rooms sa mga pampublikong tanggapan at iba pang pampublikong establisyemento upang magkaroon ng ligtas, neutral, at inklusibong espasyo para sa panalangin, pagninilay, meditation, o tahimik na pagpapahinga anuman ang relihiyon o paniniwala ng isang tao.

Sa ilalim ng panukala, ang mga prayer at quiet rooms ay hindi maaaring magtaglay ng permanenteng simbolo ng anumang relihiyon at dapat manatiling bukas sa lahat nang walang diskriminasyon. Layunin nitong tiyaking may lugar para sa katahimikan at pagninilay ang bawat Pilipino habang iginagalang ang kalayaan sa pananampalataya at paniniwala.

Pabalik-balik sa Senado... Robin sa mga Senador: palpak, walang nagawa!

ni Mylene Alfonso @News | May 31, 2026

Photo: Senate PH

Pinasaringan ni Senador Robin Padilla ang ilang senador na matagal nang nagsisilbi sa Senado at nakailang termino na ngunit palpak at wala pa ring sapat na nagawa sa ikauunlad ng Pilipinas. 

“Kung makapagsalita ang mga paulit-ulit nang nagsisilbi sa Senado at nakailang termino na parang may nagawa na sila para sa ikauunlad ng Pilipinas,” ani Padilla sa kanyang Facebook post.

“Sa panahon niyo wala naman din napala ang mahihirap, manggagawa, magsasaka, mangingisda, maglulupa, at iba pang manpower ang kalakal.” 

Ani Padilla, tila mas yumaman pa ang mayayaman habang mas humirap naman ang mahihirap sa panahon na nakaupo ang mga beteranong kapwa niya senador.

Nasa mukha aniya lahat ng mga beteranong senador ang mga problemang kanyang unang nabanggit at idiniin niyang ang suweldo at mga benepisyo lang naman daw ng mga nagtatrabaho sa gobyerno ang tumaas ngunit patuloy pa ring nanlilimos ang mga normal na Pilipino. 

Pagpapatuloy ni Padilla, nakailang termino na umano sa Senado ang ilang mga senador ngunit hindi pa rin aniya umaabante ang isinusulong ng mga ito. 

“Ako mag-apat na taon na, 19th at 20th Congress hanggang ngayon nag-aantay pa rin na magkaroon na ng katuparan ang mga panukala at pinangako niyo noon at ngayon sa mga manggagawa simula pa lang ng mga termino niyo,” saad pa niya.

Samantala, wala namang senador na binanggit si Padilla kung sino ang kanyang pinatutungkulan.

Sa pagtakas ni Bato — CIDG... Robin, kakasuhan na

ni Jeff Tumbado @News | May 28, 2026

Photo: Robin Padilla - Senate of the Philippines

Nakatakdang sampahan ng kasong Obstruction of Justice si Senador Robinhood Padilla kaugnay sa umano'y pagtakas ng kaibigang si Senador Ronald 'Bato' dela Rosa na may arrest warrant ng International Criminal Court (ICC).

Sa inilabas na pahayag nitong Miyerkules, sinabi ng PNP-Criminal Investigation and Detection Group (CIDG) na matapos ang masusing imbestigasyon, napag-alaman nilang hindi simpleng pakikisakay lamang sa sasakyan ni Padilla ang nangyari kundi isang “maingat na pinagplanuhan at pakikisabwat” nang sikreto para mailabas ng Senado si Dela Rosa noong madaling-araw ng Mayo 14, 2026.

Ayon sa CIDG, magsasampa sila ng reklamo para sa paglabag sa Presidential Decree No. 1829 o Obstruction of Justice laban kay Padilla at sa iba pang mga taong tumulong umano sa pagtakas ni Dela Rosa.

Ihahain ang reklamo sa National Prosecution Service (NPS) ng Department of Justice (DOJ).

Nauna nang iginiit ni Padilla na simpleng “nakisakay” lamang si Dela Rosa sa kanyang sasakyan at ibinaba niya ito sa Makati City nang hindi niya alam kung saan tutungo pagkatapos.