P4 taas-presyo sa bigas

ni Madel Moratillo | March 16, 2023

Nagsagawa ng monitoring ngayon ang Department of Agriculture (DA) sa galaw ng presyo ng bigas sa mga pamilihan sa National Capital Region.

Kasunod ito ng ulat na nagsisimula na umanong tumaas ang presyo ng bigas sa NCR.

Ayon sa mga nagtitinda ng bigas, pagpasok ng Marso ay nagsimula nang tumaas sa piso hanggang kwatro pesos ang presyo ng bigas depende sa klase.

Itinuturo naman ng Federation of Free Farmers na dahilan ang mataas na presyo ng fertilizer na nagsimula noong nakaraang taon.

Ayon kay Agriculture Assistant Secretary Rex Estoperez, sa kanilang monitoring umaabot na sa 22 pesos ang kilo ng palay ngayon.

Mas mataas ito kaysa noong nakaraang taon.

Tiniyak ng DA ang patuloy na pamamahagi ng subsidiya sa mga magsasaka ng bigas.

Samantala, maliban sa bigas, binabantayan din umano ng DA ang presyo ng isda na siguradong tataas ngayong Semana Santa.

Pero tiniyak ng Bureau of Fisheries and Aquatic Resources na may sapat na suplay ng isda sa bansa.

P20 ‘di ubra P27.50 kada kilo ng bigas ang kaya — DA

ni Lolet Abania | June 21, 2022

Ipinahayag ni Department of Agriculture (DA) Secretary William Dar ngayong Martes na habang sinusuportahan niya si President-elect Ferdinand “Bongbong” Marcos Jr. sa layon nitong maibaba ang presyo ng bigas para sa mga mamamayan ng P20 kada kilo, nasa P27.50 kada kilo ang pinakamalapit na kaya nilang gawin.

“The nearest we can do by now — I can be given other figures if you have better way of doing it — P27.50 is the nearest,” saad ni Dar sa isang press conference.

Ayon kay Dar, nagsimula na ang DA na mag-conceptualize kung paano maaabot o magiging malapit sa P20/kg na target habang nakabuo rin nito mula sa mga nakalap na suhestiyon.

Ani opisyal, isa rito ang pag-adopt ng Masagana 99, isang programa ng ama ni P-BBM, ang yumaong dating Pangulong Ferdinand Marcos Sr.

Sa ilalim ng programa, nilalayon ng gobyerno na itaas ang average rice crop ng bansa na aabot sa 99 kaban per hectare, kung saan ang mga magsasaka ay gumagamit naman ng makabagong nadebelop na mga teknolohiya.

Ayon kay Dar, sa kasalukuyan ang national average para sa parehong inbred at hybrid rice ay nasa 4.5 metric tons per hectare, kung saan mas mababa sa 100 kaban.

“So that must be the aspiration there before. Now let’s go beyond that aspiration. So for inbred rice meron kaming konseptong Masagana 150,” sabi ni Dar na giit niya, ito ay katumbas sa 7.5 metric tons per hectare. Para naman sa hybrid rice, ani Dar, plano nilang magkaroon ng Masagana 200.

Samantala, sa isang television interview, sinabi ni dating DA Secretary Manny Piñol na ang pagpapababa sa presyo ng bigas sa P20 ay hindi advisable dahil aniya, makakaapekto ito sa pamumuhay ng mga Pilipinong magsasaka.

“Kung gusto ng Presidente, puwedeng gawin, but it’s not advisable, it’s not economically viable. It will cause government finance of losses, big time,” pahayag ni Piñol sa isang interview ng CNN Philippines.

“The rule of thumb is the price of rice, divided by two is the price of palay. So kung P20 ‘yung bigas mo, P10 lang ‘yung palay noong farmer eh, malulugi ‘yung farmer, hindi papayag ‘yun,” dagdag pa ni Piñol.

Bulok na bigas sa relief goods sa Catanduanes, inireklamo

ni Thea Janica Teh | November 17, 2020

Inulan ng reklamo ang Barangay Igang sa Catanduanes matapos makatanggap ang mga residente ng relief goods na puno ng bulok na bigas.

Ayon kay Igang Barangay Chairman Ronnie Clemente, noong ipinamimigay nila ang sako-sakong bigas, may bumalik na mga residente at ipinakita ang mga natanggap na relief goods.

Nakitang may amag na ang bigas, maitim na at mabaho kaya hindi na puwedeng kainin. Inipon umano ni Clemente ang lahat ng bigas at halos 40 plastic ang ibinalik sa kanila.

Agad namang itinanggi ni Virac Mayor Sinforoso Sarmiento na sa kanila galing ang bulok na bigas. Aniya, “Hindi po galing sa amin iyon kasi ang ipinamimigay namin ay puti ang balot hindi yellow. Tapos wala po kaming old stock, nawawalan nga kami ng stock eh… Sa amin po yung mga nagpa-pack, inaano namin na mag-check ng quality.”

Samantala, sinabi naman ng National Food Authority sa Catanduanes na mayroon umano itong ilang toneladang bigas na ipamimigay sana sa mga nasalanta ng bagyo ngunit nabasa ng ulan. Sa ngayon ay iimbestigahan na ng mga lokal na awtoridad ang nangyaring insidente.