Dahil sa pahamak na mic… RALPH DE LEON, MAS NAG-TRENDING DAHIL SA HOSTING KESA SA MUPH

ni Reggee Bonoan @Sheet Matters | May 5, 2026

Photo: Ralph de Leon - Instagram

“Hahaha! Grabe! ‘Di naman siguro pero ‘di ko in-expect. We needed another moment for MUPH. Last year, si Alden Richards dahil sa bagyo, super-lakas ng boses. This year thankfully it’s me. Hahaha!” masayang pahayag ni Ralph de Leon sa komentong mas nag-trending pa siya kaysa sa nanalong 2026 Miss Universe Philippines (MUPH) na si Bea Millan-Windorski mula sa probinsiya ng La Union.

Tawang-tawa ang 2nd Big Placer ng Pinoy Big Brother Celebrity Collab Edition (PBBCCE) na si Ralph de Leon nang sabihing mas nag-trending pa siya kesa sa katatapos na 2026 Miss Universe Philippines nitong Sabado, May 2, na ginanap sa SM Mall of Asia (MOA) Arena.

Inabot ng mahigit dalawang minutong nakatayo si Ralph sa entablado dahil nagkaroon ng problema ang mic na gamit niya, na ayon sa kanya ay apat na beses nagpalit.

Sey niya,“‘Di ko alam kasi biglang nag-switch ng mic. Nu’ng rehearsal kasi, naka-stand mic ako, tapos nag-switch sila, ‘yun, ‘di gumana kaya sabi ko, ‘Oh my, ano’ng gagawin ko.’”

Hindi naman sumagi sa isipan ni Ralph na umalis.

“The show must go on. Nabigyan ako ng script, nabigyan ako ng spiel kaya kailangan kong tapusin ‘yun,” katwiran ng aktor.

Sabi pa, “Nu’ng pangalawa na ‘di pa nag-work, medyo nagpa-panic na ako. Sabi ko, ‘Grabe, pangalawa na ‘to, ano’ng mangyayari rito? ‘Di ko alam kung maririnig ba ako sa TV, sa live. Tapos, nu’ng 3rd at 4th, ‘di pa rin gumana ang mic. Wala, tawa na lang ako nang tawa sa stage.”

Kaya tawang-tawa si Ralph de Leon dahil trending siya tulad ni Alden Richards noong nakaraang taon, kaya dapat, mayroon din ngayon at nasuwertehan nga siya.

---

BLIND ITEM:

TRULILI kaya na bakasyon muna ang drama ng kilala at mahusay na male singer kahit kaliwa’t kanan ang offer sa kanya sa serye at show sa loob at labas ng bansa?

Maraming offers ang tinanggihan ng mahusay na male singer dahil mas gusto raw muna niyang magpahinga, ayaw niya ng sunud-sunod na trabaho.

Super successful ang concert ng mahusay na male singer kaya’t kinailangan ng ikalawang gabi ang concert niya na pinayagan naman niya, pero sa ikatlong gabi ay umayaw na siya dahil pagod na raw siya.

Pati ang naka-schedule niyang concert sa ibang bansa at inaabangan na siya roon ay hindi na rin niya sinipot, kaya lukang-luka ang promoter sa nasabing bansa dahil biglang bumitaw sa usapan nila ang singer.

Alanganin ang promoter kung sasampahan niya ng kaso ang magaling na male singer dahil hindi siya tumanggap ng down payment at higit sa lahat, verbal lang ang usapan nila ng nag-ahente sa kanya.

Katwiran kasi ng magaling na male singer ay may usapan na sila at iisa rin ang producer ng show niya rito sa bansa kaya okay na ‘yun, pero iba ang nangyari.

Ngayon namin naintindihan kung bakit umiiling ang mga producers at direktor kapag isina-suggest ang male singer sa show.

Napagkamalang si Pia… FAITH, KA-DATE NI SAM, PINAGKAGULUHAN

ni Reggee Bonoan @Sheet Matters | May 4, 2026

Photo: FB Sam SV Verzosa

“Hindi ako si Pia (Wurtzbach), Ate,” nakangiting sabi ni Faith da Silva sa mga fans na nag-aabang ng mga celebrities sa katatapos na Miss Universe Philippines 2026 Coronation Night nitong Sabado, Mayo 2 ng gabi sa SM Mall of Asia (MOA) Arena, Pasay City.

Ang dating Tutok to Win Party-list representative na si Sam Verzosa ang ka-date ni Faith sa nasabing okasyon.

Nang makita ng mga fans ang pagdating nina Sam at Faith ay kaagad silang naglapitan para magpa-picture sa aktres habang si Sam naman ay umatras para bigyan sila ng daan.

Panay ang pose ni Faith habang panay din ang click ng kamera ng mga fans na kumukuha sa kanya. 

Ang ganda ng suot na gown ng GMA artist na nagpakita ng skin kaya sexy ang dating niya sa lahat.

Maririnig sa video na in-upload ng vlogger na si Chantal sa kanyang Facebook (FB) account ang kilig ng mga fans at nagtatanungan kung anong name ni Faith. Alam nila na taga-GMA-7 ang aktres at may isang nagsambit ng pangalang “Pia”.

Kaya si Faith ay nag-react at sinabing “Hindi ako si Pia, Ate.”

May nagbanggit ding anak daw siya ni Lorena at nag-“Hi” naman ang dalaga.

Natatawa kami sa mga fans dahil lapit sila nang lapit sa mga celebrities na hindi nila kilala ang pangalan at saka magpapa-picture, pagkatapos ay ibang pangalan ang mababanggit.

---

Nagpapa-picture sa GF, inangasan… MAVY, HINILA ANG KAMAY NI ASHLEY PALAYO SA FANS

HINDI namin nagustuhan ang pakikitungo ni Mavy Legaspi sa mga fans dahil nang lumabas sila ng girlfriend niyang si Ashley Ortega at may lumapit para magpa-picture, ngumiti naman ang aktres.

In fairness ay maayos namang nagpaalam ang fan at ngumiti si Ashley bilang pagbibigay ng permiso, pero ang ginawa ni Mavy ay kinuha ang kamay ng girlfriend at saka niya hinilang paalis.

Hindi man lang nag-“Hi!” o “Hello!” si Mavy sa mga fans na kitang-kitang iritable pa na parang malaking kasalanan ang ginawa sa dyowa niya.

Dapat ang mga artistang tulad ni Mavy ay nag-iingat dahil ang mga fans ay nagkakakuwentuhan at nagpapalitan sila ng opinyon at ang iba sa kanila ay may kakilalang mga reporters tulad namin na isusulat namin.

Kaya huwag magtaka ang mga personalidad na nasusulat sila nang hindi maganda lalo na kung nagpakita sila ng hindi maayos sa harap ng publiko.

---

BILIB kami kay Ralph de Leon na isa sa mga hosts kagabi sa 2026 Miss Universe Philippines na ginanap sa SM Mall of Asia (MOA) Arena, Pasay City dahil ilang minuto siyang nakatayo sa harap ng stage na nakangiti lang dahil nagkaroon ng technical problem ang mikroponong gamit niya.

Nang ipapakilala na niya ang contestant ay biglang nawala ang sound ng mic at ilang beses niya itong sinubukan pero wala kaya napangiti na lang siya bilang sagot sa mga naghihiyawan sa loob ng arena.

Pagkalipas ng 57 segundo ay inabutan ng mic si Ralph pero nang subukan niya ay wala pa rin kaya hiyawan na naman ang lahat ng nanonood sa kanya at natawa rin siya sabay palakpak kaya tawanan ulit ang lahat.

Napaka-cool ng dating ni Ralph de Leon. Hindi siya nag-panic o nagreklamo, bagkus ay nakangiti lang siya the whole time.

Nagsama sa Morocco… JOSHUA, UMAMING SA TENT SILA NAGKATIKIMAN NI IVANA

ni Reggee Bonoan @Sheet Matters | May 2, 2026

Photo: IG _dinabonnievie & FB Joshua Garcia

“Originally sa Bangkok, Thailand, pero mas gusto ng production ay mas malapit kung ano ang lahi ni Ivana Alawi. May lahi siyang Moroccan ang tatay niya kaya kami nag-shoot du’n,” ito ang pagtatapat ni Joshua Garcia.

Natanong kasi ni Direk JP Habac kung bakit sa Morocco nag-shoot ang Love Is Never Gone (LING) na produced ng Dreamscape Entertainment at ABS-CBN Studios na mapapanood sa Amazon Prime Video simula sa Mayo 8.

Si Joshua ang guest sa vlog nina Direk Antoinette Jadaone at JP na Ang Walang Kuwentang Podcast Channel (AWKP) dahil ang format ng show ay bukingan kaya lahat ng guests ay dapat maging handa sa mga itatanong sa kanila.

Unang beses daw ni Joshua mag-shoot sa Morocco at umaasa siyang mauulit ito dahil balita niya ay mas maganda ang Northern at Southern part ng nasabing bansa kung saan makikita ang magagandang tanawin ng kabundukan.

Balik-tanong ni Direk JP kung lahat ng eksena ay kinunan sa Morocco at sinagot ni Joshua ng, “‘Yung pilot episode.”

Pero tumawang hirit ni Direk Tonette, “Hindi, ‘yung pagtalon ni Ivana, dito ‘yun?”

“Ah, sa breakwater, Manila Bay,” tumatawang sabi rin ni Direk JP.

Ipinagdiinan ni Joshua na ang pilot week nila ay sa Morocco talaga.

“Tapos, ‘yung istorya, hanggang sa mapupunta sa Manila.”

“So, ‘pag pinanood ‘yung trailer, kita agad ‘yung love scene ninyo ni Ivana, kita agad ‘yung pagmamahal ninyo sa isa’t isa,” sabi ng lady director.

“Yeah, malinis ‘yung trailer. Nagustuhan mo ba?” tanong ng aktor kay Direk Tonette.

“Oo, nagustuhan ko at ipinakita talaga ‘yung part ng Morocco na ang gulu-gulo, pero nagustuhan ko talaga ‘yung market ‘yun, ‘di ba? Ano nga tawag du’n?” tanong-sagot naman ni Direk Tonette.

“Souk,” sabi ng aktor.

Full production ng LING ang lumipad sa Morocco kasama ang mga artistang kukunan sa eksena at inamin ni Joshua na naging parte rin siya ng production.

“Nag-audio man ako ru’n, hawak ko ang boom mic, tapos, nagku-cue rin ako ng mga talents kasi ang laki ng lugar na pinagsyusyutingan namin. Kulang kami sa tao minsan, kaya ako ang nagku-cue,” kuwento ni Joshua.

“Taray, nag-e-AD (assistant director)?” tanong ni Direk Tonette.

“Oo, double pay ‘yun,” kaswal na sabi ng aktor na ikinatawa ng dalawang direktor.

Dagdag pa ni Joshua, “Tulung-tulong na rin kasi kami para mas mapabilis. Gusto ko na ring pumack-up.”

Dalawang linggo raw inabot sa Morocco ang buong grupo at ibinahagi niya ang hindi malilimutang experience.

“Inaaliw namin ang mga sarili namin doon. Umaarte rin kami kapag rest day at kumain kami sa Filipino restaurant doon. Napakain kami ni Ivana sa Essaouira kung saan nag-shoot ang Game of Thrones. Kasi ‘pag matagal ka na sa lugar, hahanapin mo na ang Filipino food,” tsika pa ng aktor.

Naikuwento pa ni Joshua na may campfire scene sa safari desert sa Agafay Desert at inakala ng mga turistang naroon ay may campfire show na mangyayari.

“Set-up lang namin, so may libre na kaming talents,” saad ng aktor.

Nabanggit din ni Direk Tonette na kaya magandang mag-shoot sa ibang bansa ay dahil maganda ang background kahit saan itutok ang kamera.

“Unlike dito sa Pilipinas, may toda, may aso,” tumawang sabi ng direktora na ikinatawa rin nina Direk JP at Joshua.

Sabi rin ng aktor, “Ang ganda ng kuha, ang lambot ‘pag sa ibang bansa. Kahit ‘di ka na mag-make-up, ang ganda ng shots kasi ang lambot na.”

Tatlong bansa na ang narating ng aktor para mag-shoot – Barcelona, Spain para sa pelikulang Barcelona: Love Untold (2016); Lucerne at Zurich para sa Unbreak My Heart; at Morocco para nga sa LING.

Samantala, niloloko nina Direk Tonette at JP si Joshua na ang love scene raw nila ni Ivana ay hindi naman kinunan sa Morocco dahil hindi nakita ang labas.

“Saan ‘yung love scene ninyo?” tanong ni Direk Tonette.

“Sa Morocco tent,” kaswal na sagot ng aktor.

“Sa Morocco? Talaga? Sa tent ng catering, ‘yung may butas ng aircon,” humahalakhak na sabi ni Direk Tonette, na ikinatawa rin ni Joshua.

Diin ulit ng aktor, “Sa tent nga kami, sa Agafay tent, sinet-up ng production design.”

“Totoo ba? Bakit nag-tent pa kayo? Paano namin makikitang sa Morocco?” tanong ni Direk JP.

“May window naman, nandu’n ‘yung camel,” ani Joshua na ikinatawa ng lahat.

Pero sa huli ay inamin na rin ni Joshua na sa Pilipinas kinunan ang love scene nila ni Ivana dahil interior at bawal sa Morocco dahil Muslim country ito. 

Para maging komportable sila, rito na sa ‘Pinas kinunan, pero ang exterior ay sa Morocco pa rin.

Sinang-ayunan naman ito ni Direk Tonette, “Tama naman kasi mas effective ‘yun dahil sobrang mahal sa ibang bansa ‘pag interior lang. Minsan nga, natatawa ako. Kunwari Paris, so Paris interior, ang gagawin ng production design, ‘pag ‘di masyadong maingat, maglalagay ng picture ng Eiffel Tower. Sa kuwarto ba natin, may picture tayo ng Luneta Park? Kaya ‘pag napanood, sasabihin, ‘Ay, sa Paris ito kasi may picture siya ng Eiffel Tower.’”

Marami pang napag-usapan sa nasabing vlog na hindi alam ng lahat, lalo na sa mga eksena ng aktor sa mga pelikulang nagawa na niya.