ni Reggee Bonoan @Sheet Matters | May 12, 2026
Photo: IG _ivanaalawi & _jmsnblake
Follow-up ito sa nasulat namin dito sa BULGAR nitong Biyernes, Mayo 8, tungkol kina Ivana Alawi at Jameson Blake na hindi nagpapansinan dahil hindi nagustuhan ng aktres ang ginawa ng aktor sa kissing scene nila sa online series na Love is Never Gone (LING) na napapanood sa Amazon Prime Video.
Ang balitang ito ay nakuha namin sa report ni Ogie Diaz sa vlog nilang Showbiz Update (SU) na kuwento ng kanyang source ay hindi nagustuhan ni Ivana ang paglabas umano ni Jameson ng dila sa kissing scene nila at isinumbong nito sa management kaya pinagalitan daw ang aktor.
Sa vlog nina Ogie at Mama Loi kasama sina Ate Mrena at Tamerlane Mopia ay ikinuwento ng una na nagkausap sila ni Ivana para iwasto ang isyu.
“Iniulat natin dito na inilabas ni Jameson ang dila n’ya sa kissing scene na ikina-turn-off ni Ivana at pagkatapos ay nakarating daw sa management.
“Nakausap ko si Ivana Alawi mismo. Sinabi n’ya mismo na, ‘Ma, mali at ‘di buo ang kuwento mo,’” sabi raw ng aktres kay Ogie.
Nasambit din ng vlogger-host na bukas ang kanilang panig para kay Ivana.
“Totoo na ‘di sila nagkikibuan at ‘di n’ya kinikibo si Jameson Blake katulad nitong mediacon ng Love is Never Gone na ‘di n’ya talaga pinansin ang aktor.
“‘Yung kissing na inilabas ni Jameson Blake ang dila niya, ‘Ma, ‘di ‘yan ang isyu! Wala ‘yan dahil ‘pag may mga ganu’n na lalaki ay sinasabihan kong ‘wag ilalabas ang dila.
“Tingnan mo naman ‘yung sa amin ni Joshua Garcia, ‘di naman kami nagkaroon ng problema. Saka nakaka-ano sa babae na bakit mo ilalabas ‘yung dila mo?” kuwento ng aktres.
At inamin ni Ivana na ang tunay na isyu nila ni Jameson Blake ay “Last December 2025, kinunan ‘yung scene na ibinalibag s’ya o inihagis s’ya sa kama, ilang beses kinunan ‘yung paghagis na ‘di ma-perfect ni Jameson.
“Kaya sa kakaganu’n ay tumama na ‘yung spine n’ya sa kanto o sa edge ng kama na nagdulot ng sakit sa likod n’ya na ang ending, siya’y naospital, three months s’yang nag-undergo ng therapy, ‘di rin nakapag-pilates.”
Ayon pa sa leading lady ng Love is Never Gone ay wala na siyang planong sagutin pa ang isyu dahil ayaw na niyang lumaki, kaso lumabas sa SU kaya kailangang linawin.
Bukod kasi sa SU ay naisulat din ito rito sa BULGAR at ibinalita rin ni Cristy Fermin sa programa nila ni Romel Chika na Cristy Ferminute (CFM) na napapanood sa OnePH YouTube (YT) channel.
Patuloy ni Ogie, “For the record ay ‘di raw s’ya ang nagsumbong sa management kundi ang production mismo. Totoo naman ‘yun na nagre-report ang production sa taas o management kung ano ang issues, ano ang mga concern, ano ang problema, smooth ba ang naging takbo ng taping. ‘So, ang management ang nagpatawag, ‘di ako!’” diin daw ng aktres.
Nabanggit ding nag-offer si Sam Milby na nakasama niya sa seryeng A Family Affair (AFA) kasama rin si Jameson na pagbatiin na sila o mag-usap sila nang personal kaya tinawagan ng una ang huli, pero tumanggi ito dahil nasa Pampanga raw siya that time at malayo sa Manila.
Ang gusto lang daw sana ni Ivana ay humingi ng sorry sa kanya si Jameson sa mga nangyari sa taping ng LING at patatawarin naman daw ito, pero hindi ginawa ng aktor.
Sabi pa raw ni Ivana, “Nasaktan na nga ako, eh. Ke sinadya mo o hindi, may nasaktan, so sana, mag-apologize man lang bilang maginoo.”
Sang-ayon din si Ogie na dapat mag-sorry si Jameson kay Ivana bilang lalaki.
At dahil hindi nga ginagawa ni Jameson ang humingi ng dispensa ay nagdesisyon na si Ivana na hindi niya papansinin ang aktor.
Good thing ay patapos na ang taping ng Love is Never Gone kaya hindi na gaanong magkikita sina Ivana Alawi at Jameson Blake. ‘Yun lang sana, bago tuluyang magtapos ay maisip ng aktor na humingi ng dispensa sa aktres bilang isang tunay na gentleman.
SPEAKING of Love is Never Gone (LING) ay mabilis na umani ng atensiyon ang bagong romance-suspense series ng ABS-CBN dahil nanguna sa most-watched shows sa Prime Video Philippines nang ipalabas ito noong Mayo 8, Biyernes.
Ibinida agad sa unang dalawang episodes ang mapusok na halikan at mainit na romansa nina Teo (Joshua) at Yana (Ivana) sa gitna ng magagandang tanawin ng Morocco, pati na rin ang makapigil-hininga nilang action scenes.
Kasunod nito ang emosyonal na komprontasyon ng dalawa matapos matuklasan ni Teo ang panlilinlang ni Yana tungkol sa tunay nitong koneksiyon sa isang sindikato na naging dahilan ng kanyang pagkakakulong.
Makalipas ang ilang taon, muling nagkita sina Teo at Yana pero bitbit ni Yana ang bagong pagkatao bilang si Gem Verona, ang asawa ng isang mayamang abogado na si Ace (Jameson Blake). Ipinakita rin ang buhay ni Teo matapos makalaya at makabalik ng Maynila sa tulong ng dati niyang dyowa na si Larejean (Jane Oineza).
Mauuwi ang dating mainit na pagsasama nina Teo at Yana sa isang paghihiganti na susubok kung hanggang saan ang kaya nilang isakripisyo at ibigay para sa pag-ibig sa likod ng pagtataksil at madilim na sikreto ng nakaraan.
Huwag palampasin ang maiinit na tagpo sa Love is Never Gone, na eksklusibong napapanood sa 240 bansa at teritoryo sa Prime Video. May dalawang bagong episodes na ipinapalabas tuwing Biyernes.
