ni Reggee Bonoan @Sheet Matters | July 21, 2024
Finally, coming from the horse’s mouth na inamin na rin ni Nadia Montenegro na may anak siya kay Baron Geisler na si Sophia.
Kaya namin ito nasabi ay sa dahilang nu’ng umamin si Baron sa one-on-one interview niya sa Ogie Diaz Inspires ay hindi niya binanggit kung sino ang ina ng bata at pangalan din ng anak.
Ito ang ipinagdiinan ni Nadia nu’ng huling makausap namin ang aktres sa mediacon ni Robin Padilla para sa pelikula niyang Gringo: The Gregg Honasan Story mula sa Borracho Films na walang binanggit si Baron kung sino ang ina at pinag-iingat din nito ang lahat ng magsusulat dahil menor-de-edad ang kanyang anak at puwedeng maharap sa kasong legal.
Pero nabanggit naman ni Nadia sa panayam namin na malaki na ang bata at 17 years old na si Sophia, at finally, nagkita na ang mag-ama sa mismong bahay nila. Pero, hindi inakala ng bagets na lalabas sa publiko ang pagkikita nila base sa usapan nilang mag-ama.
Laking-gulat na lang ni Sophia nang aminin mismo ni Baron sa panayam niya kay Ogie na nagkita silang mag-ama at binigyan daw siya ng alahas ng aktor.
Pero sa panayam niya sa Fast Talk with Boy Abunda sa GMA-7 ay buong-ningning niyang inamin na may love child siya.
Ang diretsong tanong ni Kuya Boy kay Nadia, “Does Baron Geisler have a child with you?”
“Tito Boy, I’ve already admitted that. Yes, Sophia is turning 18 in August that’s why I’m here, Tito Boy. Not for views, not for trends, because that’s one thing I hate but to put an exclamation to everything,” pagtatapat ni Nadia.
Nang makausap namin si Nadia ay itinanggi niya na may pinag-aminan siya tungkol sa pagkakaroon niya ng anak sa iba.
“Tito Boy, 17 years ago, may isiniwalat ang isang tao tungkol sa buhay ko na I don’t think naman na anybody has the right kasi nu’ng time na ‘yun, inaayos ko lahat, (at) hindi man lang kinonsider na seventeen years ago kung ano ang pinagdaraanan ko, ng mga anak ko, kung ano ang puwedeng mawala sa ‘kin,” paliwanag ni Nadia.
At ang pinagdaraanan daw ng aktres ay, “Nang ako’y nagkaanak.”
Nauulit na naman daw ngayon dahil nga naungkat ang kanyang pagkakamali dahil sa paglantad ni Baron tungkol sa anak at marami ang nagsulat na tahimik na sana ang lahat pero dahil nagbukas ang aktor ng topic, pinik-ap ng lahat.
Tanong lang namin kay Nadia, sino ang mga elementong sinabi niya na pumik-ap? Ang media ba, kasama na kami?
Natural na pipik-apin ‘yun dahil malaking balita ang pinasabog ni Baron. Hindi man binanggit ng aktor ang pangalan ni Nadia na ina ng anak nito ay open secret ito na hindi na lang napag-uusapan dahil tahimik na, pero muling nabuksan dahil sa panayam ni Baron kay Ogie.
Ayaw ipakausap ‘pag lasing ang aktor… ANAK NI NADIA, NA-BULLY SA SCHOOL DAHIL NABULGAR NA SI BARON ANG TATAY
Tumagal nang 17 years na hindi nagkita ang mag-ama dahil iniiwas ni Nadia.
“Give me a reason (kay Baron) na ipaharap kita sa kanya na sober ka,” ani Nadia.
Hirit ni Kuya Boy, “That wouldn’t happen?”
“No, the drunk messages, the drunk text to my daughter, do you think that would help her? You came out in an interview all of a sudden without even asking us? Even if you don’t mention my name, sa tingin mo, hindi kami nabulabog? Did you even think for a while what would happen to your daughter?” ang mga tanong ni Nadia para kay Baron.
Sa sinabing naapektuhan muli sina Nadia at ang anak, “School, friends, she was bullied!” ani ng aktres.
May nag-post daw sa school nila sa student council ng larawan ni Baron na nasa kulungan at tanong, "Kaninong tatay ‘to?"
“Tito Boy, kailangan ko pa bang ikuwento kung ano ang pinagdaanan namin just to keep our peace? This is my life, this is my children’s lives, this is my story, Tito Boy. No one has the right to tell my story! My mistakes, I’ve always owned my mistakes, but let me say kung ano ang pagkakamali ko, ‘di ikaw o ‘di ko kailangan ng spokesperson. I’ve always faced my battles. I’ve always put them head on. Why? ‘Coz I pray,” pangangatwiran ni Nadia.
At ngayong umamin na si Nadia Montenegro at nabanggit naman na ang pangalan ni Baron Geisler ay masasabi naming vindicated na ang taong nagpaputok nito na dati-rati ay tigas ng katatanggi ang aktres dahil katwiran niya, “No one has the right to tell my story!”
Pero kasi, sa larangan ng pagbabalita ay unahan sa paglalabas.
BF ni Rhian, palaban na rin… SAM AT ISKO, BANGGAAN BILANG MAYOR NG MAYNILA
Batang Sampaloc, Manila ang boyfriend ni Rhian Ramos na si Congressman Sam Versoza kaya’t may karapatan siyang kumandidado sa pagka-mayor sa darating na halalan sa 2025.
Maraming nagkukuwento sa amin na kakandidatong mayor ang Tutok To Win partylist first nominee sa Maynila kaya naglilibot na raw ito kasama si Rhian at naipo-post naman ito sa kanyang Facebook (FB) account na naghahatid sila ng tulong at dumadalo sa mga events sa lungsod.
Napansin din naming may mga posts si Sam sa kanyang social media account ng luma nilang bahay sa Sampaloc, kung saan doon daw siya lumaki.
Sakto naman na nakita namin ang kongresista minus his girlfriend sa ginanap na birthday celebration ni DILG Secretary Atty. Benhur Abalos, Jr. sa EDSA Shangri-la nitong Biyernes ng gabi, July 20, kung saan isa siya sa mga guests.
At dahil nagmamadali ang lahat sa paglalakad sa red carpet ay sinimplehan na namin ng tanong si Cong. Sam kung tatakbo siya sa pagka-mayor sa Manila.
“Yes, tatakbo ako, yes!” mabilis niyang sagot sa amin.
Sundot namin kung kailan niya ito iaanunsiyo.
Sagot niya, “Sa October.”
Ito ang napansin namin kay Cong. Sam Versoza na laging diretso siya sumagot sa mga tanong at walang liguy-ligoy sa ilang beses na namin siyang nakakapanayam.
Sayang nga at hindi namin natanong kung aware ba siya na malalaking pangalan sa pulitika ang makakalaban niya sa Maynila dahil balitang kakandidato ulit si Yorme Isko Moreno at tatapatan niya ang kaibigan at kasalukuyang mayora ngayon na si Dr. Honey Lacuña.
Samantala, sa 62nd birthday ni Sec. Benhur ay may halong showbiz at pulitika ang kanyang mga panauhin bukod sa pamilya at mga kaibigan, lalo na nu’ng siya pa ang namumuno ng MMDA at MMFF, kung saan marami siyang natulungang mga filmmakers at nakita namin du’n sina Atty. Joji Alonso ng Quantum Films, Direk Perci M. Intalan ng IdeaFirst Company, naroon din sina Dra. Vicki Belo at Doc. Hayden Kho ng Belo Medical Group, ang owner ng Aivee Clinic na sina Dr. Aivee Aguilar-Teo at husband, Dr. Z’Shen Teo at marami pang ibang kilala rin sa showbiz at larangan ng pulitika.
Anyway, para sa kanyang b-day, gustong mag-give back ni Sec. Abalos Jr. sa tatlo niyang foundation na itinatag — ang Ciara Marie Abalos, Kwarto Ni Neneng at BIDA.
