HPG, na-hit-and-run ng SUV sa SLEX

ni Jeff Tumbado @News | June 8, 2026

Photo: PNP-HPG Region IV-A

Nanawagan ang National Police Commission (Napolcom) para sa mabilis na imbestigasyon kaugnay sa insidente ng hit-and-run na kinasangkutan ng isang motorcycle rider ng Philippine National Police-Highway Patrol Group (PNP-HPG) at isang sport utility vehicle (SUV) sa South Luzon Expressway (SLEX) nitong Sabado.

Batay sa video na kumakalat sa social media, nabangga ng SUV ang pulis na sakay ng motor na, sa halip na tulungan ay tinakasan.

Sa inilabas na pahayag nitong Linggo, sinabi ni Napolcom Executive Director and Vice Chairman Atty. Rafael Calinisan, na isang nakakaalarmang insidente ang nangyari na hindi lamang naglagay sa panganib ng isang alagad ng batas na gumaganap ng kanyang tungkulin kundi maging sa iba pang mga motorista sa kalsada.

Samantala, sinabi ng PNP-HPG na nagpapatuloy ang kanilang imbestigasyon sa pakikipag-ugnayan sa pamunuan ng SLEX upang matukoy at maaresto ang driver na sangkot sa insidente.

Ayon pa sa HPG, nasa maayos na kondisyon ang pulis matapos magtamo ng minor injuries sa insidente.

Kinasuhan ng lady cop ng sexual harassment... PNP-HPG Chief, nag-resign

ni Jef Tumbado @News | March 26, 2026

Nagbitiw sa puwesto si Philippine National Police-Highway Patrol Group (PNP-HPG) Acting Director PBGen. Jessie Tamayao matapos sampahan ng reklamong sexual harassment ng isang babaeng pulis sa National Police Commission (NAPOLCOM).

Sa isang pahayag, itinanggi ni Tamayao ang akusasyon, “I want to state, in the clearest and most categorical terms, that I am innocent of these charges… I firmly deny the allegations. I can only deduce this as a personal vendetta the reason of which I am not aware”.

Nahaharap sa reklamong administratibo si Tamayao matapos magsampa ng kasong sexual harassment ang isang babaeng pulis laban sa kanya nitong Martes.

Pinangalanan si Tamayao sa limang pahinang sinumpaang salaysay na isinumite sa NAPOLCOM Inspection, Monitoring and Investigation Service (IMIS).

Ayon sa complainant, niyaya siyang makipagtalik ng opisyal at umano’y hinawakan ang kanyang puwet. Sinamahan umano ito ng pananakot at pagbabanta, kabilang ang posibilidad na mailipat siya sa Mindanao kung hindi siya papayag sa mga hinihingi nito.

Ibinunyag din ng complainant na in-access ng opisyal ang kanyang cellphone nang walang pahintulot, binasa ang kanyang mga mensahe, at kinunan ng larawan ang mga laman ng kanyang gallery, Messenger, at Viber.

Pinagbantaan din umano siya na gagamitin ang mga ito laban sa kanya sakaling magsumbong siya sa dating HPG Director na si Hansel Marantan.

Mag-mask kahit sa loob ng sasakyan — Palasyo

ni Lolet Abania | February 5, 2021

Pinanindigan ng pamahalaan ang itinakdang polisiya na kailangang nakasuot ng face mask ang lahat ng nasa loob ng sasakyan kahit pa magkasama sa bahay o hindi ang nakasakay dito.

Sa isang joint statement, ayon sa Department of Transportation (DOTr) at sa Department of Health (DOH), dapat na sundin at ipatupad ang sumusunod na guidelines sa pagsusuot ng face mask sa loob ng sasakyan:

• Kung mag-isa lamang bumibiyahe, maaaring tanggalin ng driver ang kanyang face mask.

• Kung ang driver ay may kasamang pasahero o mga pasahero, mandatory na lahat ng indibidwal na nasa loob ng sasakyan ay maayos na nakasuot ng face mask, kahit pa magkasama sa isang bahay ang nakasakay dito.

Ang polisiya ay alinsunod sa naging desisyon ng Inter-Agency Task Force on Emerging Infectious Diseases (IATF-EID).

Sa isang Viber message naman ni DOTr Assistant Secretary Goddess Libiran, sinabi nitong ang mga policy-makers ang siyang magpapaliwanag kung paano maayos na ipatutupad ang policy at kung ano ang mga fines and penalties na ipapatupad sa mga pasaway.

Nakapaloob sa joint statement ng DOH-DOTr na ang hakbang ay nabuo sa koordinasyon at pagtutulungan sa pagitan ng Land Transportation Office (LTO), Land Transportation Franchising and Regulatory Board (LTFRB), Metropolitan Manila Development Authority (MMDA), Inter-Agency Council for Traffic (IACT), Philippine National Police-Highway Patrol Group (PNP-HPG), iba pang law enforcement agencies, at local government traffic offices/units, na ayon pa sa statement, “Concerning the proper implementation of the Resolution, and the imposition of appropriate fines and penalties for violations thereof, in accordance with existing laws, rules and regulations.”