Patay sa nasunog na MV June Aster, 77 na

ni Mai Ancheta @News | September 17, 2026

Photo: PCG

Nasawi nitong Martes ng hapon ang isang nakaligtas sa sunog sa passenger ferry na MV June Aster matapos magtamo ng malubhang paso.

Ang biktima, na isang crew member ng barko, ay ginagamot sa Culion Sanatorium and General Hospital nang pumanaw. Hindi naman inilabas ng mga awtoridad ang kanyang pagkakakilanlan.

Dahil sa kanyang pagkamatay, umakyat sa 77 ang bilang ng mga nasawi.

Patuloy naman ang pinalawak na search and rescue operation para sa 12 pasaherong nawawala, isang linggo matapos masunog ang barko sa karagatan ng Coron, Palawan.

Patuloy din ang imbestigasyon upang matukoy ang mga pangyayaring humantong sa nakamamatay na sunog.

4 Coast Guard, sibak sa paglubog ng MV Trisha Kerstin

ni Mai Ancheta @News | February 27, 2025

Photo File: Philippine Coast Guard

Sinibak ng Philippine Coast Guard ang apat na enlisted personnel, habang sinuspinde ng isang taon nang walang suweldo ang dalawang opisyal nito kaugnay sa trahedya nang paglubog ng M/V Trisha Kerstin 3 noong February 24, 2026.

Ito ang inilabas na desisyon ng PCG matapos ang ginawang imbestigasyon ng Coast Guard Inspector General-Internal Affairs Service.

Lumitaw sa imbestigasyon na nabigo ang apat na enlisted personnel na magsagawa ng independent verification sa totoong bilang ng mga pasahero ng barko at hindi maayos na dinokumento ang load line markings ng barko.

Na-demote naman ng isang ranggo ang duty officer na si PO3 Jestoni Barreto dahil sa kapabayaan sa kanyang  tungkulin.

Sinuspinde naman ng isang taon ng walang sahod ang dalawang senior officers na sina LCDR Tristan Jenner Erediano at Lt. Jason Pagbonocan na nagsilbing station commander at acting Station commander sa Zamboanga.

Inatasan ang mga ito na sumailalim sa mandatory retraining sa ship inspection standards at superbisyon ng PDI teams.

Sinabi ni PCG Spokesman Noemi Cayabyab na hindi kinukunsinti ng Coast Guard ang mga ganitong uri ng paglabag sa maritime safety standards at palalakasin ang inspection protocols at training ng personnel upang hindi maulit ang trahedya.

Malapit sa Luzon... 'Monster ship' ng China, naispatan

by BRT @Brand Zone | Jan. 6, 2025

• 

PCG Photo: 'The Monster’ China Coast Guard 5901

Namataan malapit sa Luzon ang 'monster ship' ng China Coast Guard, ayon kay American maritime security analyst Ray Powell.

“Today ‘The Monster’ China Coast Guard 5901 has brought its intrusive patrol even further east from Scarborough Shoal. It is now asserting #China’s claim of jurisdiction just 50 nautical miles from the #Philippines’ main island of Luzon,” saad sa post ni Powell, Sabado ng umaga.

Ang “monster ship” ay may timbang na 12 tonelada, na limang beses na mas malaki kaysa sa dalawang pinakamalaking barko ng Philippine Coast Guard (PCG).

Kinumpirma ng PCG ang presensya ng barko ng China sa layong 54 nautical miles sa Capones Island, Zambales.

Agad na ipinadala ang PCG Caravan, BRP Cabra at helicopter para subukin ang CCG at igiit na ang naturang barko ay nasa loob ng exclusive economic zone (EEZ) ng Pilipinas.

Iniulat na ang 'monster ship' ay bumibiyahe pa-kanluran at ngayo'y nasa 85 nautical miles mula sa Zambales.

Ayon naman kay National Security Council Assistant Director General Jonathan Malaya, hindi nakakabiglang malaman na may monster ship ang China na umaaligid sa Bajo de Masinloc dahil matagal nang pinupuno ng mga barko ng China ang naturang lugar.