Cargo boat tumaob, 7 nawawala

ni Levi Gonzales @News | November 6, 2026

Photo: Coast Guard Station Northern Quezon

Pitong tripulante ang nawawala matapos tumaob ang isang cargo boat sa karagatang sakop ng Jomalig at Balesin Island sa Polillo, Quezon.

Batay sa paunang imbestigasyon, umalis ang bangkang MV AC mula Jomalig bandang alas-3 ng madaling-araw patungong Atimonan upang maghatid ng kopra nang salubungin ito ng malalaking alon hanggang sa tuluyang tumaob.

Kabilang sa mga nawawala ang 62-anyos na kapitan ng bangka at anim pang tripulante, na pawang residente ng Brgy. Talisoy, Jomalig.

Patuloy ang search and rescue operation ng Philippine Coast Guard, pulisya at lokal na disaster response team upang mahanap ang pitong nawawala.

Roro, may 58 sakay, tumagilid

by Mai Ancheta @News | October 31, 2026

Photo: PCG

Tumagilid ang MV Virgen de Peñafrancia II malapit sa Real Port sa Brgy. Ungos, Real, Quezon, alas-12:44 ng hatinggabi nitong Biyernes, Oktubre 30, matapos umanong matangay ng malakas na agos ng dagat.

Ayon sa Philippine Coast Guard, ligtas ang lahat ng 58 sakay, kabilang ang dalawang sanggol, 38 iba pang pasahero at 18 tripulante. Galing sa Polillo Port ang barko na may kargang 14 rolling cargo.

Samantala, nakitaan ng oil sheen malapit sa hulihan ng barko kaya agad na naglatag ng oil spill booms ang mga awtoridad upang maiwasan ang pagkalat ng langis.

Patuloy ang imbestigasyon sa insidente.

PCG, hinarang ng China Coast Guard sa paghuli sa pinaghihinalaang dynamite fisher

by BRT @News | October 5, 2026

Photo: PCG

Hinarang umano ng isang barko ng China Coast Guard ang mga tauhan ng Philippine Coast Guard (PCG) habang hinahabol nila ang isang banyagang bangkang pinaghihinalaang nagsasagawa ng dynamite fishing malapit sa Pag-asa Island.

Ayon sa PCG, umabot sa halos 10 yarda ang layo ng Chinese vessel sa kanilang bangka habang sinusundan nila ang pinaghihinalaang illegal fishing vessel.

Napilitan ang mga Pilipinong awtoridad na itigil ang paghabol at bumalik sa Pag-asa Island bandang alas-10:48 ng umaga para sa kaligtasan.

Samantala, sinabi rin ng AFP na dalawang Chinese aircraft ang ilang beses na lumapit sa isang Philippine military aircraft habang nagsasagawa ito ng routine patrol sa Bajo de Masinloc noong Oktubre 3.