Acosta sa bagong PAO lawyers: Labanan ang korupsiyon

ni Mylene Alfonso @News | August 15, 2026

Photo: File

Binalaan ni Public Attorney’s Office (PAO) Chief Persida Rueda-Acosta ang mga bagong talagang public attorney laban sa korupsiyon at hinimok silang panatilihin ang integridad at de-kalidad na serbisyong legal para sa mga mahihirap na Pilipino.

Sa kanyang talumpati sa orientation at oath-taking ceremony ng PAO, binalaan niya ang mga ito laban sa pagtanggap ng pera, pagkain o iba pang regalo mula sa mga kliyenteng may nakabinbing kaso. Aniya, kahit maliliit na pabor ay maaaring maglantad sa mga public attorney sa reklamo at posibleng pagkakatanggal sa serbisyo.

Binigyang-diin ni Acosta na hindi lamang pagpapawalang-sala ang sukatan ng tagumpay sa public defense. Maaari rin umanong maging magandang resulta ang pagpapababa ng sentensiya, probation, good conduct time allowance o paglaya sa pamamagitan ng naaangkop na legal na remedyo.

Samantala, nakatakdang magsimula sa kanilang mga assignment sa Setyembre ang 282 bagong talagang kawani ng PAO matapos ang kanilang orientation at training.

'Laws of Life' book ni PAO Chief Acosta, inilabas na

by BRT @News & Lifestyle | July 16, 2026

Pormal na inilunsad ni Chief Public Attorney Dr. Persida V. Rueda-Acosta, DSD, JD ang kanyang pinakabagong aklat na Laws of Life sa isang seremonya sa The Manila Hotel noong Martes, Hulyo 14, 2026.

Naglalaman ang aklat ng mga makabuluhang aral, paalala, at karunungang hinubog ng halos apat na dekada ng kanyang paglilingkod sa batas at sa sambayanang Pilipino.

Hindi tulad ng mga naunang aklat ni Acosta na nakatuon sa batas at jurisprudence, inilalahad ng Laws of Life ang mas personal na panig ng pinuno ng Public Attorney’s Office (PAO). 

Sa kanyang talumpati sa harap ng matataas na opisyal ng PAO at mga panauhin, sinabi ni Acosta na nabuo ang aklat mula sa maraming pakikipagtagpo, pagsubok, at tagumpay na kanyang naranasan habang naglilingkod sa sambayanang Pilipino.

“This book is my humble offering to the poor Filipinos. May it serve as a source of inspiration for the youth, young families, and even our senior citizens, reminding them that life's greatest lessons are often learned through faith, perseverance, and compassion,” ani Acosta.

Naging tampok sa paglulunsad ang isang audio-visual presentation tungkol sa buhay ni Acosta bilang abogado, guro, legal aid luminary, manunulat, at lingkod-bayan. Sinundan ito ng pormal na pagpapakilala sa aklat, pagbubunyag ng pabalat, pagtalakay sa nilalaman, at mensahe mula sa may-akda.

Sa kanyang pagpapakilala sa Laws of Life, sinabi ni Regional Public Attorney Vevelyn O. Monsanto ng PAO Eastern Visayas na napapanahon ang paglalathala ng aklat.

“Between the recent school shooting in Tacloban City and the rising tide of emotional distress among our youth, the timing of this release is critical. We believe this beautiful book will provide vital support, comfort, and direction during these turbulent times,” ani Monsanto.

Inilathala bilang unang edisyon, ang bawat sipi sa aklat ay sinamahan ng maikling pagninilay na nag-uugnay sa karunungang nakapaloob dito sa mga sitwasyon at hamon sa pang-araw-araw na buhay.

Kilala sa kanyang malawak na koleksiyon ng mga sulating legal, kolum sa pahayagan, at mga aklat sa batas, sinabi ni Acosta na kumakatawan ang Laws of Life sa isang bagong yugto ng kanyang karera bilang manunulat.

Sa halip na magpaliwanag ng mga doktrinang legal, layunin ng aklat na magbahagi ng praktikal na karunungang bunga ng maraming taon ng paglilingkod, sakripisyo, at matatag na pananampalataya.

Inilarawan ng mga dumalo ang aklat bilang higit pa sa isang koleksiyon ng mga sipi. Anila, nagsisilbi rin itong gabay sa pamumuhay nang may integridad, layunin, at malasakit sa kapwa.

Binigyang-diin din nilang mahalaga ang mga aral na nakapaloob sa aklat hindi lamang para sa mga abogado, kundi maging sa mga estudyante, kawani ng pamahalaan, mga pamilya, at karaniwang Pilipino.

Para kay Regional Public Attorney Jose Edmund E. Guillen ng PAO Western Visayas, hindi lamang napapanahon kundi kinakailangan din ang aklat sa gitna ng inilalarawan niyang patuloy na paghina ng sistema ng pagpapahalaga sa bansa.

“This is one book which one can enjoy while appreciating the sunset or sitting under a tree on a hilltop or while listening to the sound of the waves,” ani Guillen.

Samantala, ibinahagi ng broadcast and print media veteran na si Leonida Bonifacio-Sison, na dumalo sa paglulunsad, kung paano lubos na nagustuhan ng kanyang 13-anyos na apo ang aklat.

“My granddaughter especially liked the chapter on how anger can affect a child's growth. She even said that the lessons in this book should become the standard in every Filipino household,” ani Sison.

Sa pag-abot ng unang edisyon ng Laws of Life sa mga mambabasa, nagpahayag si Acosta ng pag-asang magsisilbing inspirasyon ang mga pahina nito upang mamuhay ang mga tao nang may kabutihan, tapang, malasakit, at pagpapakumbaba.

Binigyang-diin din ng Chief Public Attorney na bagama’t mga batas ang namamahala sa lipunan, karunungan naman ang gumagabay sa puso at mga pasya ng tao.

“This book exemplifies the standard of what a good rounded Filipino in the modern day looks," -- Rianne Maxene Eloise Yu Sison (Gr. 8, Brent International School)

"The book was pleasing to read as the chapters transitioned cleanly.

“The food analogies were well thought out and helped to identify being a balanced, well-rounded person like PAO Chief. I especially liked the chapter about how anger may affect a child’s growth.

“As a young member of the family, I've observed that getting angry rarely solves anything, and this should be the standard in Filipino households now. 

“Lastly, I admired how the book stayed God-centric and God-fearing. But it still shows that life is full of hardships that must be overcome, all for the purpose of becoming better and closer to him. 

“This book exemplifies the standard of what a good rounded Filipino in the modern day looks, and hopes to achieve. Still rooted in tradition, but looking ahead to the future. 

“Young adults must read this, especially young parents who want a sustainable, life-filled home."

PAO sa DBM: DOJ opinion hindi na kailangan sa usapin ng pantay na ranggo, sahod

ni BRT @News | June 25, 2026

Photo: FIle / PAO

Paulit-ulit na iginiit ng Public Attorney’s Office (PAO) na hindi na kailangan ang anumang legal na opinyon mula sa Department of Justice (DOJ) kaugnay ng hinihingi ng Department of Budget and Management (DBM) tungkol sa pantay na ranggo at sahod para sa mga manananggol pambayan at kawani nito.

Mismong si PAO Chief Persida Rueda-Acosta ang nagsabing hindi na nangangailangan ng anumang pagsang-ayon ng DOJ sapagkat ang PAO ay isang malaya o autonomous na tanggapan mula nang itatag ito sa ilalim ng Republic Act 9406, at “nakakabit lamang ito sa DOJ para sa layunin ng koordinasyon sa patakaran at programa.”

Ibinigay ni Rueda-Acosta ang pahayag bilang reaksiyon sa pinakahuling liham ng bagong pamunuan ng DBM na muling humihiling sa DOJ ng legal na opinyon nito tungkol sa kahilingan ng PAO para sa pantay na ranggo at sahod ng mga abogado ng bayan at kawani nito kumpara sa kanilang counterpart sa National Prosecution Service (NPS).

“Naniniwala kami na walang magiging resolusyon mula sa DOJ, kung isasaalang-alang na ang usapin ay nakabinbin nang mahigit dalawang taon (noon, at ngayon ay mahigit tatlong taon na),” ayon sa chief public attorney na nagsabing kanya na itong naipaliwanag sa isang liham kay Pangulong Ferdinand Marcos Jr. ang posisyon ng PAO.

Sa liham kay DBM Undersecretary Wilford Will Wong, sinabi nina Rueda-Acosta, Deputy Chief Ana Lisa Soriano, at PAO-Metro Manila Director Revelyn Ramos-Dacpano na inaasahan din nila na walang resolusyong magmumula sa DBM sa kabila ng paggiit ng PAO sa kasarinlan at awtonomiya nito mula sa DOJ.

Ang ganitong kawalan ng aksyon ay pumipigil sa PAO na gamitin ang angkop na legal na lunas; anila, halos nakasabit sa ere ang usapin.

“Gayunpaman, ang ganitong kawalan ng aksyon ng DOJ ay hindi dapat maging hadlang sa pagpapahalaga sa kahilingan ng PAO para sa pantay na ranggo at sahod alinsunod sa probisyong konstitusyonal tungkol sa karapatan sa mabilis na pagresolba ng mga kaso,” wika ng top PAO officials.

Bilang patunay, binanggit ng PAO ang kaso ng Power Sector Assets and Liabilities Management (PSALM) Corporation na humingi ng kani-kanilang pagsang-ayon ng Commission on Audit (COA) at ng Office of the Government Corporate Counsel sa pakikipagkasundo ng legal advisors.

Ayon sa Korte Suprema, ang labis na pagkaantala ng COA sa kahilingan ng PSALM para sa pagsang-ayon ay katumbas ng lubhang pang-aabuso sa kapangyarihan dahil nilabag nito ang karapatan ng PSALM sa mabilis na pagresolba ng kaso nito gaya ng itinatadhana ng Saligang Batas.

“Sa katunayan, ang gayunding labis na pagkaantala ng DBM (mahigit tatlong taon) ay hindi at hindi dapat maging hadlang sa pagbibigay ng pantay na ranggo at sahod; lalo na’t ito ay nauna nang pinagtibay ng Korte Suprema en banc, ng Quezon City-Regional Trial Court, at ng Court of Appeals,” paliwanag ni Soriano.

Ayon naman kay Ramos-Dacpano, nauna nang naipagkaloob ng DBM ang mga benepisyo sa pagreretiro sa mga retirado ng PAO na katulad ng sa kanilang katumbas sa NPS.

“Wala nang ibang kailangang gawin ang DBM kundi ilabas ang nararapat na sahod ng mga concerned PAO officials,” ani Alma Latosa, pinuno ng financial planning and management service ng PAO, na isa rin sa mga pumirma sa liham.

Bukod dito, sinabi ng nangungunang mga opisyal ng PAO na lubos na hindi makatwiran para sa DBM na mag-angkin ng magkasalungat na posisyon—na ang mga abogado ng bayan ay kwalipikado sa mga benepisyo sa pagreretiro sa ilalim ng R.A. 10071 (NPS Law) ngunit hindi naman sila karapat-dapat sa mga ranggo at sahod sa ilalim ng parehong R.A. 10071, na siyang kasalukuyang posisyon ng DBM.

“Sa huli, ang mahihirap, nangangailangan, at marginalized ang magtitiis ng bunga ng pagkakaroon ng mga abogadong mababa ang suweldo, walang sigla, at dahil dito ay hindi gaanong mahusay—isang katotohanang taliwas sa prinsipyo ng katarungang panlipunan at paglabag sa garantiyang konstitusyonal ng sapat na legal na tulong sa mahihirap,” ani Rueda-Acosta.