Hotel gumuho, 1 patay, 40 na-trap

ni Jeff Tumbado @News | May 25, 2026

Photo: Ang gumuhong 9-palapag na hotel building sa Brgy. Balibago, Angeles City, Pampanga habang isinasailalim sa search and rescue operations dahil sa naiulat na may ilang tao ang naipit. (Jeff Tumbado)

Gumuho ang isang 9-storey building na kasalukuyang itinatayo sa Teodoro St., Brgy. Balibago, Angeles City, Pampanga, madaling-araw ng Linggo.

Habang isinusulat ang balitang ito, isang bangkay ang narekober sa 2nd floor ng katabing hotel na nadamay sa pagguho ng nasabing building. Kinumpirma ni BFP Officer-in-Charge F/Chief Supt. Rico Kwan Tiu na ang katawan ng PWD na Malaysian national ang nakuha ng search and rescue team.

Samantala, ayon kay Jay Pelayo, information officer ng Angeles City Public Information Office (PIO), bandang alas-3 ng madaling-araw nang biglang mag-collapse ang itinatayong hotel building kung saan tinatayang nasa 30 hanggang 40 umano ang na-trap.

Kaugnay nito, nasa 26 katao na pawang mga construction workers ang sinasabing nailigtas na ng mga otoridad habang dalawa pa ang na-rescue mula sa isang apartelle na tinamaan ng pagguho ng gusali. Nagtamo ng minor abrasions ang mga biktima at nasa maayos nang kondisyon.

Nakaligtas din nang walang sugat ang project foreman at 10 construction workers nito matapos makatakbo palayo bago tuluyang bumagsak ang gusali.

Patuloy namang nagsasagawa ng search and rescue operations ang BFP at ang Disaster Risk Reduction and Management Office (CDRRMO) dahil may ilan pang manggagawa ang naiulat na naipit sa gumuhong gusali.

Ayon kay Pelayo, hindi pa matiyak ang eksaktong sitwasyon sa ilalim ng mga guho ngunit patuloy ang search and rescue operation ng mga otoridad.

Kasabay ng rescue operation, nagsasagawa na rin ng imbestigasyon ang lokal na pamahalaan kaugnay sa legal na estado at structural history ng gusali.

Personal na ring nagtungo sa lugar si Angeles City Mayor Carmelo Lazatin II upang pangunahan at bantayan ang rescue operations.

P3.8B shabu, buking sa bodega sa Pampanga

ni Mylene Alfonso @News | September 29, 2023

Nasamsam ng pinagsanib na tauhan ng National Bureau of Investigation (NBI), Philippine Drug Enforcement Agency (PDEA), Bureau of Customs (BoC) at National Intelligence Coordinating Agency (NICA), ang may 560 kilo ng shabu na may halagang

P3.8 bilyon, na itinago sa plastic ng chicharon at dried fish kamakalawa ng gabi sa isang bodega sa San Jose Malino, Mexico City, Pampanga.

Ayon kay Justice Secretary Jesus Crispin Remulla, sa isang press briefing, ito na ang pinakamalaking huli ng ilegal na droga ngayong taon sa bansa.

Sinabi ni Remulla na ang shabu ay nagmula sa Thailand sakay ng Sitc Shekou at dumaong sa Subic Port in Subic Bay Freeport Zone noong Setyembre 18, 2023.

Nagawa umano ng crack team ng NBI na mapasok ang sindikato at nahubaran ng maskara ang mga sangkot sa pagpasok ng droga sa bansa.

Kinumpirma ni Remulla na may mga sangkot na dayuhan at may iniimbestigahan na rin na taga-BOC.

Inamin ni Remulla na napakasopistikado na ng operasyon ng sindikato dahil maski ang mga K-9 dogs ay nahirapan at dapat na muling sanayin sa pag-amoy ng ilegal na droga.

Gayunman, tumanggi si Remulla na magbigay ng pangalan sa mga taong sangkot sa sindikato.

Dahil sa naturang malaking huli, nakatakdang magkaroon ng masusing pakikipag-ugnayan ang NBI sa National Prosecution Service para sa pagsasampa ng kaso.

Magkakaroon din ng imbestigasyon sa kaso ang Anti-Money Laundering Council.

Layunin nito na kilalanin ang korporasyon na ginamit para sa pagpupuslit ng droga sa bansa.

Nagkakahalagang P1.9-M... High-grade marijuana, nasabat ng Customs

ni Zel Fernandez | May 7, 2022

Nasabat ang may tinatayang P1.9 milyong halaga ng "kush" o high-grade marijuana mula sa isang Nigerian national, kasunod ng isinagawang controlled delivery operation ng anti-drug authorities sa Angeles City, Pampanga noong Huwebes nang hapon.

Batay sa report ng Philippine Drug Enforcement Agency-Central Luzon (PDEA-3), kahapon ng Biyernes ay tinukoy ang suspek na si Madu Ogechi Uzoma, residente ng Concubierta Street, Sunset Valley Mansions, Brgy. Cutcut sa Angeles, Pampanga.

Ang package na naglalaman ng iligal na droga ay sinasabing nagmula sa Greenwich, Connecticut, USA, at dumating sa Bureau of Customs-Port of Clark, nitong nakaraang Abril 29.

“The shipment was subjected to the K9 sweeping and physical examination which gave a positive indication of illicit drugs,” ayon sa PDEA.

Nakumpiska mula kay Madu ang tinatayang 1,500 gramo ng kush na mayroong street value na P1.95-M at isang driver's license.

Naging matagumpay ang operasyon sa pagkilos ng PDEA-Central Luzon, katuwang ang Bureau of Customs-Port of Clark at ang lokal na kapulisan.

Sasampahan naman ng kasong paglabag sa Section 4 (importation of dangerous drugs) ng Republic Act 9165 o Comprehensive Dangerous Drugs Act of 2002 ang Nigerian national.