Sen. at cong., kung sinuportahan lang ang Death Penalty Bill sa plunderer noon wala sanang flood control projects scam

ni Pablo Hernandez @Prangkahan | September 8, 2025

KUNG SINUPORTAHAN LANG NOON NG MGA SENADOR AT KONGRESISTA ANG PANUKALANG DEATH PENALTY NI SEN. BONG GO SA MGA PLUNDERER, WALA SANANG NAGANAP NA FLOOD CONTROL PROJECTS SCAM -- Bago pa isinulong ng noo’y Zamboanga City Rep. Khymer Olaso last January 2025 at ni Sen. Ronald Dela Rosa ngayong September 2025 ang parusang kamatayan sa mga plunderer, may ganyan na ring panukalang batas si Sen. Bong Go noong July 2019 na ang kasong plunder, dapat patawan ng death penalty.

Kung ang bill na iyan ni Sen. Bong Go ay noon pa sinuportahan ng mga senador at kongresista, wala sanang isyung flood control projects scam, wala sanang mga nagsabwatan sa pang-i-scam sa bilyun-bilyong pisong kaban ng bayan, period!

XXX

NAKABUTI RIN ANG INSPIRATION INTERVIEW NINA KORINA AT JULIUS DAHIL KUNG HINDI NAKITA NG PUBLIKO ANG MAGARBONG PAMUMUHAY NG PAMILYA DISCAYA, BAKA ANG SINABI NI SARAH DISCAYA SA SENADO SIMPLE LANG ANG KANILANG PAMUMUHAY -- Nakabuti rin pala ang ‘bayad’ (tig-P10M daw, ayon sa post ni Pasig City Mayor Vico Sotto) na inspiration interview nina broadcaster-vloggers Korina Sanchez at Julius Babao sa mag-asawang Curlee at Sarah Discaya, na pinalabas nila sa kanilang mga programa na kesyo dapat daw maging inspirasyon ang pagyaman ng mag-asawang Discaya.

Kung hindi kasi ininterbyu nina Korina at Julius ang mag-asawang Curlee at Sarah, at hindi nila ipinakita sa publiko ang magarbong pamumuhay ng pamilya Discaya, na mayroon silang sangkatutak na luxury cars, mala-palasyong tahanan, mga mamahaling kagamitan, ay malamang ang sabihin ni Sarah Discaya sa imbestigasyon ng Senate Blue Ribbon Committee patungkol sa flood control projects scam na siya, kanyang mister na si Curlee at kanilang mga anak ay simple lang ang kanilang pamumuhay, boom!

XXX

LAHAT NG KONTRAKTOR NA MAY KONTRATA SA GOBYERNO, DAPAT ISAILALIM DIN

SA LIFESTYLE CHECK, BAKA TULAD NG PAMILYA DISCAYA GUMARBO RIN ANG PAMUMUHAY SA ‘PANG-I-SCAM’ SA KABAN NG BAYAN -- Hindi lang dapat mga politician at gov’t. officials ang dapat isailalim sa lifestyle check.

Dapat isailalim din sa lifestyle check ang mga kontraktor na may kontrata sa gobyerno, baka kasi hindi lang lantad, na tulad sila ng pamilya Discaya na may sangkatutak na luxury cars, mala-palasyong tahanan at may mga mamahaling kagamitan, na mga naging bilyonaryo rin sa ‘pang-i-scam’ sa pera ng bayan, period!

XXX

MAGULONG GOBYERNO ANG MARCOS ADMIN, PRESIDENTE VS. VICE PRESIDENT, SENADO VS. KAMARA AT MALACANANG VS. KONGRESO -- Sa mga naging administrasyon, pinakamagulo ay ang Marcos administration.

Magkaaway ang presidente at bise presidente, magkaaway ang Senado at Kamara, at magkaaway ang Malacanang at Kongreso.

Imbes magkaisa para mapanagot sa batas ang mga nang-i-scam sa kaban ng bayan, sila-sila ang mga nagbabangayan, palibhasa kasi karamihan sa kanila ay sangkot din sa mga katiwalian, mga pwe! 

Survey na gumanda ang pamumuhay ng 35% Pinoy, guni-guni lang ng SWS

ni Pablo Hernandez @Prangkahan | September 7, 2025

LALONG IDINIIN NI ENGR. CALALO ANG SARILI SA KASO NANG AMINING MULA SA MGA KONTRAKTOR ANG PERA NA IBIBIGAY SANA NIYA KAY CONG. LEVISTE -- Sablay ang palusot ni Dept. of Public Works and Highways (DPWH)-Batangas District 1 Engr. Abelardo Calalo na hindi raw maituturing na entrapment operation ang pagkakahuli sa kanya ng mga otoridad dahil hindi raw suhol ang higit P3 million ibibigay sana niya kay Batangas 1st District Rep. Leandro Leviste para pagtakpan ang mga flood control project scam sa unang distrito ng lalawigan, kundi para raw panggastos sa mga programa ng young lawmaker sa kanyang distrito, na kesyo kaya lang daw siya ang nagdala ng pera ay dahil sa pakiusap ni Uswag Partylist Rep. Jojo Ang na kolektahan niya ng kuwarta ang mga kontraktor at ang koleksyon ay dalhin at ibigay kay Cong. Leviste.

Sa totoo lang, mas lalong ipinahamak ni Engr. Calalo ang kanyang sarili sa isyung ito dahil siya na ang umamin na nanghingi raw siya ng pera sa mga kontraktor na malinaw na labag ito sa batas, kasi nga siya ang head ng DPWH-Batangas District 1 na nagbibigay ng mga proyekto sa mga construction firm sa kanyang jurisdiction tapos manghihingi siya ng kuwarta sa mga kontratista. Kaya asahan na niya na sa pagdinig sa isinampang kaso sa kanya ni Cong. Leviste ay guilty ang magiging hatol sa kanya ng hukuman, masaswak siya sa kulungan, period!

XXX

SP ESCUDERO, HINDI TATANTANAN NI TITO SEN. SA SINGIT NA P142B PORK BARREL SA 2025 NATIONAL BUDGET -- Sinabi ni Sen. Tito Sotto na noong siya raw ang Senate president noong 18th Congress ay wala raw mambabatas na nakapagpalusot o nakasingit na pork barrel sa national budget.

Tila hindi tatantanan ni Tito Sen. sa isyu ng insertion si SP Escudero dahil ang pinasasaringan niya sa statement niyang ito ay ang incumbent Senate president, kasi nga silang dalawa ni Sen. Ping Lacson ang nagbulgar sa publiko na higit P142 billion ang isiningit nitong (SP Escudero) pork barrel sa 2025 national budget, boom!

XXX

DAPAT SI SEC. DAVE GOMEZ ANG MASIBAK HINDI ANG TV HOST MIKE ABE NA NAGBULGAR NG KATIWALIAN SA PCO -- Matapos ibulgar ni PTV 4 program host Mike Abe ang mga katiwalian daw sa Presidential Communications Office (PCO) ay “forthwith” o agad-agad siyang sinibak ni PCO Sec. Dave Gomez.

Dahil sa ginawang ito ni Sec. Gomez, dapat sibakin siya ni Pres. Bongbong Marcos (PBBM), kasi dapat ang nagbubulgar ng katiwalian sa isang ahensya ng pamahalaan ay pinuproteksyunan, at hindi sinisibak, period!

XXX

GUNI-GUNI LANG NG SWS ANG SURVEY NITO NA 35% MAMAMAYANG PINOY GUMANDA ANG PAMUMUHAY SA PANAHON NG MARCOS ADMIN -- Napakaimposible ang isinapublikong survey ng Social Weather Stations (SWS) na kesyo 35% daw ng mamamayang Pilipino ang gumanda ang pamumuhay sa ilalim ng Marcos administration.

Ang dami kasing nagiging biktima ng baha dahil sa flood control projects scam, tapos para sa SWS gumanda raw ang pamumuhay ng 35% mamamayang Pinoy.

Kung nasabi ni PBBM na “guni-guni” lang ang mga natuklasang ghost project ng mga ‘walanghiyang’ kontraktor, eh maituturing na “guni-guni” rin ang survey ng SWS na gumanda na ang pamumuhay ng 35% mamamayang Pinoy sa panahon ng Marcos admin, boom!

Lawyer si SP Chiz, pero ‘di alam na bawal tumanggap ng campaign fund sa kontraktor?!

ni Pablo Hernandez @Prangkahan | September 6, 2025

2 KASONG NO BAIL, PLUNDER AT ECONOMIC SABOTAGE ANG KAKAHARAPIN NG MAG-ASAWANG DISCAYA KAPAG NAGKATAON -- Sa imbestigasyon ng Senate Blue Ribbon Committee noong Sept. 1, 2025 patungkol sa flood control projects scam ay tinanong ni Sen. Jinggoy Estrada ang kontraktor na si Sarah Discaya kung kanino niya nabili ang kanyang mga luxury car, at nang sabihin ng kontratista na ang Frebel Enterprises and Auto Art ang kanyang supplier sa kanilang car collections ay diretsahang sinabi ni Sen. Tito Sotto na pulos smuggled daw ang mga mamahaling sasakyan ng pamilya Discaya, dahil ayon umano sa report ng Bureau of Customs itong Frebel ay makailang ulit nang nasangkot sa pagpupuslit ng mga imported luxury car sa bansa.

Kapag nagkataon ay dalawang kasong habambuhay na pagkabilanggo ang sasapitin ng mag-asawang Curlee at Sarah Discaya, ang isa ay ang kasong plunder na no bail, swak sila riyan dahil halos lahat ng flood control projects at iba pang proyektong kanilang nakuha sa Dept. of Public Works and Highways (DPWH) ay ‘winalanghiya’ nila, bukod sa substandard, ang iba ay iniwang nakatiwangwang; at ang pangalawa ay economic sabotage (smuggling) na no bail din, period!

XXX

SENADOR O KONGRESISTANG NAGSINGIT SA BICAM COMMITTEE NG ‘GHOST’ PROJECT SA BULACAN, DAPAT MAHUBARAN NG MASKARA -- Ibinulgar ni Bicol Saro Partylist Rep. Terry Ridon, chairperson ng House Public Accounts Committee na ang natuklasan ni DPWH Sec. Vince Dizon na P96 million ‘ghost’ project ng Wawao Builders Corporation sa Plaridel, Bulacan ay isiningit sa bicameral budget conference committee.

Sa bubuuin ni Pres. Bongbong Marcos (PBBM) na independent commission na mag-iimbestiga sa mga flood control project scam, dapat ipatawag at imbestigahan ang lahat ng mga senador at kongresistang miyembro ng bicam committee para mahubaran ng maskara kung sinong sen. at cong. ang nagsingit ng P96M flood control project sa Plaridel, Bulacan na natuklasan na ‘ghost’ project pala, boom!

XXX

KUNG GINAWA NG COA ANG KANILANG MANDATO ‘DI SANA NAGING TALAMAK ANG CORRUPTION SA DPWH, MAAYOS SANA ANG PROYEKTO NG MGA KONTRAKTOR, KAYA DAPAT PAGBITIWIN NA RIN NI PBBM SI COA CHAIRMAN CORDOBA -- Kung ginawa lang ng Commission on Audit (COA) ang mandato nila, hindi magiging talamak ang corruption sa DPWH at walang kontraktor na mangangahas gumawa ng mga substandard at ‘ghost’ projects.

Sa natuklasan ngayon na sangkatutak na substandard, mga proyektong iniwang nakatengga at may mga ‘ghost’ project pa, lumalabas na sangkaterba rin ang mga ‘kuraktor’ na auditors sa COA, at lumalabas na kasabwat sila ng mga ‘kurakot’ sa DPWH.

Sibak na, wala na sa DPWH si Engr. Manuel pinag-resign na siya ni PBBM, ang pumalit sa kanya ay si economist Vince Dizon na agad pinag-courtesy resignation lahat ng opisyal ng ahensya.

Ang nais nating ipunto rito, dapat pagbitiwin na rin ni PBBM sa puwesto si COA Chairman Gamaliel Cordoba at palitan ng taong mag-uutos din sa mga opisyal ng COA na magsumite ng courtesy resignation, period!

XXX

ABOGADO SI SP ESCUDERO, HINDI NIYA ALAM BAWAL TUMANGGAP NG CAMPAIGN FUND SA KONTRAKTOR? -- Matapos aminin sa Kamara ng kontraktor ng flood control project na si Lawrence Lubiano, may-ari ng Centerways Construction and Development Corporation na nagbigay siya ng P30M campaign fund sa kaibigan niyang si Senate Pres. Chiz Escudero noong 2022 election, ang tugon dito ng Senate president ay hindi naman daw niya ito tinulungang makakuha ng mga proyekto sa gobyerno.

Ang isyu ay tungkol sa pagtanggap niya ng P30M na campaign fund sa kontraktor at wala namang nagtatanong kay SP Escudero kung tinulungan niyang makakuha ng kontrata si Lubiano sa gobyerno.

Ang gusto lang malaman ng publiko, SP Escudero ay bilang isa kang abogado, hindi mo ba alam na labag sa Omnibus Election Code ang pagtanggap ng kandidato sa kontraktor na may kontrata sa gobyerno? Sagot!