Rally ng INC, dapat suportahan ng iba’t ibang sektor para sa mga sangkot sa flood control scam, mapanagot

ni Pablo Hernandez @Prangkahan | November 8, 2025

‘PEACEFUL RALLY FOR TRANSPARENCY’ NG INC, DAPAT SUPORTAHAN NG IBA’T IBANG SEKTOR PARA MAPANAGOT ANG MASTERMINDS SA FLOOD CONTROL PROJECTS SCAM -- Magsasagawa ang kapatiran ng Iglesia ni Cristo (INC) ng tatlong araw na “Peaceful Rally for Transparency” mula Nobyembre 16-18, 2025 sa Rizal Park sa Manila.

Hindi masisisi ang INC na maglunsad ng ganitong protesta kasi nga noong October 7, 2025 ay kabilang ang religious group na ito na nanawagan sa Independent Commission for Infrastructure (ICI) na isapubliko ang ginagawa nilang imbestigasyon sa flood control projects pero dinedma lang at hanggang ngayon wala pang ginagawang live telecast na hearing ang ICI.

Malinaw naman ang titulo ng protesta na ito ng INC na "Peaceful Rally for Transparency" na ibig sabihin isa itong mapayapang kilos-protesta, kaya’t sana suportahan din ito ng iba pang sektor ng lipunan para maobliga ang ICI na totohanin ang inanunsyo nilang isasapubliko na nila ang mga susunod nilang hearing para makatiyak ang publiko na walang hokus-pokus na magaganap sa imbestigasyon at mapapanagot ang mga arkitekto o mga mastermind sa naganap na flood control projects scam sa buong bansa, period!

XXX

SA PAG-ANUNSYO NG BIR NA MAGSASAGAWA SILA NG LIFESTYLE CHECK, ASAHAN NANG MAGPAPANGGAP NA SIMPLE LANG PAMUMUHAY NG MGA KURAKOT SA ‘PINAS -- Inanunsyo ni Bureau of Internal Revenue (BIR) Comm. Romeo Lumagui, Jr. na magsasagawa sila ng lifestyle check sa mga senador at iba pang pulitiko.

Sa totoo lang, sablay ang pabidang statement na iyan ni Comm. Lumagui, ang dapat niyang ginawa ay pasikreto silang nagsagawa ng lifestyle check sa mga politician, pati sa pamilya ng mga pulitiko at saka nila isapubliko kung marangya ang mga ito, kung nagbubuhay hari, reyna, prinsipe at prinsesa ang mga ito.

Dahil isinapubliko ni Comm. Lumagui na magsasagawa sila ng lifestyle check ay asahan nang magpapanggap na simple ang pamumuhay ng mga kurakot na pulitiko, at ang kanilang mga pamilya, boom!

XXX

SANGKATUTAK ANG MGA GHOST PROJECT NA WALANG NAGTATRABAHO KAYA IBINIDA NG PSA NA KAUNTI NA LANG ANG JOBLESS SA ‘PINAS, ‘PANG-UUNGGOY’ SA PUBLIKO -- Ang inanunsyo ng Philippine Statistics Authority (PSA) na bumaba ang bilang ng mga jobless Pinoy sa bansa ay maituturing na "pang-uunggoy" lang sa publiko para palabasin na marami na ang nagkakaroon ng trabaho sa ilalim ng Marcos administration.

Sangkatutak kasi ang "ghost" projects ng gobyerno o mga proyektong "guni-guni" lang dahil walang mga nagtatrabaho, tapos ang pabida ng PSA marami na raw ang nagkakatrabaho kaya bumaba na ang bilang ng mga jobless Pinoy sa ‘Pinas, buset!

XXX

MARAMING PINOY NA ANG NAGSASABI NA NAGHIHIRAP AT NAGUGUTOM SILA SA ILALIM NG MARCOS ADMIN -- Magkasunod na naglabas ng bad news na survey ang Social Weather Stations (SWS). Una noong October 30, 2025 na 50% ng mga Pilipino ang nagsabi na patuloy silang nakakaranas ng kahirapan sa pamumuhay sa Pilipinas, at nitong nakalipas na November 5, 2025 sa panibagong survey ay 22% ng mga pamilyang Pinoy ang nagsabi na nakakaranas sila ng kagutuman sa panahon ng Marcos admin.

Ibig sabihin, sa magkasunod na survey na iyan ng SWS ay taliwas sa ibinibida ng PSA na kaunti na lang daw ang jobless sa ‘Pinas, dahil kung totoo iyang inanunsyo nila (PSA) dapat sana ay kaunti na lang ang dumadaing sa mga Pinoy na sila ay naghihirap at nagugutom, pero hindi, kasi nga sa survey ay marami ang nagsasabi na sila ay nakakaranas ng hirap at gutom sa panahon ng Marcos admin, period!

Parami nang parami ang pamilyang Pinoy na nakakaranas ng gutom

ni Pablo Hernandez @Prangkahan | November 7, 2025

DAPAT KASUHAN AT IKULONG ANG MGA KUMALBO SA BUNDOK AT MGA NASA LIKOD NG FLOOD CONTROL SCAM KAYA NAKARANAS NG DELUBYONG BAHA ANG CEBU -- Tatlo ang sinasabing dahilan kaya nakaranas ng delubyong baha dulot ng Bagyong Tino ang Cebu, at ito ay ang pagmimina ng dolomite at pagkalbo ng mga mining companies sa kabundukan ng lalawigang ito, ang pagtatayo ng 19 storey condominium na “The Rise at Monterrazas,” na para maitayo ang malawak na condo na ito ay kinalbo umano ang may higit na 200 ektarya kabundukan sa probinsyang ito at ang ghost, substandard at unfinished flood control projects.

Galit sina Pres. Bongbong Marcos (PBBM) at Cebu Gov. Pamela Baricuatro sa naranasang delubyo ng mga taga-Cebu, kaya’t sana ang galit nilang ito ay may managot, dapat magsanib-puwersa ang national government at local government para sampahan ng kaso at maipakulong ang lahat ng mga abusadong mining companies, management ng “The Rise at Monterrazas” at mga politician, kontraktor at Dept. of Public Works and Highways (DPWH) na nagsabwatan sa ghost, substandard at unfinished flood control projects sa lalawigang ito, period!

XXX

DAPAT MAGLABAS NA AGAD NG WARRANT OF ARREST LABAN KAY ZALDY CO PARA BITBITIN NA NG INTERPOL PABALIK SA ‘PINAS -- Sabi ni Atty. Ruy Rondain, abogado ni former Congressman Zaldy Co na may mga natatanggap daw na death threat ang kanyang kliyente kaya ayaw na raw nitong umuwi sa Pilipinas.

Dahil ayaw na ni Zaldy Co na bumalik sa Pilipinas, ang dapat gawin ng Sandiganbayan kapag naisampa na sa kanila ng Ombudsman ang mga kasong plunder at graft sa mga sangkot sa flood control scam ay maglabas na agad sila ng warrant of arrest.

‘Ika nga, kapag may warrant of arrest na ay may dahilan na ang Interpol na dakpin si Zaldy Co kung saan man siyang bansa nagtatago para bitbitin pabalik ng ‘Pinas, boom!

XXX

KAPAG NAKALAYA SI JANET NAPOLES SA MGA KASONG PLUNDER, TIYAK MAS LALONG DADAMI ANG MGA ‘BUWAYANG’ MANG-I-SCAM SA KABAN NG BAYAN -- Nitong nakalipas na Nov. 5, 2025 ay inabsuwelto na naman ng Sandiganbayan si pork barrel queen Janet Napoles sa isa pa nitong kasong plunder.

Kaya kapag ang lahat ng kasong plunder ni Napoles ay naabsuwelto siya at tuluyan na siyang nakalaya sa kulungan, tulad ng ilang senador at kongresistang nakasuhan din ng plunder pero naabsuwelto rin at nakalaya, ay asahan nang mas dadami ang mga "buwayang" mag-i-scam sa kaban ng bayan sa katuwiran na ang mga plunderer sa ‘Pinas, inaabsuwelto at pinalalaya ng korte, buset!

XXX

PARAMI NANG PARAMI ANG MGA PAMILYANG PINOY NA NAKAKARANAS NG GUTOM SA ILALIM NG MARCOS ADMIN -- Noong June 2025 base sa survey ng Social Weather Stations (SWS) ay 16.1% pamilyang Pinoy ang nagsabi noon na nakakaranas sila ng gutom, pero sa latest survey ng SWS na isinapubliko ngayong November 2022 ay pumalo na sa 22% pamilyang Pinoy ang nagsabi ngayon na sila ay nakakaranas ng gutom sa ‘Pinas.

Masamang pangitain iyan kasi ang magkasunod na survey na iyan ang magpapatunay na hindi gumiginhawa ang pamumuhay ng mamamayan, at sa halip ay parami nang parami ang nagugutom sa ilalim ng Marcos administration, tsk!

‘Pag sa Pasko wa’ pang nakulong sa flood control scam, malamang sablay pabida ni Sec. Dizon

ni Pablo Hernandez @Prangkahan | November 6, 2025

DAPAT SIPUTIN NI CONG. ROMUALDEZ ANG SENATE BLUE RIBBON COMMITTEE, KAPAG INISNAB NIYA IISIPIN NG PUBLIKONG MASTERMIND SIYA SA FLOOD CONTROL SCAM -- Sinabi ni Senate President Pro Tempore Ping Lacson na sakaling siya uli ang mahalal na chairman ng Senate Blue Ribbon Committee sa Nov. 10, 2025 ay agad niyang bubuksan ang imbestigasyon sa flood control projects scam sa Nov. 14, 2025 at kabilang daw sa kanyang iimbitahang dumalo ay si Leyte Rep. Martin Romualdez.

Dapat dumalo si Romualdez sa imbitasyon sa kanya ni Lacson dahil pagkakataon na niya ito para patunayang hindi siya sangkot sa flood control scam pero kung iisnabin niya, iisipin talaga ng mamamayan na totoo ang alegasyon sa kanya ni Sen. Chiz Escudero na siya (Romualdez) ang mastermind sa naganap na flood control projects scam sa buong bansa, boom!

XXX

CEBU NILUBOG NG BAHA, KAYA DAPAT BIGYAN NG PRAYORIDAD NG ICI ANG IMBESTIGASYON SA 414 FLOOD CONTROL PROJECTS AT LAHAT NG SANGKOT SA KATIWALIAN KASUHAN AT IKULONG AGAD -- Nilubog ng tubig-baha, lampas-tao, lampas-bahay na baha ang Cebu dulot ng malakas na buhos ng ulan na dala ng Bagyong Tino.

Ang Cebu ang ikalawa sa mga probinsya na may pinakamarami na 414 flood control projects at ang trahedyang dulot ng baha na naranasan sa lalawigang ito ay patunay na karamihan sa mga proyektong iyan kundi ghost ay substandard at unfinished.

Kaya’t hindi na dapat pang magpatumpik-tumpik ang Independent Commission for Infrastructure (ICI), iprayoridad nilang imbestigahan ang 414 flood control projects sa Cebu at ang lahat ng sangkot sa katiwalian, mga pulitiko, kontraktor at DPWH officials ay kasuhan agad at ikulong, na ‘ika nga dapat lahat sila mag-Pasko sa Quezon City jail, period!

XXX

KAPAG SA PASKO WALA PANG NAKUKULONG NA SANGKOT SA FLOOD CONTROL SCAM, DAPAT LUBAYAN NA NI SEC. DIZON ANG MGA SABLAY NA PABIDA SA PUBLIKO -- Ibinida ni Dept. of Public Works and Highways (DPWH) na marami raw sa mga sangkot sa flood control projects scam, na nasa 60 politicians, kontraktor at DPWH officials daw ang makukulong o magpa-Pasko sa kulungan.

Ganu’n? Sa usad-pagong na imbestigasyon ng ICI, asa si Sec. Dizon na may mga sangkot sa flood control scandal ang magpa-Pasko sa kulungan.

Kung totoo nga ang ibinida niyang ito, good news iyan para maranasan ng mga nangulimbat sa kaban ng bayan ang mamuhay sa city jail, pero kung pagsapit ng Pasko ay wala pang nakulong sa mga sangkot sa flood control scandal, ang pinakamainam na gawin ni Sec. Dizon ay lubayan na niya ang mga pabida niyang statement sa publiko para hindi siya sumasablay sa mga binibitawan niyang salita, boom!

XXX

PORKE HINDI NAKASAMA ANG NAME SA PINAKAKASUHAN NG ICI AKALA NI SEN. ESCUDERO SAFE NA SIYA, PERO HINDI PA PALA, TINATRABAHO SIYA NG OMBUDSMAN AT AMLC -- Hindi nakasama ang pangalan ni Sen. Chiz Escudero sa mga inirekomenda ng ICI sa Ombudsman na sampahan ng kasong plunder at graft, dahil ang mga pinakakasuhan lang na sangkot sa flood control projects scam ay sina Sen. Jinggoy Estrada, Sen. Joel Villanueva, former Congressman Zaldy Co, ex-DPWH Usec. Roberto Bernardo, Commission on Audit (COA) Comm. Mario Lipana at dating Caloocan City Rep. Mitch Cajayon.

Inakala siguro ni Sen. Escudero ay safe na siya, pero hindi pa pala, dahil sinabi ni Ombudsman Boying Remulla na tinatrabaho na ng Office of the Ombudsman at Anti-Money Laundering Council (AMLC) ang paper trail at cash trail patungkol sa sinabi ni Bernardo na ang kickback sa DPWH projects para sa ex-Senate president ay kay Maynard Ngu niya ibinibigay, period!