Zaldy Co, dapat nasa City Jail na kung walang biyaya ni Romualdez

ni Pablo Hernandez @Prangkahan | January 15, 2026

SA BAGONG RULING NG SC SA IMPEACHMENT, 'SUNTOK SA BUWAN' NA MA-IMPEACH SINA PBBM AT VP SARA – Sa bagong ruling ng Supreme Court (SC) kaugnay ng impeachment, tila “suntok sa buwan” na ang ma-impeach sina Pangulong Ferdinand “Bongbong” Marcos Jr. (PBBM) at Vice President Sara Duterte, dahil kapwa sila may matitibay na kaalyado sa Kamara.

Noong Hulyo 25, 2025, ipinatigil ng SC ang impeachment proceedings laban kay VP Sara matapos umanong labagin ng House of Representatives (HOR) ang tinatawag na one-year bar rule, na nagsasaad na isang impeachment case lamang ang maaaring tanggapin ng Kamara laban sa isang opisyal sa loob ng isang taon.

Batay sa desisyon ng Korte Suprema, may ilang civil society groups na nagsampa ng impeachment complaints laban sa bise presidente noong Disyembre 2, 4, at 19, 2024. Pagkaraan nito, nagsumite rin ang mayorya ng mga kongresista ng Articles of Impeachment noong Pebrero 5, 2025.

Iginiit ng Kamara na hindi nila inaksyunan ang mga reklamong inihain noong Disyembre at iisa lamang ang opisyal na impeachment case—ang Articles of Impeachment na isinumite noong Pebrero 5, 2025—na ipinadala sa Senado bilang impeachment court. Gayunman, pinabulaanan ito ng SC at sinabi na kahit hindi inaksyunan ang mga naunang reklamo, kabilang pa rin ang mga ito sa bilang ng impeachment cases dahil tinanggap ang mga ito ng HOR.

Ang punto rito: kung may magsampa ng impeachment complaints laban kina PBBM at VP Sara sa mga susunod na buwan, at muling may ihain na impeachment cases sa Marso 2026 na tatanggapin ng Kamara, wala ring mangyayaring impeachment proceedings. Muli lamang igigiit ng SC na nilabag ang one-year bar rule.

Sa madaling sabi—“tapos ang boksing.” Boom!

XXX

KUNG HINDI SANA BINIGYAN NG NOO'Y SPEAKER ROMUALDEZ NG TRAVEL AUTHORITY SI ZALDY CO, DAPAT NAKAKULONG NA ITO NGAYON SA CITY JAIL – Nahihirapan ang Marcos administration na dakpin ang puganteng si dating Ako Bicol party-list Rep. Zaldy Co sa Portugal dahil walang extradition treaty ang Pilipinas sa nasabing bansa.

Kung hindi sana binigyan noon ni dating Speaker Martin Romualdez ng travel authority si Zaldy Co, malamang ay nakakulong na ito ngayon sa city jail. Period!

XXX

KUNG WALANG AAWAT, MALAMANG NON-STOP ANG BANGAYAN NINA SEN. LACSON AT SEN. IMEE KASI PAREHO SILANG TAKLESA – Tuloy ang bangayan nina Senate President Pro Tempore Ping Lacson at Minority Sen. Imee Marcos hinggil sa pork

barrel at allocable insertions sa 2026 national budget.

Kung walang papagitnang aawat, malamang ay magtuloy-tuloy ang kanilang patutsadahan, lalo’t kapwa taklesa sina Sen. Lacson at Sen. Imee. Boom!

XXX

DAPAT BUWAGIN NA ANG ICI KASI WALA NA PALA ITONG SILBI – Inamin ng Independent Commission for Infrastructure (ICI) na mabagal ang usad ng imbestigasyon sa umano’y flood control scandal dahil sa kakulangan ng mga komisyoner, matapos magbitiw sa puwesto sina Engr. Rogelio Singson at Accountant Rosanna Fajardo.

Kung ganito ang kalagayan, tila wala nang silbi ang ICI kaya’t nararapat nang buwagin ito agad ni PBBM. Period!

Malalaos na next month ang flood control scandal, at ang sisikat ay ang impeachment nina PBBM at VP Sara

ni Pablo Hernandez @Prangkahan | January 14, 2026

PBBM 'INUUNGGOY' NG MGA KURAKOT NA SEN. AT CONG., PINALALABAS NA MALINIS ANG 2023, 2024 AT 2025 NATIONAL BUDGET, PURO NAMAN PALA KORUPSIYON – Depensa ni Presidential Communications Officer (PCO) Usec. Claire Castro sa posibleng impeachment complaint laban kay Pangulong Ferdinand “Bongbong” Marcos Jr. (PBBM) na wala umanong ninakaw ang presidente sa kaban ng bayan. Ayon pa sa kanya, huli na raw nalaman ni PBBM ang umano’y flood control projects scam, kaya mismong ang pangulo na ang nagbunyag ng anomalya at nag-utos na kasuhan ang lahat ng sangkot.

Kung totoo ngang walang kinalaman si PBBM sa isyu, iisa lamang ang kahulugan nito: niloko o “inunggoy” ang presidente ng mga tiwaling senador at kongresista. Pinalabas ng ilang senador at kongresistang kasapi ng bicameral conference committee na malinis at walang bahid ng katiwalian ang pambansang badyet para sa 2023, 2024 at 2025. Ngunit sa huli, lumabas na puno ito ng mga proyektong ang pondo ay pinaghati-hatian lamang ng mga kurakot na politiko, opisyal ng DPWH, at mga kontratista. Period!

XXX

NEXT MONTH, BAKA MALAOS NA ANG FLOOD CONTROL SCANDAL AT ANG IMPEACHMENT NAMAN ANG SISIKAT – Sa susunod na buwan, malamang ay “malalaos” na ang isyung flood control scandal, at ang magiging sentrong usapin ay ang impeachment. May nakatakdang magsampa ng impeachment complaint laban kay Vice President Sara Duterte, at may magsasampa rin daw laban kay Pangulong Ferdinand “Bongbong” Marcos Jr. Boom!

XXX

DAHIL WALA PALANG ATRASAN ANG MGA TESTIMONYA NI FORMER DPWH ENGR. BRICE HERNANDEZ, HINDI PA RIN SAFE SINA SEN. ESTRADA, VILLANUEVA AT ZALDY CO – Pinabulaanan ng abogado ni dating DPWH Bulacan 2nd District Assistant Engineer Brice Hernandez ang isyu na bumaligtad o bumawi siya sa kanyang testimonya sa Senate Blue Ribbon Committee at House Infra Committee, na nagsasangkot kina Sen. Jinggoy Estrada, Sen. Joel Villanueva, at dating Ako Bicol Partylist Rep. Zaldy Co.

Ibig sabihin, hindi pa rin ligtas sina Sen. Estrada, Sen. Villanueva, at Zaldy Co., dahil nananatiling matibay at hindi umatras ang testimonya ni Engr. Brice laban sa kanila. Period!

XXX

PBBM, INOKRAY NI CONG. DE LIMA, PASABOG DAW NG PRESIDENTE, PARANG SUBSTANDARD NA PAPUTOK! – Dahil sumablay ang pangako ni PBBM na may mga kurakot na senador, dating senador, at kongresista na makukulong at magpa-Pasko sa kulungan, inokray ni ML Partylist Rep. Leila de Lima ang presidente.

Ayon kay Cong. De Lima, ang “pasabog” daw ni PBBM ay parang substandard na paputok — nang sumabog, supot lang. Boom!

Kung totoong binawi ng ex-Bulacan DPWH engineers ang testimonya, safe na sina Sen. Estrada, Villanueva, at ex-DPWH Usec. Bernardo

ni Pablo Hernandez @Prangkahan | January 13, 2026

SAKALING TOTOONG BINAWI NG FORMER BULACAN DPWH ENGINEERS TESTIMONYA NILA SA SENADO, SAFE NA SA KASO SINA SEN. ESTRADA, SEN. VILLANUEVA AT EX-SEN. REVILLA – Inanunsyo ni Senate President Pro Tempore Ping Lacson, chairman ng Senate Blue Ribbon Committee, na magkakaroon muli ng imbestigasyon ang kanyang komite sa Enero 19, 2026. Layunin nitong siyasatin ang ulat na binawi nina dating DPWH Bulacan 1st District Engineers Henry Alcantara, Brice Hernandez, at Jaypee Mendoza ang kanilang naunang testimonya, kung saan inamin nilang sangkot sila, pati na ilang senador, sa flood control scandal.

Kung totoo nga na binawi nila ang kanilang testimonya, nangangahulugan ito na maaaring hindi na masasangkot sina Senators Jinggoy Estrada, Joel Villanueva, dating Sen. Bong Revilla, at dating Ako Bicol partylist Rep. Zaldy Co. Boom!

XXX

DAPAT ‘WAG LANG SA BULACAN MAGPOKUS, DAPAT IMBESTIGAHAN DIN NI SEN. LACSON ANG FLOOD CONTROL SCAM SA IBANG LALAWIGAN – Napapansin ng publiko na ang Senate Blue Ribbon Committee ni Sen. Lacson ay nakatuon lamang sa flood control scam na kinasasangkutan nina Engineers Alcantara, Hernandez, at Mendoza sa Bulacan, kahit na malawak ang saklaw ng mga ganitong kaso—halos bawat probinsya ay may sariling flood control scandal.

Dapat ding imbestigahan ng komite ang mga naganap na flood control scams sa ibang lalawigan. Maaaring may matuklasan pa sila na mga district engineers at kanilang mga kasabwat na senador at kongresista, na mas malaki ang tinangkang pagnanakaw kaysa sa ginawa sa DPWH-Bulacan.

XXX

MARAMING NANINIWALA SA IMBESTIGASYON NG KAMARA SA FLOOD CONTROL SCAM  – Dahil ipagpapatuloy na muli ng Senate Blue Ribbon Committee ni Sen. Lacson ang imbestigasyon sa flood control scandal, dapat payagan na rin ni Speaker Bojie Dy ang House Infra Committee ni Bicol Saro partylist Rep. Terry Ridon na muling magsiyasat.

Nang palitan ni Isabela Rep. Dy si Leyte Rep. Martin Romualdez bilang House Speaker, sinabihan niya si Cong. Ridon na itigil na ang imbestigasyon sa flood control scam, dahil daw wala naman naniniwala sa kanilang mga findings.

Mali ang pahayag na iyon ni Speaker Dy, sapagkat naniniwala ang nakararami sa mga Pilipino nang unang ibulgar ni Engr. Hernandez sa komite ni Cong. Ridon ang sangkot sa flood control scandal—kabilang sina Sen. Jinggoy Estrada, Sen. Joel Villanueva, at ang noo’y DPWH For Operations Usec. Roberto Bernardo. Boom!

XXX

NGAYONG PD NA ULI SI COL. SUERTE, DAPAT IPA-RAID NIYA ANG MINI-CASINO NINA 'PATRICK' AT 'TOYOY' SA LA TRINIDAD, BENGUET – Balik na sa kanyang dating posisyon bilang Benguet Police Director si P/Col. Lambert Suerte.

Ngayon na siya na muli ang PD, dapat magpakitang-gilas siya at ipa-raid ang mga mini-casino nina "Patrick" at "Toyoy," na matatagpuan sa gilid ng public market at sa gilid ng Benguet Agri Pinoy Trading Center (BAPTC), parehong nasa La Trinidad, Benguet. Period!