Nauna pang may nag-resign sa ICI kesa may naipakulong na politicians na sangkot sa flood control scandal

ni Pablo Hernandez @Prangkahan | December 5, 2025

SABI NI PBBM BAGO MAG-PASKO MAY MAKUKULONG NA POLITICIANS NA SANGKOT SA FLOOD CONTROL PROJECTS, PERO ANG NANGYARI NGAYONG DECEMBER NAUNA PANG MAY NAG-RESIGN SA ICI KAYSA MAY NAIPAKULONG NA PULITIKO -- Nag-resign na si former Dept. of Public Works and Highways (DPWH) Sec. Rogelio Singson bilang isa sa miyembro ng Independent Commission for Infrastructure (ICI) na itinatag ni Pres. Bongbong Marcos (PBBM) para mag-imbestiga at magrekomenda ng kaso sa mga sangkot sa flood control projects scam, at ang kanyang (Singson) resignation ay epektibo sa Dec. 15, 2025.

Aba teka, malinaw naman ang sabi ni PBBM na bago mag-Pasko ay may mga politician na sangkot sa flood control projects scam ang makukulong, pero iba ang nangyari, kasi ngayong Disyembre 2025 ay mas may nauna pang mag-resign sa ICI kaysa may pulitikong naipakulong, boom!

XXX

PAG-TOP NINA VP SARA AT SEN. BONG GO SA 2028 PRESIDENTIAL AT VP ELECTION, PATUNAY NA HINDI NANINIWALA ANG MAJORITY PINOY SA MGA ALEGASYON SA KANILA NG MGA ANTI-DUTERTE -- Sa latest survey ng WR Numero Research firm ay nananatiling top si Vice Pres. Sara Duterte-Carpio sa pagka-presidente at Sen. Bong Go sa pagka-bise presidente.

Ibig sabihin niyan ay hindi naniniwala ang mayoryang Pinoy sa mga samu’t saring alegasyon na ipinupukol ng mga anti-Duterte kina VP Sara at Sen. Bong Go, period! 

XXX

SAKALING MAGTAGUMPAY ANG IMPEACHMENT KAY VP SARA, TIYAK SI SEN. BONG GO ANG PANLABAN NI FPRRD SA 2028 PRESIDENTIAL ELECTION -- Ang inanunsyo ni Bayan Muna Chairman Teddy Casino na magpa-file sila ng impeachment complaint sa Feb. 2026 laban kay VP Sara ay malinaw na aksyon nila para hadlangan na makalahok sa 2028 presidential election ang anak ni former Pres. Rodrigo Roa Duterte (FPRRD) kasi nga naman nakikita sa social media na napakarami pa rin ng mga nakasuporta sa pamilya Duterte.

Kung sakaling magtagumpay ang impeachment kay VP Sara, mali ang akala ng mga anti-Duterte na wala nang panlaban si FPRRD sa 2028 election, dahil may pamato pa siya at ito ay ang itinuring din niyang anak na si Sen. Bong Go, period!

XXX

AYAW PUMASOK SA PULITIKA NG BILYONARYO NA SI RAMON S. ANG, PERO MAY ILAN NA PUMASOK PA RIN, KAYA ANG TANONG: ANO’NG BALAK NG IBA NA MGA BILYONARYO NA NAGSIPAG-PULITIKO PA? -- Tinanggihan ng bilyonaryong negosyanteng si Ramon S. Ang (RSA) ang mungkahi ng ilang sektor na pamunuan niya ang bansa kapag parehong napatalsik sa puwesto sina PBBM at VP Sara na kapwa naiisyuhan ng corruption. Ayon sa kanya (Ramon S. Ang) kahit kailan hindi pumasok sa kanyang isipan na pumasok sa pulitika.

May punto si RSA na ayawan ang pagpasok sa pulitika kasi nga naman bilyonaryo na siya at matagumpay naman siyang negosyante, na baka nga naman madungisan pa ang kanyang pangalan na may intereres siya sa kaban ng bayan kapag tinanggap niya ang alok na pamunuan ang bansa.

Kamakailan lang ay nailantad sa publiko ang Statement of Assets, Liabilities and Net Worth (SALN) ng mga pulitiko, may ilan sa kanila ang napag-alamang mga bilyonaryo, kaya’t ang tanong: Bakit mga bilyonaryo na sila ay nagsipag-pulitiko pa? Ano balak? Boom!

Astig na ‘meow, meow Congressman’ Barzaga, ‘nabahag ang buntot’ kay Rep. Abalos, anyare?

ni Pablo Hernandez @Prangkahan | December 4, 2025

ASTIG NA ‘MEOW, MEOW’ CONG. KIKO BARZAGA ‘NABAHAG ANG BUNTOT’ KAY CONG. JC ABALOS -- Si Cavite 4th District Rep. Kiko Barzaga ay pinatawan ng Kamara, base sa rekomendasyon ni  4Ps Partylist Rep. JC Abalos, chairperson ng House Ethics Committee ng 60 days suspension, at ang dahilan ng kanyang suspensyon ay ang mga malalaswang post niya sa social media, at bukod sa pagsuspinde sa kanya ay inatasan din siya ng Kamara na burahin na ang kanyang mga ipinost, pero sadyang may katigasan ito (Cong. Barzaga) kaya hindi niya idinelete ang kanyang mga post.

Ang katigasan ng ulo ni Cong. Barzaga ay tinapatan ng ultimatum ni Cong. Abalos na kung sa loob ng 24-oras ay hindi pa niya idi-delete ang kanyang mga malalaswang post ay may mas mabigat na gagawing aksyon (expulsion?) ang komite, at dahil sa babala na iyan, naobliga siya (Cong. Barzaga) na i-take down o i-delete na ang kanyang mga may kalaswaang post sa social media.

Ang nais nating ipunto ay ang feeling astig na si Cong. Barzaga na tinaguriang “meow, meow congressman” ay nagkaroon din ng katapat, ‘nabahag ang buntot’ niya kay Cong. Abalos, boom!

XXX

DAHIL ‘BINALAHURA’ NG SC AT COMELEC ANG PARTYLIST SYSTEM, KAYA MGA NAGING CONGRESSMAN MULA SA POLITICAL DYNASTY AT MGA KONTRAKTOR -- Nagsulong si Sen. Bam Aquino ng panukalang batas na reporma sa partylist system sa bansa, na ang nilalaman ay dapat lahat ng lalahok sa halalan na mga partylist ay iyong totoong may nire-represent na marginalized sector para hindi na maulit na maging partylist representatives sa Kamara ang mga mula sa political dynasty at mga kontraktor.

Sa totoo lang, hindi naman na sana kailangan ang panukalang batas na iyan ni Sen. Aquino kung hindi lang ‘binalahura’ ng Supreme Court (SC) at Comelec ang partylist system sa bansa dahil nakasaad naman talaga sa Konstitusyon na tanging marginalized sector lang mula sa mga manggagawa, magsasaka, mangingisda, maralita, kabataan, kababaihan, katutubo ang pinapayagang lumahok sa eleksyon.

Kaya lang, noong April 2013 binago ng SC ang ruling, pinapayagan na ang mga political party, region sectors at mga organisasyon na magtatag ng mga partylist para sumali sa halalan, at ang ginawa naman ng Comelec kahit alam naman nilang mula sa mga political dynasty at mga kontraktor ang nominado na mga partylist, pinayagan pa, kaya ang resulta nang magsipagpanalo sa halalan, ang mga inatupag ‘mang-scam’ sa kaban ng bayan, pwe!

XXX

MGA KINURAKOT SA NAPAKALAKING UTANG NG ‘PINAS, TAUMBAYAN ANG MAGBABAYAD -- Inanunsyo ng Bureau of Treasury (BoT) na pumalo na sa higit P17.563 trillion ang utang ng Pilipinas sa iba’t ibang financial institutions sa mundo.

Sa utang na iyan, malaking bahagi riyan ang in-scam ng mga kurakot sa pamahalaan at mga kasabwat nilang kontraktor, at ang malungkot na katotohanan, iyong mga naibulsa ng mga “buwaya” ay wala na, at taumbayan pa ang magbabayad ng utang, tsk!

XXX

TILA RAMDAM NI MANONG CHAVIT, MAKUKULONG SIYA SA CITY JAIL SA PANAHON NG MARCOS ADMIN KAYA PANAY PANAWAGAN NA MAG-RESIGN NA SI PBBM -- Ayaw lumubay ni former Ilocos Sur Gov. Chavit Singson sa panawagang mag-resign na si Pres. Bongbong Marcos (PBBM).

Napaghahalata si Manong Chavit na ang laki ng takot niyang makulong sa panahon ng Marcos admin, dahil may mga isinampang kaso na sa kanya sa Ombudsman, na ‘ika nga tanging paraan na lang para hindi siya makalaboso sa city jail ay iyong mawala sa poder ang Marcos administration, kaya talaga namang maya’t maya nagpapa-presscon siya, nagba-vlog sa social media sa panawagang mag-resign na si PBBM, boom!

Kapag hindi uli tinupad ng ICI ang promise na live streaming, inuunggoy na nila ang taumbayan

ni Pablo Hernandez @Prangkahan | December 3, 2025

LAKI SA YAMAN SI CONG. BARZAGA, MULA SA POLITICAL DYNASTY KAYA HINDI SIYA ‘AARAY’ SA 2 MONTHS SUSPENSION SA KANYA WITHOUT PAY -- Matapos suportahan ng 249 congressmen ang rekomendasyon ng House Ethics Committee na pinamumunuan ni 4Ps Partylist Rep. JC Abalos na suspendihin ng 60 days without pay si Cavite 4th District Rep. Kiko Barzaga dahil sa umano masamang asal na ipinakikita nito sa publiko, kabilang ang pag-uudyok sa taumbayan at militar na mag-alsa laban sa Marcos administration, ay hindi kinakitaan ng pagkalungkot ang nabanggit na kongresista.

Sa totoo lang, balewala kay Cong. Barzaga ang 2 months suspension without pay sa kanya ng Kamara, na ‘ika nga “hindi siya aaray” na sa 2 buwan ay wala siyang suweldo dahil “barya” lang ito sa kanya dahil laki siya sa yaman, mula siya sa political dynasty sa Cavite, matagal na panahong nanungkulang kongresista at alkalde ang kanyang mga magulang na sina Dasmariñas Mayor Jenny Barzaga at yumao niyang ama na si Cong. Pedi Barzaga, at katunayan nga noong hindi pa siya kongresista ay isa siya sa maituturing na "nepo baby" dahil panay post niya sa social media na mayroon siyang sports car, luxury car, nagpapakita ng sangkatutak na pera at biyahe sa iba’t ibang bansa, period!

XXX

KUNG BALEWALA KAY CONG. BARZAGA ANG 2 MONTHS SUSPENSION SA KAMARA, TIYAK IIYAK SIYA KAPAG NAKULONG SA CITY JAIL SA MGA KASONG INCITING TO SEDITION AT REBELLION -- Kung balewala kay Cong. Barzaga ang 2 months suspension without pay sa kanya ng Kamara, hindi niya dapat ipagwalangbahala ang mga kasong inciting to sedition at inciting to rebellion na isinampa sa kanya ng PNP-Criminal Investigation and Detection Group (CIDG).

Kapag isinampa na kasi ng Quezon City Prosecutor’s Office ang mga criminal case na ito sa korte, hindi man aminin ni Cong. Barzaga ay tiyak aatungal siya sa iyak kapag inaresto na siya at ikulong sa city jail.

Malabo siyang bigyan ng VIP treatment dahil nga ang panuntunan ni DILG Sec. Jonvic Remulla, lahat ng pulitikong magkakaso at mahuhuli, lahat sa city jail ikukulong, boom!

XXX

DAPAT TUPARIN NA NG ICI ANG PROMISE NILANG LIVE STREAMING, KUNG HINDI NA NAMAN NILA TUTUPARIN, INUUNGGOY NA NILA ANG TAUMBAYAN -- Nangako ang Independent Commission for Infrastructure (ICI) na ila-live nila ang gagawin nilang imbestigasyon sa flood control projects kina presidential son, Ilocos Norte Rep. Sandro Marcos, former presidential son, Davao City Rep. Pulong Duterte at iba pang kongresista.

Kaya kung sakali na hindi na naman tutuparin ng ICI ang pangakong live streaming at ikakatuwiran na ang gusto ng mga cong. ay "executive session" o closed door hearing, ibig sabihin niyan inuunggoy na ng komisyon ang taumbayan, period!

XXX

VP SARA HINDI PA RIN SAFE SA IMPEACHMENT -- Kinumpirma ng organisasyong “Bayan Muna” na magsasampa sila ng panibagong impeachment complaints sa Feb. 2026 laban kay Vice Pres. Sara Duterte-Carpio kaugnay sa confidential funds scam, unexplained wealth at iba pa.

Kung ganu’n, hindi pa rin pala safe sa impeachment si VP Sara, boom!