Sarah Discaya at Malou Lipana, buti talo sa eleksyon, ‘di paglilingkod ang pakay kundi ‘pang-i-scam’ sa kaban ng bayan

ni Pablo Hernandez @Prangkahan | September 27, 2025

PARANG SINABI NI PBBM NA SAFE KAY SEC. REX GATCHALIAN ANG PERA NG BAYAN KAYA P36B PONDO NG DPWH FLOOD CONTROL PROJECT, INILIPAT SA DSWD -- Inanunsyo ni Pres. Bongbong Marcos (PBBM) na ang P36 billion na bahagi ng flood control projects ng Dept. of Public Works and Highways (DPWH) ay ipinalilipat na niya sa tanggapan ni Sec. Rex Gatchalian ng Dept. of Social Welfare and Development (DSWD) para sa mga programang pang-ayuda ng kagawaran tulad ng Assistance to Individual in Crisis Situation (AICS), Payapa at Masaganang Pamayanan (PAMANA) at Pantawid Pamilyang Pilipino Program (4Ps).

Kumbaga, parang sinabi na rin ni PBBM na safe ang pera ng bayan kay Sec. Gatchalian, na ang pondong ito (P36B) ay tiyak makakarating sa mga dapat tulungang mamamayan, kaysa ang public funds na nasa flood control projects ay kurakutin na naman ng mga ‘buwayang’ DPWH official, pork barrel politicians at mga sindikatong kontraktor, period!

XXX

MURA ANG INABOT KAY DPWH SEC. DIZON NG DAVAO OCCIDENTAL DISTRICT ENGINEER, BINAYARAN NITO NG P96.5M ANG GHOST PROJECT NG MAG-ASAWANG DISCAYA -- Harap-harapang minura ni DPWH Sec. Vince Dizon si DPWH-Davao Occidental District Engr. Rodrigo Larete dahil binayaran nito nang buo, worth P96.5 million ang "ghost" flood control project ng St. Timothy Construction Company ng mag-asawang Curlee at Sarah Discaya sa Culaman Bridge, Abad Santos sa lalawigang ito.

Mamumura talaga ang district engineer na ito dahil sa ‘sabwatan’ nila ng mag-asawang Discaya ay pinalabas nilang completed na noon pang year 2022 ang proyekto pero ‘yun pala ay "ghost project" ito kung kaya’t ang mga residente rito ay patuloy na nakakaranas ng lampas-tao na baha kapag bumubuhos ang malakas na ulan, tsk!

XXX

BUTI NATALO SA ELEKSYON SINA SARAH DISCAYA AT VENDORS PARTYLIST NI MALOU LIPANA (MISIS NI COA COMM. MARIO LIPANA) DAHIL HINDI PALA PAGLILINGKOD ANG PAKAY NILA KUNDI PARA MAS MARAMI PANG ‘MA-SCAM’ SA KABAN NG BAYAN -- Noong nakaraang eleksyon, mabuti na lang at natalo si Sarah Discaya sa pagka-alkalde ng Pasig City at ang Vendors Partylist na ang first nominee ay si Malou Lipana na misis ni Commission on Audit (COA) Commissioner Mario Lipana.

Nang pumutok ang flood control projects scam ay dito nabulgar na nakapang-scam ang mag-asawang Discaya ng worth P207 billion sa kaban ng bayan, at nabunyag din na itong misis ni Commissioner Lipana na si Malou ay kontraktor din pala na nakakakopo ng sangkatutak na proyekto sa DPWH.

Kaya natin nasabing mabuti na natalo sina Discaya at partylist ni Lipana dahil hindi naman pala paglilingkod ang pakay nila kaya sila nagsipagkandidato, kundi para mas marami pang ‘ma-scam’ sa kaban ng bayan, mga buset!

XXX

KAMALASAN ANG INABOT NI ESCUDERO SA MARCOS ADMIN, INIREREKOMENDANG KASUHAN NG MALVERSATION, BAKA MATANGGAL PA SIYA SA PAGKA-SENADOR -- Matapos ipatawag at imbestigahan ng Comelec ang kontraktor na si Lawrence Lubiano kaugnay sa pagbibigay nito ng campaign funds kay Sen. Chiz Escudero dahil nakasaad sa batas na bawal magpondo ang mga kontratista sa kandidatura ng mga pulitiko, ay ang senador naman ang ipinatawag ng komisyon kaugnay sa pagtanggap niya ng donasyon sa kontraktor.

Tila minamalas talaga si Escudero sa panahon ng Marcos admin, dahil inirerekomendang kasuhan siya ng National Bureau of Investigation (NBI) ng malversation of public funds kaugnay sa flood control project scam, at kapag napatunayan ng Comelec na guilty siya, tanggal naman siya sa pagka-senador, boom!

Edukasyon ng mga kabataan, ‘wag hayaang nakawin ng mga korup

ni Leonida Sison @Boses | September 27, 2025

Kapag may sumisingaw na alegasyon hinggil sa usapin ng kickback sa mga opisyal ng gobyerno, bukod sa pera nagiging dagok ito sa taumbayan — lalo na kung ang nadadawit ay mula mismo sa sektor ng edukasyon na dapat simbolo ng pag-asa at integridad. 

Kaya nang mabanggit ang pangalan ng isang mataas na opisyal ng Department of Education (DepEd) na umano’y may komisyon galing sa proyekto ng gobyerno, hindi maiwasang mabaon sa alanganin ang imahe ng institusyong dapat gumagabay at inaasahang haligi ng kaalaman ng mga kabataan. 

Sa naganap na pagdinig sa Senado, isiniwalat ni dating Department of Public Works and Highways (DPWH) Undersecretary Roberto Bernardo na may isang opisyal ng DepEd ang kabilang sa mga tumanggap umano ng komisyon mula sa listahan ng proyektong nagkakahalaga ng P2.85 bilyon noong 2024. 

Ayon kay Bernardo, nasa 15 porsyento raw ng pondo ang itinuring na commitment mula sa unprogrammed appropriations sa Office of the Executive Secretary. 

Mariing itinanggi ng nasabing opisyal ang paratang at nagpahayag na bukas siya sa anumang imbestigasyon. Dahil dito aniya ay boluntaryo siyang magli-leave of absence upang bigyang daan ang patas na proseso ng pagsisiyasat. 

Iginiit naman ni DepEd Secretary Sonny Angara na nananatiling nakatuon sila sa pangunahing tungkulin na maghatid ng de-kalidad na edukasyon, at tiniyak na pangangalagaan ng kagawaran ang pinakamataas na pamantayan ng integridad. 

Sa kabila ng pagtanggi, hindi maikakaila na ang pagkakadawit ng pangalan ng opisyal ay magbubukas ng maraming tanong hinggil sa kalinisan ng mga transaksyon sa pamahalaan. 

Kung tutuusin, ang problema ay hindi lamang kung totoo o hindi ang alegasyon, kundi kung paanong patuloy na nadadamay ang sektor ng edukasyon sa mga isyu ng anomalya. 

Ang edukasyon ay dapat maging ligtas na espasyo mula sa katiwalian, subalit tila hindi ito maalis sa impluwensya ng pamumulitika at pangungurakot. 

Ang bawat sentimong inilalaan sa edukasyon ay para sa kinabukasan ng kabataan — hindi para maging palaman sa bulsa ng iilang taga-gobyerno. 

Kung tunay na nais ng pamahalaan na ipakita ang kanilang integridad, dapat walang sinuman, gaano man kataas ang posisyon, ang makakalusot sa pananagutan. Sapagkat sa huli, ang anumang bahid ng katiwalian sa edukasyon ay hindi lamang pagkawala ng pera, kundi pagnanakaw mismo sa kinabukasan ng mga kabataan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Gobyerno, kailangan ng overhaul!

ni Judith Sto. Domingo @Asintado | September 26, 2025

Nakakagalit na abot hanggang langit at nakapagpapabaliktad ng sikmura na mabatid ang pagsisiksik ng bilyun-bilyong pondo sa Bulacan sa ngalan ng “insertions” ng mga halal na mga miyembro ng lehislatura. 

Ang pangunahing nasasangkot ay itong si Cong. Zaldy Co na hanggang ngayon ay hindi pa nagpapakita bagaman nagpapadala sa media ng kanyang kakarampot na mga pahayag. Kung wala talaga siyang itinatago ay hindi niya kailangang maglaho sa gitna ng mga akusasyon sa kanya gaya ng kanyang ginagawa. Hiyaw ng taumbayan kay Co: “Magpakalalaki ka at harapin mo ang mabibigat na mga akusasyon laban sa’yo!”

Nagmula ang mga kasuklam-suklam na mga impormasyon laban kay Co sa testimonya at sinumpaang salaysay ni DPWD District Engr. Henry Alcantara sa Senado, kung saan pinangalanan niya rin sina Sen. Joel Villanueva, Sen. Jinggoy Estrada at dating Sen. Bong Revilla. 

Isang bahagi pa lamang ng national budget ang tinatalakay sa flood control ngunit tatlong senador na agad ang nabanggit na diumano’y tumanggap ng malalaking halaga na idinaan sa kani-kanilang mga tauhan. Paano pa kaya kapag naibuyangyang na ang 10 taong budget mula 2016, aba’y baka maidawit na ang lahat ng senador! Kaya naman puro bulto-bultong cash ang diumano’y bayaran, para napakahirap patunayan ng pagtanggap! 

Bakit naman kasi ginagawang tila napakadali ang ganyang kalalaking pagwi-withdraw ng cash lalo na mula sa proyekto ng gobyerno, na tunay namang kahina-hinala lalo pa’t wala namang dokumentong susuporta sa kung saan dadalhin ang pera. 

May mga malalaking donasyon namang natatanggap ang mga halal na opisyal tuwing eleksyon, na kadalasan ay hindi naman nila lahat idinedeklara sa kanilang SOCE. Mataas na rin naman ang suweldo ng mga mambabatas bukod pa sa kanilang Monthly Operating and Other Expenses o MOOE, at kanilang committee budget. Bukod pa ang pondo kung miyembro sila ng Commission on Appointments o Senate Electoral Tribunal. Kaya’t kung tutuusin, hindi na nila kailangan pang mangurakot o humingi ng grasyang kukunin naman sa kaban ng bayan. 

Bilang isa ring Bulakeño na binabaha ang bahay sa Bulacan na hinulugan ng dekada sa pamamagitan ng dugo’t pawis sa mataas na interes, hindi tayo titigil kasama ang taumbayan hangga’t hindi napapanagot ang mga salarin at hindi naaayos ang bulok na sistema ng pamahalaan!

Tumatambad sa ating lahat na ang sistemang pangkalahatan ng gobyerno ay palyado na, hindi lamang sa DPWH, na siya pa lamang nabubungkal sa kasalukuyan. Hindi malayong kabi-kabila ay mayroong sandamakmak na butas upang magkatsansang magka-kickback ang mga tauhan nito kung hindi mababantayan. 

Hindi lamang inutil ang sistema ng Commission on Appointments, kundi nasasangkot rin ang ilang mga opisyal nito. Hindi pa nga lamang nabibisto ang lahat, ngunit may araw rin kayo, at iyan ay malapit na. 

Overhaul ang kailangan sa gobyerno. Malinaw na buong pamahalaan ay kailangang ayusin sapagkat pinabayaan nito ang kapakanan ng mamamayan. Matagal na panahong hinayaang walang tunay na checks and balances, walang pagmomonitor sa mga proyekto, walang pagpapanagot, at may mga kanal ng lusot sa paggawa ng bilyun-bilyong halaga ng katiwalian sa pamahalaan — mula sa ehekutibo hanggang lehislatibo.

Dapat na ring busisiin ang bawat ahensya ng gobyerno, lalo na iyong mga nag-iisyu ng mga permit at lisensya, kung saan hindi malayong talamak ang lagayan. 

Samantala, nagpapakaalila ang marami nating kababayan sa ibang bansa para lamang mabuhay ng marangal. Busabos ang kalagayan ng maraming Pilipino dahil sa hirap mabuhay sa bansa. Tumingin ka sa kahit anong dako at makikita ng malinaw ang palpak na sistema. Grabe na ang pagtitiis ng mga tapat na Pilipino. Kung paano naaatim ng mga ganid na nasa gobyerno ang bilyun-bilyong korupsiyon habang abang aba ang kalagayan ng kanilang kapwa Pilipino ay isang malaking nakadudurog na katanungan. 

Sa mga nagsipagnakaw sa kaban ng bayan, huwag kayong pakasisigurong hindi kayo malalantad. May araw din kayo. Pananagutin kayo ng taumbayang sukdulan na ang galit sa inyong kasakiman. 

Bato-bato sa langit, tamaa’y siya na nga!

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.