Bank Secrecy Law, dapat ibasura, nagiging sandata lang ng mga kurakot sa pamahalaan

ni Pablo Hernandez @Prangkahan | April 10, 2026

MGA CONG., ‘WAG UMASTANG MGA MAHISTRADO, IWASANG MAGSAGAWA NG 'MINI-TRIAL' PARA HINDI MAGKAROON NG DAHILAN ANG SC NA IPA-STOP IMPEACHMENT PROCEEDINGS KAY VP SARA – Dapat maging maingat ang mga miyembro ng House Justice Committee sa isasagawang hearing sa Abril 14, 2026 kaugnay ng impeachment ni Vice President Sara Duterte.

Dapat nilang isaalang-alang na may nakabinbing petisyon sa Korte Suprema hinggil dito. Bagama’t wala pang inilalabas na temporary restraining order (TRO), maaaring maapektuhan ang magiging resulta ng impeachment process kung mapagpapasiyahan ng Korte Suprema na nagkaroon ng paglabag sa proseso o labis na pagsasagawa ng kapangyarihan ang Kamara.

Sa ganitong konteksto, mahalagang iwasan ng mga kongresista ang anumang hakbang na maaaring ituring na pagganap ng tungkuling parang sa isang “mini-trial,” dahil ang pormal na paglilitis sa impeachment ay nakasalalay sa Senado bilang impeachment court.

Ang mga senador lamang ang inaasahang magsisilbing senators-judges sa impeachment trial. Kaya mahalagang manatili ang House Justice Committee sa tamang saklaw ng kanilang tungkulin upang maiwasan ang anumang isyung maaaring makaapekto sa pagiging balido ng proseso. Period!

XXX

SABLAY ANG SINABI NI PBBM NA HINDI TATAAS ANG PRESYO KASI HINDI LANG MGA BILIHIN TUMAAS, KUNDI PATI MGA BAYARIN – Mula sa 2.4% inflation rate ng bansa noong Pebrero 2026, umakyat ito sa 4.1% nitong Marso 2026. Ayon sa mga ulat, isa sa mga pangunahing dahilan nito ang pagtaas ng presyo ng mga produktong petrolyo sa bansa.

Ipinapakita nito na tila hindi tumugma sa aktuwal na pangyayari ang naging pahayag noon ni Pangulong Ferdinand “Bongbong” Marcos Jr. (PBBM) na hindi tataas ang presyo ng mga bilihin sa gitna ng digmaan sa Middle East at krisis sa langis, dahil bukod sa mga bilihin, tumaas din ang ilang bayarin. Tsk!

XXX

MGA 'EKSPERTO' SA PRESYO NG LANGIS, KAKUNTSABA BA NG MGA OIL COMPANIES? – Sinasabi ng ilang eksperto sa presyo ng langis na kahit bumaba ang halaga ng krudo sa world market, hindi raw ito agad makikita sa pagbaba ng presyo ng produktong petrolyo sa Pilipinas.

Ngunit para sa ilan, palaisipan ito: tunay bang paliwanag ito ng mga eksperto, o simpleng dahilan lamang upang hindi agad asahan ng publiko ang rollback sa presyo?

Hindi kasi katanggap-tanggap para sa iba ang ganitong paliwanag, lalo na kung bumababa na ang presyo ng langis sa pandaigdigang merkado ngunit tila hindi ito ramdam sa lokal na presyo ng produktong petrolyo. Mga pwe!

XXX

IBASURA ANG BANK SECRECY LAW KASI NAGIGING SANDATA LANG ITO NG MGA KURAKOT SA GOBYERNO – Isa sa mga batas na dapat busisiin o rebisahin sa Pilipinas ay ang Bank Secrecy Law.

Sa isang bansang laganap ang katiwalian, hindi dapat ganap na umiiral ang ganitong uri ng batas. Sa halip, nagiging kanlungan lamang ito ng mga tiwaling opisyal upang maitago ang kanilang mga hindi maipaliwanag na yaman, kabilang ang mga perang posibleng nagmula sa katiwalian sa gobyerno.

Dahil dito, nananatiling limitado ang transparency at mahirap matukoy ang tunay na lawak ng anumang anomalya sa pananalapi ng ilang nasa posisyon ng kapangyarihan. Period!

Pagbibisikleta, mas praktikal para makatipid sa gasolina

ni Leonida Sison @Boses | April 10, 2026

Tiyakin sana ng pamahalaan na hindi lang puro plano ang pagbibisikleta—kundi konkretong aksyon na mararamdaman ng mga ordinaryong Pinoy sa kalsada araw-araw. 

Sa gitna ng patuloy na pagtaas ng presyo ng langis, malinaw na hindi na sapat ang pag-asa sa tradisyunal na transportasyon; kailangan ng alternatibong abot-kaya, ligtas, at pangmatagalan.

Kaya naman, isinusulong na layong gawing institusyonal ang pagbibisikleta bilang pangunahing paraan ng transportasyon.

Napapanahon umano ang panukalang ito lalo na’t ramdam ng publiko ang bigat ng gastos sa krudo. Bukod sa pagtitipid, binibigyang-diin din ng panukala ang ambag nito sa kalikasan at sa pagbawas ng pagdepende ng bansa sa inaangkat na langis.

Hindi na bago ang ideya ng pagbibisikleta bilang alternatibong transportasyon. 

Naging popular ito noong kasagsagan ng pandemya nang limitado ang pampublikong sasakyan. Maraming manggagawa ang napilitang magbisikleta upang makapasok sa trabaho. 

Ngunit kahit lumawak ang interes ng publiko, nananatiling kulang ang imprastruktura—lalo na sa makikitid na kalsada kung saan halos walang espasyo para sa bike lanes.

Nilalayon ng panukala na tugunan ang problemang ito sa pamamagitan ng isang komprehensibong pambansang programa. 

Inaatasan ang mga ahensya tulad ng Department of Transportation (DOTr) at Department of Public Works and Highways (DPWH) na maglatag ng malinaw na plano para sa pagtatayo at pagpapanatili ng bike lanes, parking spaces, at iba pang pasilidad. 

Kasama rin dito ang pagbuo ng pamantayan para sa kaligtasan ng mga siklista at proteksyon sa kanilang karapatan sa kalsada.

Hinihikayat din ang pribadong sektor na makiisa sa pamamagitan ng pagbibigay ng tax incentives sa mga kumpanyang maglalaan ng bike-friendly facilities gaya ng shower rooms at lockers. Ito ay hakbang upang gawing praktikal at komportable ang pagbibisikleta para sa mga empleyado.

Sa gitna ng oil crisis na nagtulak sa presyo ng diesel sa humigit-kumulang P170 kada litro at gasolina sa halos P120, malinaw na hindi na sustainable ang kasalukuyang sistema ng transportasyon. 

Ang pagbibisikleta ay hindi lamang alternatibo—ito ay posibleng maging bahagi ng pangmatagalang solusyon.

Dapat hindi lang pagpasa ng batas ang mangyari, kundi ang epektibong pagpapatupad nito. 

Kung seryoso ang gobyerno sa pagbibigay-ginhawa sa mamamayan, dapat nitong tiyakin na ang mga kalsada ay hindi lang para sa sasakyan kundi para sa lahat. 

Ang pagbibisikleta ay hindi luho—ito ay karapatan, at higit sa lahat, isang praktikal na hakbang tungo sa mas inklusibo at makataong sistema ng transportasyon.

Buong ICI report, dapat isapubliko para malaman kung ano ang alibi noon ng mag-titong Cong. Martin at Cong. Sandro

ni Pablo Hernandez @Prangkahan | April 9, 2026

BUONG ICI REPORT DAPAT LANG ISAPUBLIKO KASI DITO MALALAMAN KUNG ANO ANG ALIBI NG MAG-TITONG CONG. MARTIN AT CONG. SANDRO – Natapos ang mandato ng Independent Commission for Infrastructure (ICI) noong March 31, 2026 nang hindi nalalaman ng publiko ang naging paliwanag nina Leyte Rep. at dating House Speaker Martin Romualdez at Ilocos Norte 1st District Rep. Sandro Marcos kaugnay ng pagkakadawit ng kanilang mga pangalan sa flood control scandal.

Pareho silang ipinatawag ng ICI—si Romualdez noong Oktubre 14, 2025 at si Marcos noong Disyembre 4, 2025—ngunit dahil isinagawa sa closed-door hearing ang pagdinig, nanatiling hindi isinasapubliko ang kanilang naging depensa o paliwanag.

Dahil dito, nananawagan ng malinaw at ganap na transparency sa pamamagitan ng paglalabas ng buong ulat ng ICI upang malaman ng publiko kung may sapat na batayan ang mga paratang o wala laban sa mag-tito na mambabatas. Period!

XXX

MGA SANGKOT SA FLOOD CONTROL SCANDAL SA PANAHON NG DUTERTE ADMIN, DAPAT IMBESTIGAHAN DIN – Sa kabila ng inamin ni Sarah Discaya na noong 2016 pa nagsimula silang mag-asawa ni Curlee Discaya na umano’y kumita mula sa flood control projects ng Department of Public Works and Highways (DPWH), nakatuon lamang umano ang imbestigasyon ng Independent Commission for Infrastructure (ICI) sa mga proyekto mula 2023 hanggang 2025.

Ngayong buwag na ang ICI, iginiit na dapat imbestigahan nina Ombudsman Boying Remulla, Department of Justice (DOJ) Sec. Frederick Vida, at Senate Blue Ribbon Committee Chair Sen. Ping Lacson ang mga flood control projects mula 2016 hanggang 2022.

Ayon sa mga kritiko, hindi dapat makaligtas sa pananagutan ang mga sangkot sa umano’y anomalya sa flood control projects na naganap pa noong panahon ng administrasyong Duterte. Boom!

XXX

PARA MALAMAN NG TAUMBAYAN ANG BUONG KATOTOHANAN, DAPAT HINDI NA PAGBIGYAN NG SC ANG PANIBAGONG HIRIT NI VP SARA NA IPA-STOP ULI IMPEACHMENT PROCEEDINGS SA KANYA – Pinagbigyan na noon ng Supreme Court (SC) ang hirit ni Vice President Sara Duterte na ipatigil ang impeachment proceedings laban sa kanya dahil sa mga isyung teknikal. Sa panig naman ng Kamara, sinunod nila ang mga ipinag-utos ng Korte Suprema hinggil sa proseso ng impeachment.

Dahil dito, iginiit ng ilang panig na wala nang sapat na dahilan upang muling pakinggan pa ng SC ang panibagong kahilingan ng bise presidente na ipahinto ang naturang impeachment.

Para umano sa kapakanan ng publiko na naghahangad ng katotohanan sa mga alegasyon laban kay VP Sara—partikular sa isyu ng ₱650 milyong confidential funds na umano’y hindi naipaliwanag—dapat hayaan na ng Korte Suprema na magpatuloy ang impeachment proceedings. Period!

XXX

‘WAG SANANG KALIMUTAN NG MARCOS ADMIN ANG MGA MAGSASAKA AT MANGINGISDA, BIGYAN DIN SILA NG AYUDANG FUEL SUBSIDY – Hindi lamang mga tsuper ng pampublikong transportasyon ang dapat bigyan ng fuel subsidy ng administrasyong Marcos.

Ang mga magsasaka at mangingisda ay gumagamit din ng gasolina sa kanilang pagsasaka at pangingisda, kaya hindi sila dapat kalimutan ng gobyerno. Dapat ding mabigyan sila ng kaukulang fuel subsidy. Please lang!