'Pork free' 2026 national budget, pang-uunggoy lang dahil ang P151B unprogrammed funds, pork barrel ‘yan!

ni Pablo Hernandez @Prangkahan | January 9, 2026

MANONG CHAVIT, PEKENG ANTI-CORRUPT DAW KASI GUSTO NIYANG MAGING STATE WITNESS ANG MGA KURAKOT NA SINA ZALDY CO AT SARAH DISCAYA – Panay ang atake ni dating Gobernador ng Ilocos Sur na si Chavit Singson sa talamak daw na korupsiyon sa administrasyon ng Marcos. Sa kanyang press conference noong Enero 5, 2026, sinabi niya na dapat gawing state witness ng Department of Justice (DOJ) laban sa mga sangkot sa flood control scandal sina dating Ako Bicol partylist Rep. Zaldy Co at kontraktor na si Sarah Discaya.

Dahil sa kanyang pahayag, na-bash si Manong Chavit sa social media. Marami ang nagsabing pekeng anti-corrupt siya dahil ang gusto niyang maging state witness ay sina Zaldy Co at Sarah Discaya, na parehong nasangkot sa kurapsiyon at nag-scam ng bilyon-bilyong piso mula sa kaban ng bayan. Period!

XXX

PORK BARREL ANG P151B UNPROGRAMMED FUNDS, KASI PANG-UUNGGOY LANG SA PUBLIKO ANG SINABI NG MALACAÑANG, SENADO AT KAMARA NA 'PORK FREE' ANG 2026 NATIONAL BUDGET – Maituturing na pang-uunggoy sa publiko ang ipinapakita ng Malacañang, Senado, at Kamara na "pork barrel free" raw ang 2026 national budget.

Kung vineto ni Pangulong Ferdinand “Bongbong” Marcos Jr. (PBBM) ang P243 billion na unprogrammed funds, saka puwede ngang sabihing "pork barrel free" ang badyet ngayong taon. Ngunit dahil P92.5B lang ang vineto ng presidente at itinira ang higit P151B, kalokohan ang sinasabi nilang walang "pork" ang pambansang badyet ngayong 2026.

Sa imbestigasyon ng Senate Blue Ribbon at House Infra Committee noong 2025, lumitaw na may bahagi ng pera ng bayan na nakapaloob sa unprogrammed funds ang napunta sa mga ghost, substandard, at unfinished flood control projects. Ibig sabihin, ang kaban ng bayan sa unprogrammed funds ay ginagawang pork barrel projects ng mga buwayang pulitiko at government officials. Boom!

XXX

SANA IDEKLARA NG SC NA UNCONSTITUTIONAL ANG P151B UNPROGRAMMED FUNDS, PARA HINDI ITO PAGPIYESTAHANG KURAKUTIN NG MGA BUWAYA SA PAMAHALAAN – Hinirit nina Caloocan City 2nd District Rep. Edgar Erice at ML Partylist Rep. Leila de Lima sa Supreme Court (SC) na ideklarang unconstitutional ang nalalabing higit P151 billion na unprogrammed funds sa 2026 national budget.

Tigas ng ulo ni PBBM dahil maraming sektor ang nananawagan sa kanya na i-veto ang P243B unprogrammed funds, ngunit P92.5B lamang ang vineto niya. Kaya’t ang nalalabing P151B ay napunta pa sa Supreme Court.

Sana katigan ng SC ang petisyon nina Cong. Erice at Cong. De Lima upang hindi na pagpiyestahang kurakutin ng mga “buwaya” sa pamahalaan ang P151B unprogrammed funds. Period!

XXX

UTANG NG ‘PINAS HINDI NABABAWASAN, SA HALIP, PATULOY NA TUMATAAS – Mula sa naitalang utang na P17.56 trillion ng Pilipinas noong October 2025, pumalo na ngayon sa P17.65 trillion ang utang ng bansa sa mga financial institutions sa buong mundo.

Palubog nang palubog sa utang ang ‘Pinas sa ilalim ng Marcos administration dahil hindi nababawasan ang utang, at sa halip, patuloy pang tumataas. Tsk!

Maayos na transportasyon at kaligtasan ng mga komyuter, unahin

ni Leonida Sison @Boses | January 9, 2026

Hindi na bago sa mga komyuter sa Metro Manila ang araw-araw na pagsubok sa pampublikong transportasyon, ngunit muling napatunayan ito ng viral na siksikan sa isang platform ng MRT-3 noong Lunes ng umaga. Sa halip na simpleng aberya, malinaw na sumasalamin ang insidenteng ito sa matagal nang suliranin: kakulangan sa maayos na crowd management, disiplina, at malasakit sa ordinaryong pasahero na umaasa sa tren para makarating sa kanilang patutunguhan.

Bandang alas-7:25 ng umaga nang mangyari ang matinding pagsikip sa platform, matapos payagang makapasok ang mga pasahero kahit ramdam na ang congestion. Nang dumating pa ang mga pasaherong bababa ng tren, lalong lumala ang sitwasyon at nagdulot ng pangamba sa kaligtasan ng lahat.

Agad namang humingi ng paumanhin ang pamunuan ng MRT-3 at inako ang responsibilidad. Bilang tugon, iniutos ng Department of Transportation (DOTr) ang agarang pagpapatupad ng lahat ng kinakailangang hakbang upang maiwasan ang ganitong kapabayaan.

Ayon sa MRT-3, paiigtingin ang pagbabantay at koordinasyon ng ground personnel para sa mas maayos na daloy ng pasahero, lalo na tuwing rush hour. Kasabay nito, mag-i-install ng walkthrough metal detectors sa northbound at southbound entrances ng North Avenue, Quezon Avenue, at GMA-Kamuning stations. Layunin nito na masigurong ligtas ang bawat komyuter sa pamamagitan ng maagang pagtukoy sa anumang banta o ipinagbabawal na gamit bago makapasok sa platform. Kalaunan, ipatutupad din ito sa lahat ng istasyon ng MRT-3.

Gayunman, higit pa sa metal detector at dagdag na bantay ang kailangan ng mga komyuter. Ang tunay na solusyon ay isang sistemang inuuna ang kanilang oras at kaligtasan. Hindi normal ang makipagsiksikan na tila sardinas tuwing umaga, at hindi dapat isugal ang buhay para lamang makarating sa patutunguhan.

Ang insidenteng ito ay panibagong paalala na ang transportasyon ay hindi pribilehiyo kundi pangunahing serbisyo para sa mamamayan. Hangga’t hindi nararanasan ng bawat komyuter ang malinaw at konkretong pagbabago sa sistema, mananatiling hirap ang publiko. Panahon na upang hindi lang pangako ang marinig kundi aktuwal na ginhawang maramdaman: ligtas, maayos, at makataong biyahe para sa lahat.

Ang pag-unlad ng lungsod ay hindi nasusukat sa dami ng proyekto, kundi sa gaano napapagaan ang buhay ng ordinaryong mamamayan. Oras na upang ilagay ang komyuter sa sentro ng bawat desisyon, sapagkat sa kanilang araw-araw na sakripisyo nasusubok ang tunay na malasakit ng serbisyo publiko.

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Horoscope | Enero 9, 2026 (Biyernes)

ni Maestro Honorio Ong @Horoscope | January 9, 2026

Sa may kaarawan ngayong Enero 9, 2026 (Biyernes): Malakas ka kesa sa mga pangkaraniwan. Kaya inaasahan na magtatagumpay ka sa lahat ng larangan. 

ARIES (Mar. 21-Apr. 19) - Sa iyo ang araw na ito, anumang kagustuhan mo, ay iaayon sa iyo ng langit. Muli, gawin mo na ang mga ninanais mo. Masuwerteng kulay-blue. Tips sa lotto-9-18-20-29-33-42.

TAURUS (Apr. 20-May 20) - Tatapang ka, pero mas magandang kung pagtutuunan mo ng pansin ang mga bagay na hindi mo pa nagawa noon. Masuwerteng kulay-black. Tips sa lotto-2-11-21-24-32-40.

GEMINI  (May 21-June 20) - Magdahan-dahan ka ngayon. Kapag nasobrahan ang tiwala mo sa iyong sarili, may ilang bagay na puwedeng mong pagsisihan at panghinayangan. Masuwerteng kulay-violet. Tips sa lotto-5-17-20-26-39-42.

CANCER (June 21-July 22) - Sumunod ka lang sa gusto ng isang malapit sa puso mo, dahil ang gusto lang naman niya ay maayos ang buhay mo at makamtan mo ang mga ambisyon mo. Masuwerteng kulay-peach. Tips sa lotto-1-15-29-31-35-44.

LEO (July 23-Aug. 22) - Kung ano ang tama, ru’n ka pumanig. Iwasan mong pumanig sa malapit sa buhay mo, lalo na kapag alam mong hindi naman tama ang kanyang mga kagustuhan. Masuwerteng kulay-red. Tips sa lotto-6-14-22-27-38-41.

VIRGO(Aug. 23-Sept. 22) - Talas ng isip ang gamitin mong sandata para sa mga mabibigat na suliraning iyong kinakaharap. Makakaasa ka, bubuti at aayos din ang lahat. Masuwerteng kulay-apple green. Tips sa lotto-7-10-16-24-30-45.

LIBRA (Sept. 23-Oct. 22)  - Huwag mong pansinin ang mga mapanghusga, bagkus ituloy mo lang ang gusto mong gawin. Mapapahiya at papangit ang kanilang mga kapalaran dahil sa mga maling husga nila sa iyo. Masuwerteng kulay-white. Tips sa lotto-3-11-20-28-36-43.

SCORPIO (Oct. 23-Nov. 21)  - Hindi man kalakihan ang suwerteng makakamit, sapat na rin iyon para masabi mong mahal ka ng langit at hindi ka pinababayaan. Ito ang mensahe para sa iyo. Masuwerteng kulay-green.Tips sa lotto-8-14-18-25-31-35.

SAGITTARIUS (Nov. 22-Dec. 21) - Hahawiin mismo ng langit ang mga hadlang at sagabal sa landas ng buhay na iyong nilalakaran. Masuwerteng kulay-yellow. Tips sa lotto-3-12-23-26-39-44.

CAPRICORN (Dec. 22-Jan. 19) - Kung magkakaroon ka ng kahit konting lakas ng loob, malalaking biyaya ang nag-aabang sa’yo at ganap na mapapasakamay mo ito. Masuwerteng kulay-purple. Tips sa lotto-4-17-21-28-32-45.

AQUARIUS (Jan. 20-Feb. 18) - Titigil ang mga hindi magagandang kaganapan sa buhay mo at magsisimula na gumanda ang buhay mo ngayon. Masuwerteng kulay-pink. Tips sa lotto-4-15-29-31-34-44.

PISCES (Feb. 19-Mar. 20) - Hamuhin mo ngayon ang pinakamalakas mong kaaway, dahil nakatitiyak ako na mananalo ka ngayon. Masuwerteng kulay-beige.Tips sa lotto-5-11-19-25-35-41.