Fuel discount sa PUV drivers, aprub

ni V. Reyes | June 30, 2025

Photo File

Pumayag na umano ang ilang kumpanya ng langis na magbigay ng hindi bababa sa piso kada litrong diskuwento sa mga drayber ng pampublikong sasakyan upang maibsan ang epekto ng serye ng oil price hike.

Ayon kay Department of Energy (DOE) officer-in-charge Secretary Sharon Garin, resulta ito ng pakikipag-usap sa mga nasa industriya ng langis para matulungan ang mga tsuper.

"Nakausap natin 'yung Petron, Caltex, Shell at Cleanfuel. Everyday naman, 'yan mini-meeting kada isa. At least meron silang mga P1 discount sa kada litro sa lahat ng public utility vehicles," ayon kay Garin.

"So, bawi rin 'yan kasi hindi namin masyadong makontrol ang presyo. Sabi ng batas, 'wag n'yong kontrolin. So, humihingi kami ng tulong sa mga oil companies," dagdag nito.

Binanggit pa ni Garin na marami ring promo bilang loyalty program at diskuwento ang mga kumpanya ng langis na maaaring tangkilikin ng mga pribadong motorista.

Matatandaang dalawang beses na nagpatupad ng bigtime na pagtataas ng presyo ng mga produktong petrolyo noong nakaraang linggo.

Sensor-based traffic light palit sa countdown timer

ni Gina Pleñago @News | June 30, 2025

Photo File: Metropolitan Manila Development Authority (MMDA)

Ipinalit ng Metropolitan Manila Development Authority (MMDA) ang mga sensor-based traffic light sa countdown timer.

Batay sa ahensya, ang 96 countdown timers sa signalized intersections ay sensor-based traffic lights, na pagbabatayan kung kailan tatawid ang mga sasakyan.

Sinabi ng MMDA na ang inisyatiba ay bahagi ng kanilang adaptive signaling system na unang ipinatupad noong 2012.

Ang sensor-based traffic lights umano ay nag-a-adjust depende sa rami ng mga sasakyan sa kalsada, lalo na sa gabi.

"Minimeasure niya, lalung-lalo na sa gabi, 'yung volume ng traffic. For example, Lane A, wala nang dumadaan. Kahit na naka-program siya initially na 1 minute, ika-cut short ngayon to 30 seconds at ililipat niya doon sa mas maraming beses dahil mas may volume," ani MMDA Chairman Atty. Don Artes.

“I think 'yung warning na 5 blinks, tapos 3 seconds na yellow and then red is sufficient enough para makapag-adjust 'yung ating mga kababayan at malaman nila kung dapat na ba silang mag-slow down, di ba? Para hindi sila mag-beat ng red light,” sabi pa ng MMDA chief.

Utak sa 'missing sabungeros', mapera, mabigat na kalaban — Remulla

ni BRT @News | June 27, 2025

Photo File: Boying Remulla FB / Taal / Circulated

Sinabi ni Justice Secretary Jesus Crispin Remulla na mabigat ang magiging kalaban sa kaso ng 'missing sabungeros' dahil sa mapera umano ang posibleng utak sa krimen na kayang umabot ang impluwensiya sa korte.

“Ang bigat ng kalaban dito kasi ang pera n'yan makakapasok ‘yan hanggang even sa judiciary. That’s one thing that we might have to talk to the Chief Justice about,” ani Remulla sa isang ambush interview.

“Kasi mabigat. Mabigat ang pera ng e-sabong. Hindi ito basta-basta,” dagdag pa niya.

Samantala, tumanggi muna si Remulla na pangalanan ang posibleng utak dahil patuloy pa umano ang kanilang case build up.

"Pinag-aaralan pa namin ang maraming bagay at nagke-case build up pa rin kami. Hindi kami tumitigil kasi mahirap magsalang ng kaso na hindi buo, so binubuo pa namin ang lahat ng detalye ng kaso," ayon sa kalihim sa hiwalay na pahayag.