Baha, lampas-tao... Habagat, hataw hanggang Huwebes

ni Mai Ancheta @News | July 22, 2025

Patuloy na makararanas ng tuluy-tuloy na pag-ulan dulot ng Habagat hanggang sa Huwebes sa Metro Manila at mga kalapit na lalawigan.

Ito ang pagtaya ng  Philippine Atmospheric, Geophysical and Astronomical Services Administration (PAGASA) sa harap ng walang patid na pag-ulan simula nitong weekend kahit nakaalis na ang Bagyong Crising.

Ayon sa PAGASA, bukod sa Metro Manila, mararamdaman din ang mga pag-ulan sa Zambales, Bataan, Occidental Mindoro at ilang bahagi ng Ilocos Region.

Patuloy na mararamdaman ang malakas na pag-ulan simula Lunes hanggang Martes sa National Capital Region, Zambales, Bataan, Pampanga, Bulacan, Cavite, Batangas at Rizal.

Nitong Lunes, nakaranas ng mga pagbaha ang maraming lugar sa Metro Manila kaya nag-alok ng libreng sakay ang Department of Transportation (DOTr) partikular sa MRT 3, LRT 1 at 2.

Nag-deploy naman ng bus at truck ang Philippine Coast Guard (PCG) para sa libreng sakay sa rutang Quiapo hanggang Angono, Rizal; Quiapo hanggang Fairview, Quezon City; at Lawton hanggang Alabang, Muntinlupa City. 

Samantala, sa ibang lugar sa bansa, umabot na sa lampas-tao ang baha na nagdulot ng pagkawasak ng mga bahay at ari-arian.

Hirit ni Quiboloy na piyansa, ibinasura

ni Madel Moratillo @News | July 22, 2025

Photo File: Senate of the Philippines

Ibinasura ng Pasig City Regional Trial Court Branch 159 ang hiling ni Kingdom of Jesus Christ leader Pastor Apollo Quiboloy at mga kapwa akusado nito na makapagpiyansa sa kinakaharap na qualified human trafficking cases. 

Sa resolution ng korte, nakasaad na ibinasura ang petition for bail dahil nakapagprisinta ang prosekusyon ng mga ebidensya ng malakas na guilt ng mga akusado. 

"Thus, given these pieces of evidence against all the accused at this point which establish a great presumption of guilt for purposes of bail, the court must deny their petitions for bail," bahagi ng nakasaad sa resolusyon ni acting Presiding Judge Rainelda Estacio-Montesa.  

Nilinaw naman ng korte na hindi ito nangangahulugan ng determinasyon sa ultimate outcome ng kaso.

Lahat ng kinder, libre pagkain araw-araw — Angara

ni Madel Moratillo @News | July 22, 2025

Photo File: Libreng pagkain sa kinder - DepEd Philippines

Pinalawak na ng Department of Education (DepEd) ang kanilang School-Based Feeding Program.

Dahil d'yan, lahat ng kindergarten sa mga pampublikong paaralan sa bansa ay makakatanggap na ng masustansyang pagkain araw-araw. 

Ang programa ay inilunsad kahapon sa Juan Sumulong Elementary School sa Antipolo City. 

Layon ng programa na magbigay ng hot meals at fortified food products araw-araw sa 3.4 milyong learners kabilang ang lahat ng kindergarten pupils at undernourished na mga bata sa Grade 1 hanggang 6. 

Sabi ni DepEd Secretary Sonny Angara, kapag may sapat na nutrisyon ang mga bata, mas madali silang matuto. 

Sa datos ng DepEd, sa Cagayan Valley (Region II) at Davao (Region XI), bumaba sa 80% ang bilang ng mga undernourished na kindergarten.