ni Jeff Tumbado @News | October 7, 2023
Si Nueva Ecija Gov. Aurelio Umali (una sa kaliwa) habang nagpapaliwanag kina House Speaker Ferdinand Martin Romualdez, Majority Floor Leader Manuel Dalipe at Committee on Appropriations Chairman at Ako Bicol Partylist Rep. Zaldy Co, kung papaano reresolbahin ang problema sa mga magsasaka sa probinsya kasabay na pababain ang presyo ng bigas sa merkado sa bansa na mapakinabangan na ng mga mamimili.
ni Anthony E. Servinio @Sports | October 7, 2023
Dumating na ang pinakamatimbang na gintong medalya sa Men’s Basketball ng 19th Asian Games Hangzhou salamat sa Gilas Pilipinas na tinalo ang Jordan, 70-60 kagabi sa Hangzhou Olympic Sports Centre. Nagwakas na rin ang 61 taong paghihintay na masundan ang ginto na inuwi mula sa 1962 Asiad sa Jakarta.
Tinamasa ng mga Pinoy ang pinakamalaking lamang, 28-15, sa shoot ni Ange Kouame sa second quarter. Nagising ang Jordan at pinangunahan ni Rondae Hollis-Jefferson ang paghabol hanggang magtabla sa halftime, 31-31.
Larawan mula sa Gilas Pilipinas Army
Kabaligtaran ng una nilang tapatan noong Setyembre 30 kung saan madaling nanaig ang Jordan, 87-62, nagkaroon ng sapat na tulong si Justin Brownlee mula sa mga kakampi at ibinalik sa 51-41 ang bentahe ng Gilas papasok sa huling quarter. Hindi basta tumiklop ang Jordan at may ipiniga pa kay RHJ upang magbanta, 50-56.
Nakahinga ng maluwag ang Pilipinas sa magkasunod na buslo nina Kouame at Scottie Thompson upang iakyat muli ang lamang, 60-50, at limang minuto sa orasan. Mula doon ay pinairal ng Gilas ang matalinong diskarte at lumikha ng kasaysayan.
Nalimitahan si Brownlee sa 2 puntos lang sa 4th quarter ngunit namuno pa rin sa 20 puntos, 10 rebound at 5 assist. Umangat si Kouame sa 14 puntos at 11 rebound habang malaking ambag ang 13 puntos ni Chris Newsome.
Nakabawi na rin si Brownlee kay RHJ na tinalo siya sa finals ng huling PBA Governors Cup. Nagtala si RHJ ng 24 puntos at 12 rebound subalit siya naman ang kinapos ng suporta.
Matapos ang 1962 ay isang pilak noong Beijing 1990 at mga tanso sa Seoul 1986 at Bangkok 1998 ang nakamit ng Pilipinas. Ang huling kampeon ay pinangunahan nina FIBA Hall of Fame Carlos Loyzaga at Kurt Bachmann na ama ni PSC Chairman Richard Bachmann.
Samantala, napunta sa host Tsina ang tanso nang tambakan ang Chinese-Taipei, 101-73.
ni BRT @News | October 6, 2023
Dinepensahan ni Vice President at Department of Education (DepEd) Secretary Sara Duterte ang kontrobersiyal na confidential funds ng kanyang tanggapan.
Sa kanyang pagdalo sa ika-122 anibersaryo ng Police Service sa Agusan Provincial Police Office sa Camp Rafael Rodriguez, Butuan City, binigyang diin nito na ang mga kritiko ng confidential fund ay maituturing na tutol sa kapayapaan at kalaban ng bayan.
“Makinig kayo sa lahat ng sinasabi sa palibot n'yo at tandaan n'yo, kung sino man ang kumokontra sa confidential funds ay kumokontra sa kapayapaan. Kung sino ang kumokontra sa kapayapaan ay kalaban ng bayan,” pahayag ni Duterte.
Binigyang diin din ng Bise Presidente na ang mga tao umanong umaatake sa pondong nakalaan para sa peace and order ay mayroong ibang hangarin.
“Anyone who attacks or undermines funds allocated for peace and order is naturally assumed to have insidious motivations. Such actions go against the protection and well-being of the citizenry. Those who seek to compromise the security and development of our nation jeopardize the very fabric of our society and hinder our progress.”
Giit pa ng Bise, kailangang bigyan ng ibayong pansin ang kapayapaan at kaayusan dahil dito aniya aangkla ang pagkakaroon ng kaunlaran at maayos na edukasyon sa mga kabataan.
Maliban sa pagiging Education Secretary, nagsisilbi ring co-Vice Chair ng National Task Force to End Local Terrorist Armed Conflict o NTF-ELCAC si Duterte.
