US, todo-tanggi na may Navy ship na tinamaan sa pag-atake ng Iran

ni Jenny Rose Albason @World News | May 6, 2026

Itinanggi ng United States Central Command ang ulat na tinamaan ang isang barko ng US Navy matapos maglabas ng pahayag ang ilang Iranian news agencies na umano’y may inatakeng sasakyang pandagat malapit sa isang pantalan sa timog-silangan ng Strait of Hormuz.

Ayon sa panig ng Iran, ang naturang barko ay umano’y lumabag sa maritime security kaya napilitang umatras. Subalit nilinaw ng US Central Command na walang anumang Navy ship ang tinamaan o nasira sa naturang insidente.

Kasabay nito, inihayag ng US military ang bagong inisyatiba na sinusuportahan ni US President Donald Trump, kung saan maaaring gamitin ang naval at air assets upang gabayan ang mga commercial vessel na dumaraan sa Strait of Hormuz. Layunin nitong matulungan ang mga barkong naipit sa gitna ng tumitinding tensyon sa rehiyon.

Batay sa mga ulat, ilang commercial vessel ang sinasabing inaatake o pinipigilan ng Iran kapag wala umanong pahintulot na makadaan. Dahil dito, pinapayuhan ang mga barko na dumaan sa mga katubigan ng Oman sa loob ng itinatag na “enhanced security area.”

Mariing tinutulan ng Iran ang hakbang ng Estados Unidos at tinawag itong paglabag sa umiiral na ceasefire. Samantala, iginiit naman ng U.S. na bahagi ito ng “Project Freedom” na naglalayong tulungan ang mga seafarers na naiipit sa tensyon, kabilang ang mga nakararanas ng kakulangan sa pagkain at tubig sa gitna ng sigalot.

Habang papalapag... Eroplano, sapul sa poste ng ilaw

ni Jenny Rose Albason @Overseas News | May 6, 2026

Tumama sa isang poste ng ilaw ang isang eroplano ng United Airlines habang papalapag sa Newark International Airport noong Linggo, na nagdulot ng pinsala sa poste at sa isang tractor trailer na dumadaan sa kalapit na highway.

Batay sa ulat ng Federal Aviation Administration (FAA), habang papalapit sa Newark Liberty International Airport bandang alas-2 ng hapon, ang Flight 169 ng United Airlines ay sumabit sa isang poste ng ilaw sa New Jersey Turnpike. Ang Boeing 767-400, na galing sa Venice, Italy, ay ligtas na nakalapag sa paliparan.

Ayon sa isang tagapagsalita ng airline, kasalukuyang sinusuri ng kanilang maintenance team ang pinsala ng eroplano at magsasagawa sila ng masusing imbestigasyon sa kaligtasan ng paglipad. Inalis din sa serbisyo ang crew bilang bahagi ng proseso ng imbestigasyon.

Sinabi ng Port Authority na walang naiulat na nasugatan sa loob ng eroplano, at bahagyang pinsala lamang ang nakita sa aircraft. Agad ding sinuri ng mga tauhan ng paliparan ang runway para sa posibleng debris at mabilis na naibalik sa normal ang operasyon ng airport.

Ang driver ng tractor trailer ay dinala sa ospital dahil sa bahagyang mga sugat ngunit kalaunan ay pinalabas din matapos magamot.

Samantala, naglunsad na ng imbestigasyon ang FAA at ang National Transportation Safety Board (NTSB). Inaasahang darating sa Newark ang isang imbestigador ng NTSB sa Lunes. Iniutos din ng ahensya sa United Airlines na i-secure at isumite ang cockpit voice recorder at flight data recorder upang makatulong sa imbestigasyon.

---

DAYCARE WORKER, 12 YRS. KULONG SA PANG-AABUSO SA MGA BATA

HINATULAN ng 8 hanggang 12 taon na pagkakakulong ang isang daycare worker sa Ohio matapos mapatunayang nang-abuso ng mga batang kanyang inaalagaan, kabilang ang paulit-ulit na pagtatali sa isang dalawang taong gulang na bata gamit ang tape at pag-iwan dito na nakadapa sa ilalim ng kumot.

Si Katelyn Ann Strohacker, mula sa Over the Rainbow Children’s Center sa Licking County, ay nahatulan sa 31 kaso kabilang ang kidnapping at child endangerment matapos pumasok sa no-contest plea.

Nagsimula ang kaso noong 2025 matapos magreklamo ang isang magulang. Ayon sa imbestigasyon at CCTV footage, hindi bababa sa walong bata ang umano’y naabuso, kabilang ang pagtulak, pagsipa, paghila, at isang insidente kung saan sinadyang maipit ang daliri ng bata sa cabinet.

Ayon sa mga ulat, nagdulot ang mga pangyayari ng matinding trauma sa mga bata tulad ng bangungot at separation anxiety.

Si Strohacker ay nanatiling tahimik sa korte, habang ang kanyang abogado ay humingi ng paumanhin sa ngalan niya para sa mga pamilya ng biktima.

Zoo, tigil-operasyon... Empleyado, umaming tinapon ang bangkay ng asawa sa incinerator

ni Jenny Rose Albason @Overseas News | April 30, 2026

Isang sikat na zoo sa Japan ang pansamantalang hindi nagbukas para sa summer season habang iniimbestigahan ng mga otoridad ang kaso ng isang empleyado na umano’y umamin sa pulisya na itinapon niya ang bangkay ng kanyang asawa sa incinerator ng zoo, na karaniwang ginagamit sa pagsunog ng mga namamatay na hayop.

Dahil dito, isinara muna ang Asahiyama Zoo sa Asahikawa habang nagpapatuloy ang imbestigasyon, at maaaring manatili itong sarado depende sa magiging resulta ng kaso.

Ayon sa ulat, iniulat na missing ang asawa ng empleyado bago lumutang ang naturang pahayag, kaya nagsagawa ng mas malalim na imbestigasyon ang pulisya sa loob ng pasilidad.

Ang zoo, na dinarayo ng mahigit isang milyong bisita kada taon, ay kilala sa kakaibang disenyo ng mga kulungan ng hayop.

---

SAKIT NG ANAK PINEKE, NANAY, HIGIT 4 TAON KULONG

HINATULAN ng mahigit apat na taong pagkakakulong ang isang ina sa Australia matapos magkunwaring may cancer ang kanyang anim na taong gulang na anak upang makahingi ng donasyon at tustusan ang marangyang pamumuhay.

Ang 45-anyos na babae mula sa South Australia ay ginupitan ang buhok at kilay ng bata, nilagyan ng benda, at pinainom ng gamot upang magmukhang may malubhang sakit. Dahil dito, nalinlang ang pamilya, mga kaibigan, at komunidad ng paaralan, na nagbigay ng malaking halaga ng pera.

Nagsimula ang panlilinlang matapos magpatingin ang bata sa doktor dahil sa aksidente. Kalaunan, pinalabas ng ina na may kanser ito sa mata, pinagamit pa ng wheelchair at nilimitahan ang mga gawain upang magmukhang sumasailalim sa gamutan.

Ayon sa prosekusyon, ginamit ng ina ang kanyang anak upang makuha ang simpatya ng iba at pondohan ang marangyang pamumuhay. Samantala, iginiit ng depensa na ang kanyang ginawa ay dulot ng problemang pinansyal at maling pagpapasya.

Sa huli, hinatulan siya ng apat na taon at tatlong buwang pagkakakulong at maaari siyang mag-apply para sa parole sa susunod na taon.