Nepal-China border nilamon ng baha, 177 dedbol, higit 1K pa missing

ni Justine Berganio @Overseas News | August 28, 2026

Photo: Aftermath matapos ang flash flood sa Nepal - Navesh Chitrakar-Reuters

Higit 1,000 katao, karamihan ay mga turista, ang nawawala matapos hagupitin ng matinding flash flood ang Nepal at Tibet, habang umabot na sa higit 177 ang iniulat na nasawi.

Sa Nepal, 826 katao ang nawawala, kabilang ang halos 600 dayuhan. Kabilang dito ang 178 mula India, 65 Amerikano, 35 Australian, 33 Briton at 25 Canadian. Iniulat din na isang Pilipino ang kabilang sa mga nawawala. Sa Tibet naman, 558 ang nawawala, kabilang ang hindi bababa sa 260 dayuhan.

Maraming bahay, sasakyan, kalsada at iba pang imprastraktura ang natangay o natabunan ng putik. Nagsasagawa na ng malawakang search and rescue operations ang mga awtoridad, kabilang ang paggamit ng mga helicopter, emergency workers, sniffer dogs at speedboat.

Marami sa mga biktima ay mga pilgrim na nagtungo sa Kailash Mansarovar, isang sagradong lugar sa Tibet.

Batay sa paunang pagsusuri, landslide ng yelo at bato ang posibleng nag-trigger sa rumaragasang baha sa Lhende River. Nilinaw din ng United States Geological Survey na ang unang napaulat na magnitude 4.4 na lindol ay hindi tunay na lindol, kundi seismic shock na dulot ng pagguho ng yelo at bato.

Samantala, naglaan ang pamahalaan ng Estados Unidos ng $500,000 (P30 milyon) bilang emergency assistance.

Patuloy ang paghahanap sa mga nawawala habang patuloy ding tinutukoy ng mga awtoridad ang lawak ng pinsala at bilang ng mga nasawi.

66 patay sa baha at landslide sa Nepal

ni Eli San Miguel @Overseas News | Sep. 29, 2024

Naitala ang hindi bababa sa 66 na namatay sa Nepal mula noong maagang bahagi ng Biyernes dahil sa pagbaha at mga landslide mula sa tuloy-tuloy na pag-ulan.

Iniulat naman nitong Sabado na may karagdagang 69 na nawawala at 60 na nasugatan, ayon kay Dil Kumar Tamang, opisyal ng Ministry of Home Affairs.

Naganap ang karamihan ng pagkamatay sa Kathmandu valley, na tahanan ng 4 milyong tao, kung saan pinahinto ng pagbaha ang daloy ng trapiko. Daan-daang mga tao ang namamatay taun-taon sa panahon ng tag-ulan dahil sa mga landslide at biglang pagbaha.

Mula sa kalagitnaan ng Hunyo, hindi bababa sa 254 na tao ang namatay, kasama ang 65 na nawawala mula sa mga landslide, pagbaha, at mga pagtama ng kidlat.

Unang mga kaso ng Omicron variant, naitala sa Argentina at Nepal

ni Lolet Abania | December 6, 2021

Nakapagtala ng unang kaso ng Omicron COVID-19 variant sa Argentina, ayon sa health ministry ng nasabing bansa sa South America.

Ang 38-anyos na pasahero ay residente ng western Argentine province ng San Luis, na dumating sa naturang bansa nitong Nobyembre 30 mula sa South Africa sakay ng flight via ng United States at isinailalim sa isolation simula rin noon.

Magugunitang ang Omicron variant ay nagdulot ng takot sa global markets habang muling ibinalik ang mga border restrictions sa mga bansa. Nakasama na rin ang Argentina sa Brazil, Mexico at Chile sa listahan ng mga bansa sa Latin America na may mga na-detect na kaso ng bagong variant.

Ayon sa ministry, ang pasyente na fully vaccinated ay nagbigay ng negative PCR test bago pa ang kanyang pagbiyahe at isa pang negative antigen test nang dumating naman ito sa Buenos Aires.

Ang pasyente ay tinest ulit matapos na ang kanyang kasamahan sa isang work event sa South Africa ay nagpositibo sa test sa COVID-19.

“The epidemiological objective currently is to contain and delay the possible community transmission of new variants of concern,” pahayag ng ministry.

Sinabi pa ng ministry, ang pasyente ay nagkaroon ng close contact sa apat na indibidwal na nasa isolation na rin ngayon, subalit wala ang mga itong sintomas at ang kanilang PCR tests ay negatibo ang resulta. Lahat sila ay sasailalim sa isa pang PCR test matapos ang kanilang isolation period.

Samantala, na-detect na rin ang unang dalawang kaso ng Omicron COVID-19 variant sa Nepal, ayon sa health ministry ng bansa.

Sa inilabas na statement ng ministry, ang 66-anyos na foreigner ay dumating sa Nepal mula sa bansang may nakumpirmang Omicron variant noong Nobyembre 19.

Habang ang isa ay 71-anyos na indibidwal na naging close contact niya ay nagpositibo sa test sa Omicron nitong Linggo. Hindi naman binanggit ng ministry ang nationalities ng dalawang pasyente.

“Both of them are in isolation and getting healthcare under the supervision of health workers,” batay sa statement ng ministry.

Dagdag pa ng ministry, na-traced naman ang 66 iba pang indibidwal na naging close contact ng mga pasyente at lahat sila ay nagnegatibo sa test.

Kamakailan, ipinagbawal ng Nepal ang mga travelers na mula sa walong African countries at Hong Kong dahil sa banta ng Omicron COVID-19 variant.