Dating Utah Jazz star na si Mark Eaton, pumanaw na sa edad na 64

ni Ronalyn Seminiano Reonico | May 30, 2021

Pumanaw na ang dating manlalaro ng Utah Jazz na si Mark Eaton sa edad na 64 noong Sabado. Pahayag ng Utah Jazz, “We are heartbroken by the passing of Utah Jazz legend Mark Eaton.

“Our thoughts are with his family as we all mourn the loss of a great man, mentor, athlete and staple of the community.” Samantala, ayon sa ulat, umalis ng bahay si Eaton noong Biyernes nang gabi upang magbisikleta sa Summit County, Utah.

Ilang sandali lamang ang nakalilipas ay may tumawag sa 911 at iniulat na nakahandusay na si Eaton sa roadway na unconscious.

Naisugod pa sa ospital si Eaton ngunit kalaunan ay binawian ng buhay. Ayon naman sa imbestigasyon ng awtoridad, walang motor vehicle na involved sa insidente.

Samantala, si Eaton ay nagtrabaho bilang auto mechanic sa Arizona noong 1977 kung saan isang basketball coach ang nakakita sa kanya at hinikayat siyang pumasok sa Cypress College.

Matapos nito ay nag-transfer siya sa University of California at Los Angeles (UCLA) kung saan hinawakan siya ng legendary coach na si John Wooden.

Nang maging miyembro ng Jazz si Eaton, nanguna siya sa blocked shots nu’ng 1984, 1985, 1987 at 1988 seasons at nakapagtala siya ng NBA record na 456 blocks sa 184-85 campaign.

Binansagan ding NBA Defensive Player of the Year si Eaton noong 1985 at 1989.

NBA player na si Derrick Rose, positive sa COVID-19

ni Mary Gutierrez Almirañez | March 23, 2021

Nagpositibo sa COVID-19 ang National Basketball Association (NBA) player na si Derrick Rose, batay sa pahayag na inilabas ng kanyang kampo nitong Lunes, Marso 22.

Ayon pa kay Rose, "The COVID thing, I know a lot of people overlook it but it's very serious. It's real. I had the flu. It's nothing like the flu… It was that times 10.”

Matatandaang mula sa Detroit Pistons ay kalilipat lamang niya sa Knicks. Huli siyang nakapaglaro sa court noong Pebrero 28, kung saan mayroon itong average na 12.5 points at 4.9 assists sa loob ng 10 games. Si Rose ay isang 32-anyos na American professional basketball player.

Siya ang naging ‘top overall pick’ noong 2008 NBA Draft sa Chicago Bulls at ginawaran bilang Most Valuable Player (MVP) nu'ng sumunod na 2010-2011 season.

Giant wins para sa Wizards, Hawks, Lakers at T'wolves

ni Anthony E. Servinio - @Sports | March 20, 2021

Nakamit ng Washington Wizards ang higanteng panalo at pinatumba ang numero unong Utah Jazz, 131-122, sa NBA kahapon mula sa Capital One Arena. Tumalon agad sa 62-38 na lamang ang Wizards sa second quarter at naging sapat ito sa kabila ng pilit bumalik ng Jazz subalit kinapos sa oras.

Walang nagawa ang depensa ng Jazz na mapigil ang halimaw na laro nina Bradley Beal na nagsabog ng 15 ng kanyang 42 puntos sa fourth quarter at 2017 MVP Russell Westbrook na may triple double na 35 puntos, 15 rebound at 13 assist.

Mabait naman ang Marso sa Atlanta Hawks at perpekto sila sa pitong laro na pinatuloy sa 116-93 pagdurog sa bisitang Oklahoma City Thunder. Parehong nagsumite ng tig-23 puntos sina Trae Young at Bogdan Bogdanovic para sa kartadang 21-20.

Kinuha ng defending champion Los Angeles Lakers ang pagkakataon na bumalik sa pangalawang pwesto sa Western Conference matapos iligpit ang pumalag na Charlotte Hornets, 116-105, at manatiling walang talo matapos ang All-Star Game. Mabigat pa rin si LeBron James sa kanyang 37 puntos.

Hinila pababa ng kulelat na Minnesota Timberwolves sa ikatlong pwesto ang Phoenix Suns, 123-119. Nagtala ng 42 puntos ang numero unong rookie Anthony Edwards. Umulit ang Portland Trail Blazers sa New Orleans Pelicans, 101-93. Ipinakita ni Damian Lillard na hindi tsamba ang 125-124 panalo nila noong isang araw at nagbagsak ngayon ng 36 puntos.

Kumapit ang New York Knicks sa fourth quarter upang takasan ang humahabol na Orlando Magic, 94-93, salamat kay Alec Burks at RJ Barrett na nagsama para sa 13 puntos. Triple double si All-Star Julius Randle na 18 puntos.

Samantala, inihayag ni NBA Commissioner Adam Silver na luluwagan nila ang protocol para sa mga kumpleto ang bakuna para sa COVID-19. Ilan sa mga panukala ay babawasan ang pagsusuri, aalisin ang quarantine at papayagan din ang kumain sa labas at makipag-ugnayan sa mga tagahanga.