Sotto, handa na sa NBA matapos mapasok sa Draft

ni VA/MC - @Sports | April 29, 2022

Matapos ang season game sa Australia National Basketball League (NBL), naniniwala si Filipino center Kai Sotto na handa na siyang sumabak sa NBA.

Sinabi ng 19-anyos na si Sotto kahapon na kabilang na siya sa 2022 NBA Rookie Draft. "I have declared for the 2022 NBA Draft. Please pray for and support me during my quest to fulfill my ultimate dream," saad ni Sotto sa Instagram post kung saan nagpasalamat din siya sa team ng Adelaide 36ers.

Wala sa listahan ang Pinoy teenager bilang entry candidates na inilabas ng NBA noong Miyerkules, pero awtomatiko siyang eligible sa draft.

Makikipagsapalaran si Sotto matapos ang 23-game stint sa Adelaide NBL, kung saan siya may average na 7.32 points, 4.36 rebounds, at 0.68 block sa 15.2 minutes per game.

Kung mada-draft, si Sotto ay magiging ikalawang straight 36er na mapipili. Na-draft ng Oklahoma City Thunder si guard Josh Giddey at sixth overall sa 2021 NBA Rookie Draft matapos ang mahusay na laro sa Adelaide kung saan siya itinanghal na NBL Rookie of the Year.

Sa ngayon ay may dalawang NBA players na may lahing Filipino sa katauhan nina Jordan Clarkson ng Utah at Jalen Green ng Houston. Ang 2022 NBA Rookie Draft ay gaganapin sa Hunyo 23 sa Barclays Center sa Brooklyn.

Milwaukee Bucks, shoot na sa East Semis; GSW una sa West

ni Anthony E. Servinio - @Sports | April 29, 2022

Umabanse na ang Milwaukee Bucks sa Eastern Conference semis ng 2022 NBA Playoffs matapos durugin ang kulang na Chicago Bulls, 116-100, sa Game 5 kahapon sa Fiserv Forum. Makalipas ang ilang oras ay sinundan ng Golden State Warriors bilang unang koponan sa Western Conference Semifinals nang pabagsakin ang Denver Nuggets, 102-98, sa Game 5 ng seryeng best-of-seven.

Bumuhos ng 15 sunod-sunod na puntos ang Bucks sa simula ng 2nd quarter upang itayo ang pinakamalaking lamang, 49-20, sa likod nina Giannis Antetokounmpo, Wes Matthews at Jevon Carter. Sa puntong iyon ay wala pang puntos si DeMar DeRozan ng Bulls at hinintay pa ang 5:39 bago siya naka-shoot at tinapos ang laro na may 11 puntos lang.

Inalagaan nang mabuti ng Bucks ang lamang kahit bahagyang nakalapit ang Chicago na naglaro na wala sina Zach LaVine dahil sa health protocol at Alex Caruso na naumpog ang ulo noong Game 4. Nanguna si Giannis sa kanyang 33 puntos at sinundan ni Pat Connaughton na may 20 puntos buhat sa anim na tres.

Natapos ang seryeng best-of-seven sa 4-1 kung saan nakuha ng Milwaukee ang huling tatlong laro. Naghihintay sa Milwaukee sa East Semifinals ang Boston Celtics na winalis ang Brooklyn Nets, 4-0.

Kahit walo ang lamang ng bisitang Nuggets sa simula ng 4th quarter, 78-70, hindi ito pinansin ng Warriors at unti-unting humabol hanggang maagaw ang abante sa three-points ni Gary Payton II papasok sa huling 7 minuto, 86-84. Hindi na binitawan ng Golden State ang lamang at uminit muli ang shooting nina Stephen Curry at Klay Thompson upang samahan si Payton sa paghatid ng mga pandiin na puntos.

Bumuhos ng 30 puntos si Curry habang parehong tig-15 puntos sina Thompson at Payton at 12 galing kay Andrew Wiggins – apat na manlalaro na mga anak ng mga dating NBA player. Sinikap ni MVP Nikola Jokic na buhatin ang Denver sa 30 puntos at 19 rebound subalit kinapos ng tulong ng kakampi lalo na sa 4th quarter.

Heat, swak na sa East Finals; isa pa sa Grizzlies at Suns

ni Anthony E. Servinio - @Sports | April 28, 2022

Pasok na sa Eastern Conference semifinals ang numero unong Miami Heat matapos iligpit ang Atlanta Hawks sa Game 5 ng seryeng best-of-seven, 97-94, sa NBA Playoffs kahapon sa FTX Arena. Sa Western Conference, isang tagumpay na lang ang kailangan ng Memphis Grizzlies at numero unong Phoenix Suns matapos manaig sa kanilang mga hiwalay na Game 5.

Sa gitna ng mahigpit na depensa kay Trae Young, pumalag ang kanyang mga kakampi at binura ang 67-52 lamang ng Heat sa 3rd quarter at naging tatlo na lang ang agwat sa huling minuto, 97-94. Mula roon ay depensa muli ang nagsalba sa Miami at inagaw ni Bam Adebayo ang bola kay Danilo Gallinari bago ito makatira ng 3-points na may isang segundo sa orasan.

Matapos lumiban sa unang 3 laro ng serye, nagsabog ng pito ng kanyang 23 puntos sa 4th quarter si Victor Oladipo para sa Heat upang takpan ang pagkawala ni Jimmy Butler dahil maga ang tuhod. Sumunod si Adebayo na may 20 puntos at 11 rebound at maghahanda na ang Heat na harapin ang Philadelphia 76ers o Toronto Raptors sa susunod na serye.

Pinatunayan ni Ja Morant ng Grizzlies kung bakit siya ang 2022 Most Improved Player at lumipad para sa nagpapanalong 2 puntos na may isang segundong nalalabi laban sa Minnesota Timberwolves, 111-109. Gumawa si Morant ng 18 puntos sa huling 9 na minuto kung saan bumangon ang Memphis mula sa 92-79 lamang ng Timberwolves.

Nagsumite ng 30 puntos, 13 rebound at 9 na assist si Morant habang 25 puntos si Desmond Bane. Nanguna sa Minnesota si Karl-Anthony Towns na may 28 puntos. Hindi pinaporma ng Suns ang bisitang New Orleans Hornets, 112-97, sa likod ng mainit na nilaro ni Mikal Bridges. Naglaan pa ng lakas ang Suns at hindi na pinapuntos ang Pelicans sa last 2 minutes. Sisikapin ng Milwaukee Bucks na tapusin ang serye sa Game 5 ngayong araw laban sa bisitang Chicago Bulls.