Butler at Paul, 2-0 na; sinipag sa Heat at Suns

ni Anthony E. Servinio - @Sports | May 6, 2022

Sumandal muli ang Miami Heat sa beteranong si Jimmy Butler upang maukit ang 119-103 panalo sa bisitang Philadelphia 76ers at umabante ng 2-0 sa kanilang seryeng best-of-seven sa pagpapatuloy ng 2022 NBA Playoffs Eastern Conference Semifinals, kahapon sa FTX Arena. Hindi nagpahuli ang Phoenix Suns sa Western Conference at lumamang din ng 2-0 sa Dallas Mavericks matapos ang 129-109 tagumpay.

Nakatikim ng maagang 11-6 lamang ang 76ers subalit naghigpit mula roon ang Heat at naagaw ang lamang sa pagwakas ng 1st quarter, 31-24, salamat sa magkasunod na buslo nina Dwayne Dedmon at bagong hirang na Sixth Man of the Year Tyler Herro. Hindi na ito binitiwan ng Miami at bumuhos sila ng 10 sunod-sunod na puntos upang maabot ang kanilang pinakamalaking lamang, 104-86, at 5:32 ang nalalabi.

Walang personalan at trabaho lang para kay Butler kontra sa dating koponan bago lumipat sa Heat noong 2019. Nagtapos si Butler na may 22 puntos at 12 assist upang tulungan si Bam Adebayo na may 23 puntos.

Sa gitna ng suliranin ng Philadelphia, tumanggap sila ng magandang balita na bumubuti ang kalagayan ni sentro Joel Embiid at maaari siyang bumalik sa Game 3 ngayong Sabado sa Wells Fargo Center. Nabasag ang buto sa mata ni Embiid sa serye kontra Toronto Raptors at daraan pa sa isa pang pagsusuri bago payagang maglaro.

Bumuhos ng 34 puntos si Tyrese Maxey at sinundan nina Tobias Harris na may 21 at James Harden na may 20 puntos upang subukang takpan ang pagkawala ni Embiid na numero-uno sa puntos sa NBA ngayong taon. Nabugbog din ang Philadelphia sa ilalim at sumungkit lang ng 34 rebound kumpara sa 44 ng Miami.

Umarangkada ang Suns sa 4th quarter at biglang nawalan ng hangin ang Mavs. Inaalagaan nila ang 89-83 na lamang subalit sabay-sabay uminit sa 3-points sina Devin Booker, Chris Paul, Cam Johnson at Ish Wainwright at lumobo ang agwat sa 122-95 at 3:49 ang nalalabi.

Celtics at Grizzlies, gising ang kampanya sa Game 2

ni Anthony E. Servinio - @Sports | May 5, 2022

Nagising ang Boston Celtics at dinurog ang bisitang Milwaukee Bucks sa Game 2 ng Eastern Conference Semifinals, 109-86, sa 2022 NBA Playoffs kahapon sa TD Garden. Sa Western Conference, mag-isang binuhay ni Most Improved Player Ja Morant ang Memphis Grizzlies patungo sa 106-101 panalo sa bisitang Golden State Warriors at itabla rin ang serye sa 1-1.

Matapos mapahiya sa Game 1, 89-101, nanigurado na ang Celtics at hindi na pinaporma ang Bucks hanggang lumobo ang lamang sa 72-46 sa 3rd quarter. Ang pinakamalapit na inabot ng Milwaukee ay noong natapyasan ang agwat sa 82-94 matapos ang dalawang free throw ni Giannis Antetokounmpo na may 4:30 sa orasan subalit sinagot ito ng dalawang tres ni Jayson Tatum upang masigurado ang panalo papasok sa last 2 minutes, 107-86.

Nanguna sa Boston si Jaylen Brown na may 30 puntos buhat sa anim na tres habang 29 puntos si Tatum. Malaki ang tulong ng reserbang si Williams na nag-ambag ng 21 puntos. Hawak ng Warriors ang 95-91 lamang papasok sa huling 4 na minuto at iyan ang hudyat para kay Morant na magsabog ng lahat ng huling 15 puntos ng Grizzlies upang maagaw ang abante at lumayo. Nagtapos si Morant na may 47 puntos at sinundan ng reserbang si Ziare Williams na may 14 puntos.

Samantala, may bagong Sixth Man of the Year sa katauhan ni Tyler Herro ng Miami Heat matapos niyang magtala ng 20.7 puntos galing sa 175 three-points sa 66 na laro na pinakamataas sa kanyang tatlong taon sa NBA. Nanalo si Herro sa botohan sa iba pang nominado na sina Kevin Love ng Cleveland Cavaliers, Cam Johnson ng Phoenix Suns at kabayan Jordan Clarkson ng Utah Jazz na nag-uwi ng karangalan noong nakaraang taon.

Lagablab ng Heat at Suns, ipinaso sa 76ers at Mavs

ni Anthony E. Servinio - @Sports | May 4, 2022

Humataw ang Miami Heat sa second half upang masugpo ng bisitang Philadelphia 76ers, 106-92, sa Game 1 ng Eastern Conference semifinals sa 2022 NBA Playoffs, kahapon mula sa FTX Arena. Sa Western Conference, nakauna rin ang numero unong Phoenix Suns laban sa bisitang Dallas Mavericks, 121-114.

Maganda ang simula ng Miami at dominado ang first half subalit hindi sila naka-shoot sa huling tatlong minuto at gumawa ng walang sunod-sunod na puntos ang Philadelphia upang maagaw ang lamang, 51-50. Nagising ang Heat sa third quarter at sumandal kay Bam Adebayo, Gabe Vincent at PJ Tucker upang ibalik sa kanila ang lamang papasok sa 4th quarter,80-72, at hindi na nila binitawan ito at umabot pa ng 21 ang lamang sa huling siyam na minuto, 98-77.

Double-double si Adebayo na 24 puntos at 12 rebound habang pumukol ng apat na tres si Tyler Herro para sa 25 puntos. Sumunod si Jimmy Butler na nag-ambag ng 15 puntos.

Sinubukan buhatin ni Tobias Harris ang 76ers sa 27 puntos sa gitna ng pagliban ni Joel Embiid na nabasag ang buto sa mata sa serye laban sa Toronto Raptors. Hindi sumama sa lakbay si Embiid at susuriin pa kung makakalaro siya sa Game 3 sa Wells Fargo Center.

Balik na ang lakas ni Devin Booker at nagsumite siya ng 23 puntos sa 38 minuto. Nagtala ng 25 puntos si Deandre Ayton habang 19 puntos si Chris Paul.

Lamang ng buong 48 minuto ang Phoenix at pinaabot ng 21 ang lamang sa 4th quarter, 106-85. Nasayang ang 45 puntos at 12 rebound ni Luka Doncic at maghahanda na ang Mavs para sa Game 2 sa Huwebes.

Sa mga serye ngayong araw, sisikapin ng Boston Celtics na bumawi sa Game 2 at makatabla kontra sa World Champion Milwaukee Bucks. Pareho rin ang layunin ng Memphis Grizzlies na bumangon sa kanilang Game 2 sa bisitang Golden State Warriors.