Warriors, nakalusot sa Grizzlies, Lillard, 60 puntos sa T'Blazers

ni Anthony E. Servinio @Sports | January 27, 2023

Pinatagal ng World Champion Golden State Warriors ang pagpalabas kay Stephen Curry at malusutan ang 122-120 panalo sa bisitang Memphis Grizzlies sa pagpapatuloy ng NBA Rivals Week kahapon sa Chase Center. Sinalubong ng Los Angeles Lakers ang pagbabalik-aksiyon ni Anthony Davis sa 113-104 panalo sa bisitang San Antonio Spurs.

Nahanap ni Donte DiVincenzo ang libre sa ilalim na si Jordan Poole para sa nagpapanalong puntos na may 2.4 segundo sa orasan. Bago noon ay itinabla ng Memphis ang laro sa 120-120 sa dunk ni Brandon Clarke.

Nagdabog si Curry matapos magmintis ang tres ni Poole at itinapon sa sahig ang kanyang mouthpiece na may 1:14 nalalabi sa laro at lamang ang Warriors, 116-114, sapat upang palabasin sa laro. Humabol ang Golden State mula sa 99-109 sa huling anim na minuto para pumantay sa 24-24 panalo-talo at itapal ang ika-apat na sunod ng Memphis at kartadang 31-17.

Kahit hindi tinapos ang laro ay gumawa pa rin ng 34 puntos si Curry. Sinuportahan siya nina Klay Thompson na may 24 at bayani Poole na may 21 puntos.

Huling naglaro si Davis noong Disyembre 16 at lumiban ng 20 laro bunga ng pilay sa paa. Hindi siya nag-aksaya ng panahon at agad namuno sa atake sa kanyang 21 puntos at 12 rebound habang nabitin ng isang rebound si LeBron James para sana triple double na 20 puntos, 9 na rebound at 11 assist.

Umagaw ng eksena si Damian Lillard at nagsabog ng 60 puntos sa 134-124 tagumpay ng Portland Trail Blazers sa Utah Jazz. Kulang ito ng isang puntos upang tumbasan ang 61 na kanyang ginawa noong Enero 20, 2020 kontra sa Warriors.

Jokic, MVP uli ng NBA; dinaig sina Embiid at Antetokounmpo

ni Anthony E. Servinio - @Sports | May 13, 2022

Opisyal na inihayag ng NBA ang paggawad ng 2022 Kia Most Valuable Player kay Nikola Jokic ng Denver Nuggets. Ito na ang ikalawang sunod na taon na nagwagi ang sentro na tubong Serbia at sinamahan niya ang listahan ng 12 iba pang manlalaro na naabot ang bihirang karangalan.

Sa 74 na laro, nagtala si Jokic ng mga numerong 27.1 puntos, 13.8 rebound, 1.5 agaw at 0.9 tapal na lahat ay pinakamataas sa 7 taon sa liga at may kasama pang 7.9 assist na mas kaunti kumpara sa 8.3 noong 2021. Tinalo niya sa botohan sina Joel Embiid ng Philadelphia 76ers at ang 2019 at 2020 MVP Giannis Antetokounmpo ng Milwaukee Bucks.

Kahit nabigong makamit ang pangatlong MVP, nagtrabaho nang husto si Giannis upang maipanalo ang mahalagang Game 5 sa serye sa Boston Celtics, 110-107, kahapon sa TD Garden. Umangat ang Bucks sa 3-2 at maaaring tapusin na ang serye sa Game 6 sa harap ng kanilang tagahanga sa Fiserv Forum ngayong Sabado.

Humabol ang Milwaukee sa huling 10 minuto mula sa 93-79 lamang ng Boston sa likod nina Giannis, Jrue Holiday at Pat Connaughton hanggang umabante na may 11 segundo sa orasan matapos tapikin papasok ni Bobby Portis ang mintis na free throw ni Giannis, 108-107.

Pang-MVP ang numero ni Giannis na 40 puntos at 11 rebound at tinulungan ni Holiday na may 24 puntos habang 14 puntos at 15 rebound si Portis. Nagsumite si Jayson Tatum ng 34 puntos at 26 puntos si Jaylen Brown, subalit malabnaw ang laro ng bayani sa Game 4 na si Al Horford na 8 puntos lang.

Maliban kay Giannis at Jokic, ang mga aktibong manlalaro na nagwagi ng magkasunod na MVP ay sina LeBron James ng Los Angeles Lakers at Stephen Curry ng Golden State Warriors. Binubuo ang listahan ng mga alamat na sina Kareem Abdul-Jabbar, Michael Jordan, Larry Bird, Moses Malone, Bill Russell, Wilt Chamberlain, Tim Duncan at Steve Nash.

Heat at Suns, tuluyan nang tutustahin ang Game 6 Semis

ni Anthony E. Servinio - @Sports | May 12, 2022

Malaking bagay na maglaro sa sariling tahanan sa 2022 NBA Playoffs at pinatunayan ito ng Miami Heat at Phoenix Suns matapos parusahan ang kanilang mga bisita kahapon at parehong umakyat sa 3-2 lamang sa Eastern ang Western Conference semifinals. Maaari na nilang wakasan ang mga serye sa paglakbay nila ngayong Biyernes para sa hiwalay na Game Six.

Patuloy pa rin ang perpektong kartada ng Miami sa FTX Arena at tinambakan ang Philadelphia 76ers, 120-85. Kinumpleto ni James Harden ang three-point play para sa 10-9 lamang ng 76ers, subalit sinagot ito ng 11 puntos ni Max Strus at anim kay Jimmy Butler upang itulak ang Heat sa 31-19 lamang at hindi na nila ito binitawan.

Pitong Heat ang nagtala ng 10 o higit na puntos sa pangunguna ni Butler na may 23 at Strus na may 19 puntos at 10 rebound. Umabot ng 37 ang lamang ng Miami, 118-81, at 1:45 sa orasan.

Kinabahan ang Philadelphia sa second quarter nang bumagsak at nangisay sa sakit matapos tamaan sa mukha si Joel Embiid na naglalaro na may basag na buto sa mata. Bumalik si Embiid at pinangunhan ang koponan sa kanyang 17 puntos.

Mas dikit ang 110-80 tagumpay ng Phoenix sa bisitang Dallas Mavericks kung saan humataw lang ang Suns sa second half. Huling tinikman ng Mavs ang lamang, 45-44, subalit isinara ng three-points ni Cam Johnson at shoot ni Chris Paul ang first half na abante ang Phoenix, 49-45.